lazym的个人专页

因為是生日，所以一星期前已經book位，當時仲用咗WhatsApp confirm，已經喺WhatsApp嗰度提咗係生日，仲問可唔可以寫字，當時餐廳回覆話只可以寫Happy birthday，但可以加名，我已即時在WhatsApp提供埋名俾佢，佢哋亦都覆咗我表示ok.以為係高級餐廳，一切都冇問題，點知真係非常失望，上甜品嗰一下，店員講咗一句”你哋嘅食物已經上齊，請慢慢食”我嗰下真係呆咗，說好的Happy birthday呢？ 然後我即刻同個侍應講話無咗happy birthday! 佢話去睇睇，等左一陣先有個侍應拎住個碟仔寫住happy birthday(有件cake仔係上面), 但完全忘記寫個名，好明顯完全忘記咗！食物方面，不過不失，但無諗過一心慶祝，會有一個咁差嘅體驗，連request咗寫happy birthday 都可以完全忘記。如果各位係想慶祝而揀呢間餐廳，唔好expect 任何野。…查看更多

見到價錢比起舊舖已經貴咗好多，而且已經無咗米芝蓮，入到去先發現要比每位$8茶錢，仲要加一！叫一個炸醬麵已經要$69，又食唔飽。雖然佢唔係難食，但真係對唔住佢價錢！…查看更多

食物質素不錯，但就像大家的食評一樣，服務非常差！好難想像比成200蚊一個lunch，仲要比個著便服嘅waiter(唔知係咪經理)用不好的態度對待，仲衰過茶餐廳，我以為係我自己敏感，點知上openrice先發現咁多人都話態度好差！…查看更多

朋友介紹呢間餐廳話好適合打卡又坐得舒服，咁我就同幾個朋友去試吓。講真，間餐廳真係好靚，食物都好適合打咭，岀黎個賣相係好吸引嘅！但係佢份量偏小而且都幾貴，而且真係唔算做得好岀色。特別想講楊枝甘露梳夫厘班戟($128未加一)，無楊枝甘露嘅感覺，只係好似獨立咁加咗小小芒果，柚子同西米上去，但其實唔係太有楊枝甘露本身嘅味道。只係食到配料同班戟本身嘅味道，如果賣到呢個價錢我就未必會食佢。如果想打咭，呢到真係可以一去，但性價比就唔高。…查看更多

同同事黎試下呢間新餐廳，見佢咁多人以為好好食，但真心唔值呢個價。我叫咗個串燒六盛，有湯有前菜有飯同茶，加野飲要再加錢。食得飽，但唔係特別好食。個冬菇燒得算係好，唔會太乾身，咬落仲有少少汁。但其他真係唔ok，串燒嘅醬汁好重要，佢啲肉根本唔夠汁，要自己加豉油先夠味，個免治雞肉串好鬆散，食落無乜咬口，雞軟骨同雞肉好似唔太混合，有待改善。雞翼還好，因為係鹽燒，所以唔存在唔夠醬汁嘅問題，但如果加埋要接近兩舊水真係不會揀。最大問題係你一食完就催你埋單，我地坐左一個鐘都無，會唔會急咗啲？…查看更多

前幾日同朋友行過旺角見到呢間小草十八怪石鍋米線，見到價錢唔係貴，又諗唔到食咩嘅情況下就入咗呢間餐廳，估唔到性價比又幾高，而且幾好食又可以自己煮下，幾過癮！叫咗兩個石鍋米線，一個六餸，一個三餸，注意返原來要六個餸以上先可以自己煮㗎！◽️封門牛肉、翡翠苗、十八怪照通炸醬、五香辣豬軟骨、紅燒牛肚，大腸湯底: 柴火麻辣湯封門牛肉就比較失色，好普通，你當佢普通牛肉咁會好啲。翡翠苗同十八怪照通炸醬強烈推薦！翡翠苗唔多地方可以食到，值得一試。另外佢嘅炸醬肥瘦比例適中，好惹味有特色！絕對唔係平時食米線嗰種普通炸醬！至於個湯底都好夠味，但唔食得辣真係唔好試！◽️黑毛豬豚肉片、翡翠苗，蟹柳湯底: 火腿瑤柱肉骨湯我比較懶，就算有得揀自己煮我都會揀成碗上😂豚肉片同蟹柳都係正常野無乜特別，不過個湯底就好夠味，真係會想飲多兩啖。餐廳要上一層，比我想像中靚同坐得舒服，而且價錢唔貴，兩個餐連飲品都係$131，絕對值得再去！…查看更多

