MaxEating的个人专页

金百利廣場上面都有唔少既食肆，呢間日本料理算係比較多人去既一間。內裡格局唔算大，座位唔算寬敞，不過服務方面幾唔錯，店員有禮且反應快，唔會掉低客人係台就算。今次同朋友都比較食得，2個人叫咗5款食物。啲野食好快就嚟到，第一樣到既食物就係芝士玉子燒。原本我地諗住佢係小食嚟，作為前菜過吓口癮咁，點知出現喺我地面前係一舊巨型玉子燒，而且賣相好唔錯，我地見到都流曬口水。玉子燒食落甜味啱啱好，入面包住既芝士好香同冇太咸影響咗同玉子燒既配搭，呢味餸係必食之選呀~隨後嚟到既係鹽燒多春魚同牛油果軟殼蟹卷。多春魚燒得香脆，魚身完整冇爛熔熔，啲魚春好香好正。牛油果蟹卷入面啲軟殼蟹都脆卜卜，食得到入面啲蟹味同冇炸到太油搞到重油益味。每件飯卷一口一件，每件都食到牛油果、軟殼蟹，蟹籽同壽司飯幾層味道既配合。飯類方面，我地選擇咗石燒鰻魚炒飯。炒飯嚟到時熱辣辣香氣十足，見到每粒飯粒粒分明。鰻魚份量剛剛好，大概每啖飯都會食到1-2粒鰻魚肉，所以冇出現肉味蓋過飯味既問題。最後一道主菜係牛肉野菜壽喜燒。食到呢度其實都飽飽地，都驚食唔曬呢個鍋，因為佢份量都唔少同埋驚牛肉比較膩。不過食落又唔覺得好膩好辛苦，原因係鍋入面既野菜 (秋葵、胡蘿蔔、王牙白) 好清甜，令個湯底食落唔覺油。鍋入面既牛肉冇用到超肥果啲肥牛，所以個鍋冇愈煮愈油既情況出現，整體野菜同肉既平衡都保持得唔錯。呢間餐廳多人食都係有佢既原因，野食既質素好唔錯，但係價錢一啲都唔貴，所以性價比偏高，值得推薦~…查看更多

呢間餐廳係商場4樓。鋪面唔算細，座位算舒適，而且裝潢方面幾特別，餐廳入面都有幾個打卡位俾食客打下卡。一般café 既菜式會係主打西式菜，食下意粉、pizza、意大利飯咁樣。而呢間café 比較特別，係菜式入面加入咗啲泰式元素。同朋友唔算好肚餓，主要叫咗3樣食物同1杯飲品試下。第一樣到既係3款小食既拼盤，分別有庶蝦、炸飯波同腐皮扎肉。3樣之中最好食既係庶蝦，包住庶既蝦滑彈牙香口，最重要既係入面條庶多汁香甜，令人忍唔住係咁啜啲汁。炸飯波皮脆，而且飯波入面加咗香茅味道好特別，都值得推介。第二樣野食係墨汁卡邦尼意粉配巴馬火腿。意粉嚟到賣相唔錯，而且做到creamy既口感，每啖意粉都食得到火腿香味同墨汁既配合。不過食墨汁意粉都要預咗食到嘴黑色架啦。第三樣嚟既係肉類 : 脆炸五花腩。餐廳將五花腩炸到脆卜卜，而且入面既五花腩保持到多汁肥美，食落好爽好滿足，但係都好有罪疚感。店家係五花腩隔離另配有黑醋雜莓沙律，食食下覺得太膩既時候食下沙律refresh下會好好多，店家係呢方面既心思做得唔錯。飲品方面我地叫咗杯牛油果蜂蜜芫茜沙冰，揀呢杯就係想試下將芫茜加入特飲究竟味道會係點。特飲嚟到賣相同平時牛油果沙冰冇咩分別係上面加咗條芫茜，飲落第一啖就飲到入面幾重芫茜味，不過芫茜味出其地同牛油果味幾夾，唔令人反感，愛好芫茜既人真係可以試下。…查看更多