好少喺佐敦行到咁入食飯，原來行入啲都有好多好正嘅餐廳！今日呢間就岩哂打咭喇！佢有別於一般cafe，食嘅都係fusion 菜，幾得意，佢嘅飲品都高質，叫杯嘢飲打下咭都唔錯架！◽️CALCUTTA $138CRISPY BUTTER CHICKEN |CORIANDER SLAW I MASALA WAFFLES第一啖就食到濃烈嘅印度香料味，而且個雞都嫩滑嘅，配落平時作為甜品嘅窩夫到都幾得意，鍾意食印度菜嘅朋友都會啱食！◽️SUEZ $148DUKKAH SALMON IDILL & COUSCOUS SALAD三文魚煎得啱啱好，無腥味，個魚皮帶點脆身，值得讚一讚。中東米焗雜菜沙律就比較特別，第一次接觸，食落覺得味道好複雜，可能因為用咗不同調味，幾特別。◽️麻辣蓮藕片 $72最推薦係呢個，用蓮藕做到Nachos嘅感覺，配埋佢嘅肉醬真係好啱做小食。◽️焙茶鮮奶 $50好飲！！茶味好岀！但比較細杯，性價比就差啲！◽️玄米茶鮮奶 $50朋友話都好飲，但同上面一樣，性價比就差啲！簡單總結，食fusion嘅cafe都幾有gimmick! 可以一試！…查看更多

又到星期六喇，但近幾日天氣好反覆無常，諗唔到去邊玩好，咁啱碌電話見到呢間餐廳就去試下，好好彩地walk in 唔洗等就有位，仲要係打卡嘅窗口位，出面仲見到有人玩梗水上活動，感覺都幾chill。環境真係冇得輸，不過食物就冇乜特別啦。波士頓龍蝦多士$238龍蝦包同蝦多士就聽得多，但係龍蝦多士就未試過，所以就叫嚟試下。個包嘅材料其實都幾簡單，基本上剩係得龍蝦同埋椰菜花，配上淡淡的芥末醬，唔會搶咗龍蝦嘅鮮味。不過$238嘅價錢就比較貴啲，都係食返龍蝦包開心啲。慢煮雞胸芝士黃薑意大利飯$208呢一個飯真係唔值得試！因為根本上就係一個多汁嘅咖喱雞飯，真係冇嘢好補充。雞胸係一條條嘅雞柳咁，冇特別，如果佢個名冇加”慢煮”嘅話，我會冇咁失望。炭燒榛子鮮奶咖啡我諗佢改名做”榛子鮮奶咖啡”會好啲，完全冇炭燒味，得個甜字，正如個雞胸飯一樣，如果佢個名冇”炭燒”嘅話，我唔會反白眼。…查看更多

同朋友食個happy friday lunch，揀咗呢間小店試下，本身以為冇乜人幫襯，點知過咗陣就爆咗場！舖頭唔算大，但都坐得舒服，仲設有室外座位。同朋友喺All Day Menu叫咗兩樣嘢share，同每人都加咗$20跟薯條同嘢飲。牛排芝士堡 $88呢個牛排芝士堡都比較多人買，所以叫嚟試下。佢個法包好脆，牛肉似係肥牛咁，一片片，唔係平時食嘅漢堡扒咁，朋友話加咗芝士都唔會好滯，配埋洋蔥剛剛好！薯條係即炸嘅，配上惹味嘅辣粉，食到停唔到！手撕油封鴨脾三文堡 $78見到有鴨脾已經覺得好驚喜，因為唔係好多地方有鴨脾食，所以真係要試下。果然冇失望，鴨脾好多汁，好嫩滑，改變咗我對鴨肉嘅印象，因為平時食鴨肉都有啲鞋。佢配咗甜甜酸酸嘅柚子醬汁，完美中和咗油鴨脾嘅油膩感。真係值得一試！…查看更多

一直都好想試下呢間餐廳，原因係佢嘅 cocktail 好吸引我，首先感謝同行朋友令我可以試哂我想試嘅cocktail 🙏🏻佢嘅cocktail 好有誠意，盡量都會帶一啲東南亞嘅風味。以下係我對cocktail 嘅個人感覺，非專業。▫️KUMQUAT MARGARITA $138呢杯酒用另一隻酒代替conintreau，成個感覺都唔同哂，加左少少柑桔嘅味道，由傳統既鹽邊改做話梅粉，飲落就係先酸後甜，同本身傳統嘅margarita相比係兩樣感覺！試意推介！▫️SHISO MOJITO $128用紫蘇葉取代薄荷葉，紫蘇葉感覺好岀，mojito 本身應有嘅青檸味飲唔岀，同傳統mojito都係唔同嘅感覺，但同樣比到一種清新嘅感覺。如果鍾意紫蘇葉嘅味道，應該都會鍾意呢杯 cocktail。▫️DURIAN KISS $98賣點係用咗泡泡煙槍，可以話多左少少香氣，但都係玩味重，職員會叫你用鼻尖篤爆個波，打咭就岩哂！本身係榴槤愛好者，但唔好Baileys，所以感覺都係有少少失望，係有榴槤味，但成杯酒口感太rich，同朋友純飲嘢嘅時候飲都ok接受到，但食飯就完全不夾。▫️AWAKENING EARL GREY$138酒感好重嘅一款cocktail ，我自己覺得同earl grey好似格格不入，飲落帶少少花香味道，但酒感太重，唔太岩我口味。另外，因為佢用左煙燻增加香氣，比起一般嘅cocktail更有特色，所以都係好岩打咭用！▫️大蝦沙律 $148大蝦夠彈牙，沙律菜都新鮮，但個醬汁就略嫌唔係太夠。▫️黑椒帶子海鮮闊麵$178帶子同麵都帶有好重嘅黑椒味，每一啖都帶少少辣，夠晒開胃！▫️炸饅頭配咖央 $88熱辣辣嘅炸饅頭加埋佢嘅咖央醬又幾夾，不過就得6隻，而且體積比較小。▫️香腸拼盤 $198無乜馬來西亞風嘅感覺，就普通香腸拼盤，用嚟送酒幾好架。▫️麻辣雞肉串$78好辣呀！平時食雞煲食到小辣嘅我要狂飲水！鍾意食辣嘅一定要試吓！當日好熱但indoor已經無哂位，我哋都諗咗好耐坐唔坐出面，最後都照坐。感覺都唔差，仲有少少似去左馬來西亞嘅感覺。而職員都非常有禮貌，會介紹下唔同嘅酒同食物，就算唔識飲酒都可以揀到杯岩你心水嘅酒！…查看更多

肥仔海南雞分店有咁多唔係浪得虛名！價錢公道味道又好，落雨食lunch 嘅好選擇！我揀左無骨海南雞，仲加左$5轉左冷麵。但個冷麵好夠汁，基本上唔駛要餸都可以食得哂，加左麻醬，配埋青瓜，就咁當佢係冷麵，夏天食真係唔錯！不過唯一唔好就係份量不算多，有時肚餓起上黎都唔夠。點餐時，店員都會問你要不要加$6轉雞髀，我今次就無轉，不過雞髀就會滑少少，我有啲朋友就好堅持要髀。無轉髀就會係雞胸同雞翼，份量都對得住價錢！…查看更多

做咗Ruby Tuesday 會員都有一段時間，今日喺Timesquare行完街就嚟到呢間新開冇幾耐嘅分店試下。吞拿魚他他呢個係佢地嘅新菜式，加上淨係聽過牛肉他他，冇聽過吞拿魚他他，所以一於試下！第一個感覺係個擺盤好靚！食落好重日本醬油味，所以一時之間個腦tune唔到，因為明明係食梗西餐，幻想會用上西餐嘅調味料，依家就好似變咗食日本菜咁，感覺好有新鮮感。吞拿魚下面係牛油果，牛油果唔會過熟過淋，同吞拿魚幾夾，惹味又健康。特級西冷扒朋友話Ruby Tuesday 嘅牛扒係冇得輸嘅，佢揀咗medium rare同配磨菇汁，但今次啲汁就比較少，同埋好似俾咗medium 我地，不過都好淋，一啲都唔靭。個焗薯又係必食嘅，上面有芝士煙肉牛油同sour cream，雖然會好肥，不過咁好食，就算啦！…查看更多

放工同朋友係附近揀左一間串燒店試下，佢嘅location 比較偏僻，但真係好好食，又唔係貴！最鍾意係佢嘅蜜糖燒菠蘿，夠晒甜！而且佢切好咗，令食客食得好方便！值得一讚！佢每一樣嘅串燒都好好食，特別係燒秋葵同燒蘆筍，因為我成日覺得食串燒會食太多肉，估唔到呢到有咁多菜可以揀，而且好入味！當然唔少得燒茄子，都係好入味！至於佢嘅肉類都一定唔會令你失望，款式種類非常多！一路飲住啤酒一路食串燒真係好正！呢到又坐得舒服，岩哂同一班朋友一路傾計一路食！…查看更多

添好運呢個名一定唔會陌生，以前仲因為佢係平價米芝蓮而成日食，不過近年都冇乜機會食，今日做完野去飲個下午茶，雖然一樣咁抵食，但好似就有小小跌咗水準脆皮班蘭炸鮮奶同鮮蝦腐皮卷係我最推薦嘅點心！而家做到鮮蝦腐皮卷嘅酒樓唔算多，呢間仲要炸得好食，咬落仲有蝦肉，真係好難得！而脆皮班蘭炸鮮奶就比較特別，冇乜地方可以試得到！不過我估呢個都應該係佢哋近年嘅新菜式，記憶中以前係冇㗎！其實計埋個價錢，我真係無乜好挑剔，但你唔好諗住以食米芝蓮嘅心態嚟食，否則你有機會失望…查看更多

放工行K11見到呢間舖，俾佢個舖名吸引咗，就買咗佢果杯熱伯爵朱古力奶試下 $38，聽到呢個名都覺得好吸引！自己本身好鍾意伯爵茶嘅味道，再加埋朱古力奶，真係一個perfect match呀！呢杯都係其中一款舖頭推薦嘅飲品。見佢用3.8牛乳整已經好期待，岀面都唔多鋪頭會標榜自己係3.8牛乳，所以覺得呢個價錢係值得嘅！聞落好香奶味，仲蓋過咗佢個朱古力味，飲落唔太甜，after taste先係伯爵茶味。絕對值得再飲！…查看更多