今次去的餐廳位於元朗朗屏西鐵站5分鐘路程，一間好有格調既餐廳:是但求其食。一入到去就見到店主用好多心機佈置，有掛滿牆的黑膠唱片，亦有巨型投射海洋主題的天花，淨係餐廳環境都留比我好深印象。仲有餐廳名令我。聯想起陳奕迅既是但求其愛，用餐時聽到佢地播既音樂都好好聽，都係中港台流行曲。雖然餐廳名叫是但求其食，但野食一d都唔求其！老闆先為我地上左一杯特製鴨屎綠凍檸茶同鴨屎綠凍奶茶。兩杯第落去唔喺鴨屎綠色，問完老闆先知用左青檸桂花同茶葉撞出來嘅特製飲品，我飲嘅鴨屎綠奶茶好有茶味，仲有少少功夫茶嘅濃茶味道，真係好特別。第一道菜喺南瓜蟹肉燴飯，佢用南瓜會出來嘅飯真係感覺到有甜味，份量仲比一般餐廳幾大。個飯亦都唔會太乾或者太深，呢樣控制得啱啱好，真係要讚下廚師。之後上嘅三文魚香草pizza, 鮮味好夠，pizza餅底係脆餅底，加埋芝士嘅拉絲，真係好睇又好味。雖然佢多芝士，但係都唔會比人好滯嘅感覺。主菜嚟啦，就係豬鞍配薯條啦。一上菜見到好大份已經好驚喜，好想即刻試食。佢啲薯條好脆，炸得剛剛好。再試埋個豬鞍，一食落去完全唔覺得硬。豬鞍平時已經好少地方有得食，加上哩個厚度，好容易會煮硬咗，不過老闆話今日有靚豬鞍 (聽講平時要早啲訂先有)，令到呢嗰七成熟豬鞍非常好味！總括黎講，今日幾道菜都令我印象好深刻，用嘅材料雖然唔係好特別好少見，不過煮出嚟嘅味道同平時食到嘅唔同。再加上老闆同店員都好友善，我地同其他枱嘅食客都同店員有講有笑。再加上店主用心設計嘅環境，真係好想再食多次。雖然我地食左咁多野但係價錢都唔貴，令我對呢間餐廳嘅好感大增。…查看更多

Green common 開到好多地方都有，愈來愈多人願意試下素食。呢間店鋪最突出係佢賣既好似肉但其實冇肉成份既「未來肉」。未來肉既產品已經出左唔少，仲有埋未來肉午餐肉、漢堡等等，好食又唔會有罪惡感。我地一班人叫左4樣野食。第一樣係未來午餐肉配素蛋既五穀「頹」飯。未來午餐肉食落真係好似真午餐肉，有曬佢果種少少煎完既香脆味同鹹味，亦有佢果種彈口既肉感。素蛋口感似玉子燒，食落係豆味冇蛋味。第二樣野食係咖哩未來肉漢堡扒飯，日式咖喱汁少少偏甜香口，漢堡肉好野味，味道係同真肉漢堡有少少分別架啦，不過又唔會覺得差好遠味道怪，大概最大分別係冇左肉類既油脂味。成個飯雖然聽落係heavy但係食落又唔覺膩同油，又唔覺因為食得油而有罪疚感。另外叫左兩款小食分別係紅油抄手同未來雞堡。未來雞堡其實第二間餐廳都有，口感味道同麥樂雞差不遠。紅油抄手夠惹味，同真抄手可以話冇分別，係份量少左啲，但都不妨試吓。…查看更多

平時午餐都周不時有嚟呢邊食下，大坑都多唔錯既食肆俾銅鑼灣果邊番工既人選擇。呢間餐廳小店鋪位唔大，位置都唔係咁易搵到，不過都值得過嚟食個lunch 試下。餐廳午餐中式飯多，套餐主要50幾60蚊算平民。餐牌有滑蛋雞扒飯、糖醋排骨飯等客飯，今次我就叫左滑蛋蝦仁飯。個飯嚟到勁大碟，餸都好多。我另外轉左菜飯食，食落冇咁膩。佢既滑蛋蛋底夠厚，唔會食幾啖就冇曬蛋，蝦仁粒粒都大粒，配埋少少微甜既醬汁好好味。而且套餐有包埋豆漿，唔驚冇野飲。…查看更多

之前經過見到呢間日本麵鋪門面幾靚已經想試試。呢間鋪頭以醬油做賣點同特式整拉面同沾麵，所以叫左個醬油沾麵做午餐試試。沾面嚟到賣相平平，麵底份量普通，口感同出面食既差不多。餸方面佢淨係配左半隻糖心蛋，唔太豐富。最重要既湯底係有番啲醬油風味，不過有啲過鹹，唔飲湯淨係用嚟沾麵都係太鹹。湯入面有啲炸咗既小豚角，感覺有少少雞肋，佢係增添左少少炸豬油香味不過又食唔落口，唔知點食好。今次食完好口渴，事後要飲番好多水。…查看更多

早排見到呢間荃灣西站附近既法國菜西餐廳就入左去試。平時門口都會見到排曬長龍，趕時間既恐怕要諗諗先。餐牌入面既野食唔算好貴，而且餐廳裝修、格局唔錯，仲有少少露天位望住出面海濱景，影相打卡正。同朋友都叫左唔少野食，主食叫左卡邦尼意粉、蜜糖啤酒燒春雞配脆炸薯條同法式火腿蛋薄餅。3樣之中最好食係燒春雞，佢隻雞燒完一啲都唔鞋口，配蜜糖汁好香甜，食落有淡淡既啤酒香味，好唔錯。值得一提係佢啲薯條係蕃薯薯條，食落一啲都唔膩同濟。卡邦尼意粉creamy夠香，份量適中。法式薄餅老實講麻麻地，未食過諗住試下，食落覺得佢個軟薄餅皮底同啲餡唔太夾，同佢有陣少少既早苦焦味唔太啱我口味。至於甜品方面叫左expresso 口味既焦糖燉蛋同香蕉朱古力味crepe。個crepe 賣相好靚，香蕉配朱古力雪糕食真係好夾。焦糖燉蛋入面轉左expresso口味效果好好，咖啡香好濃之餘味道唔會好甜，值得一試。…查看更多

過左嚟大坑呢邊食lunch，就入左呢間鋪試下佢啲鹵水鵝。鋪位好細，不過快快趣食個lunch 都接受到既。叫左個鵝片雙拼飯，雙拼既餸揀左豬頸肉同沙薑雞，價錢65蚊左右。飯嚟到賣相唔算討好，不過佢啲餸份量唔少，個飯都算豐富。鵝片啲肉唔鞋，滑得嚟又夠冧有肉感。豬頸肉一般，沙薑雞唔錯唔會全部都係骨。另外個飯其實會有埋鹵水豆腐，變相個飯其實有4樣餸，好滿足。一樣特別既係佢呢度隻鹵水汁好野味，比其他鋪頭野味好多。…查看更多

之前有見過其他人介紹呢間小店就嚟左試下。鋪頭係一對日本夫婦開既，位唔多，外賣買番屋企食可能會比較理想。自家製漢堡係呢度既必食之選，另外我地仲叫左糖醋青椒炸雞飯。個飯嚟到老實講佢用外賣兜裝唔太好睇，不過佢啲野食好高質，真係冇嚟錯。漢堡飯配咖喱汁好夾，咖喱汁唔算突出，但係漢堡扒真係好香口，每啖食落去啲肉香肉汁出曬嚟，另外加配左條雞肉腸都好野味，平時唔食好多既朋友今次好快就清曬個飯。糖醋汁配炸雞又係另一個絕配，酸酸甜甜可以令炸雞冇咁膩。值得一提既係佢啲炸雞唔會好多肥肉油淋淋，但係佢啲肉又唔會好鞋好硬，雞肉份量又唔少，食完好滿足。呢間小店味道方面水準好唔錯，有機會想再食多次佢個漢堡…查看更多

午飯時間過左女人街呢邊食野，見呢間午餐花款都比較多，價錢合理，就入左嚟食。午餐價錢平均50幾60蚊左右，午餐嚟講唔算平不過佢啲野食係好食又多餸既。叫左個日式咖喱牛舌拼吉列炸魚柳飯，野飲叫凍茉莉綠茶。飯都算大碗，男仔一般都唔會唔夠食。佢啲牛舌大塊夠冧，加埋咖喱汁唔錯。吉列魚柳夠脆，入面塊魚同平時出面食既唔多大分別。綠茶普普通通，冇咩特別comment 俾到。整體嚟講個午餐算ok，呢個價錢下既質素算唔錯。環境算正正常常唔會好逼，Lunch 時段係唔錯既選擇…查看更多

同屋企人喺深水埗呢間茶餐廳叫餸食飯。呢間好多街坊都有食開，喺區內幾乎個個都識。入邊環境真係比較窄，同埋噪音真係比較多，所以一般都係食吓晚飯唔會坐得好耐。我哋叫咗四樣餸，分別係：椒鹽九肚魚、生炆班頭腩、薑蔥蝦雞煲同埋馬拉盞鮮魷炒芥蘭。四樣餸都好惹味，而且都足料大份，十分抵食。特別係椒鹽九肚魚，啲魚新鮮炸，炸到好脆椒鹽又香口。鮮魷炒芥蘭入面有好多鮮魷，冇偷工減料，同埋啲魷魚煮到啱啱好，又鮮又彈牙。班頭腩好大碟，啖啖魚肉好正。整體嚟講抵食又大份，水準又唔錯。不過，環境上真係又窄又嘈，坐唔得耐。…查看更多

天氣凍成班朋友約埋一齊食蛇，上網搵到呢間d菜式花款較多就揀左呢間食。鋪頭主要都係舊式裝修，同其他蛇鋪差唔多。入面位置唔多，預先打電話book 位會穩陣啲。菜式花款上呢間真係多，而且味道水準都一流。我地幾個人食叫左都唔少款式，除咗最基本既蛇羹同糯米飯之外，我地仲叫左薑蔥灼蛇皮、炸蛇丸、椒鹽蛇碌、蛇雞煲同蛇腩煲煲仔飯。蛇羹好足料，成碗羹入面擺滿曬蛇肉，勁豐富。糯米飯炒得好香，乾身得嚟又唔會油膩。薑蔥蛇皮食落好有肉感，蛇肉口感韌韌地幾得意，同埋唔會用太多調味料蓋過陣蛇味，值得試。炸蛇丸新鮮炸好香口，食到除左蛇味仲有淡淡果皮味，食完一粒又想再食多粒。有朋友覺得椒鹽蛇碌雖然好惹味香口，不過調味料重手咗啲，蓋過咗啲蛇味，食落都唔肉食緊蛇。蛇雞煲一定要食。入面係雞肉蛇肉兩溝，雞煲汁勁惹味，配飯配生菜都勁正，而且都好多肉，一定夠曬飽。蛇腩煲仔飯煮法有啲似福建炒飯咁，係啲白飯底上面鋪滿蛇肉、冬菇、蓮藕同芡汁。個汁甜甜地幾夾蛇肉，飯底煲仔上少少飯焦好唔錯，都係必食之選。整體嚟講呢度食蛇花款多同埋都好味有特色，上菜都快。最後埋單5個人每人食左兩百幾。…查看更多

午餐時段周圍都排曬隊又要等位，最後去左呢間坐低食。餐廳空間唔算細，啲枱夠大位都好坐舒適。餐廳主要食麵食，都好多花款配搭選擇，有麻辣湯有冷撈有熱撈面，餸果方面有辣子雞、酥肉、手撕雞、五香腩肉等等，湯底同餸方面都有d特式，同出面其他麵鋪有d分別。我叫左辣子雞酥炸肉米線配麻辣湯底，碗面勁快就整好到左。湯底夠辣同香口，唔會太淡，米線底好厚唔會食唔飽，雞同炸肉好好食唔會又鞋口又韌，成碗面整體感覺好唔錯。另外餐有配特飲俾我地，特飲款式多而且有花d心思，見有黑糖珍珠豆漿、薄荷朱古力、熱柚子薑茶等等，最後揀左柚子薑茶。杯薑茶重薑味好正，加埋少少柚子吊味好好飲，不過茶同面兩樣都辣未必好夾，下次叫番凍飲朱古力可能會好啲。…查看更多

係佐敦行開隨便揀左呢間麻辣米線食晚餐。普通茶餐廳格局，叫左碗牛肉河粉，麻辣要小小小辣，另外加杯豆漿。野食好快就嚟到，豆漿都夠凍夠味，配辣面啱啱好解到辣解到渴。河粉個粉底一般般，有d太粗又唔係好入到d麻辣湯味，或者下次揀番米線會好啲嘅。個麻辣湯底略嫌唔夠香口，而且唔太麻，得d辣味，個人認為差過出面既麻辣。:(整體嚟講碗面普普通通，份量都夠嘅，不過我會選擇食其他鋪頭嘅麻辣湯面多過呢間。…查看更多

餐廳係希雲街附近，果頭午餐時間好多人要等位，咁啱有位就入左呢間食。坐既位唔多，有少少逼，主要都係打工仔快快脆脆食完走人。叫左紅咖喱牛肉飯配凍檸茶。凍檸茶普普通通，一般水準。咖哩牛肉飯份量正常，風味同出面有少少唔同，加左少少唔同香料都幾餸飯，牛肉唔銀亦唔算少。餐牌另外有個黑椒牛柳粒石頭鍋飯，睇落好唔錯好豐富，下次打算試試…查看更多