626uituit的個人專頁

響九龍灣返工，星期五下午同同事食飯，本來想去旁邊食泰國嘢，但 booking full 曬結果轉去旁邊呢間。點嘢嘅時候，menu 有寫住有蒸飯、羽衣甘藍菜肉餃、湯麵，9 個人睇完 menu，決定曬，點菜嘅時候侍應先話，冇蒸飯、冇菜肉餃。好，即轉，點完唔到一分鐘，響廚房出返嚟話：冇湯麵。等咗 10 分鐘，嘢食開始到，不過啲組合亂七八糟。叫口水雞菜飯嘅同事收到口水雞蔥油撈面；叫珍珠菜肉雲吞拼魚蛋米線嗰位就收到碗冇魚蛋嘅米線。同樓面反映，佢仲話：「我叫佢拎走幾隻雲吞先。」擾攘一輪，我叫嘅嘢終於嚟齊。牛筋腩蔥油拌麵個麵同撈汁（甚至腩汁）都淡而無味，生菜鯪魚球食到有碎骨，不過好在未有割親喉嚨。唯一可取嘅係個「夠薑薏米水」，啲薑嘅辣味幾出。一路食，身邊其他食客「唔該有冇乜」、「呢樣又冇吖」等嘅聲音此起彼落，我諗呢間餐廳不如直接改名做「伯母餐廳」比較好。…查看更多

一直以嚟對熟食亭嘅印象停留響大排檔常餐之類嘅食物，但上週末同女友去咗大衛美林邨熟食亭之後大開眼界。我哋想食完飯去沙田文化博物館，但沙田新城市個場又人滿為患，所以決定由大圍食個飯，然後慢慢行過去。經過幾間熟食亭一睇！日本嘢？價錢又相宜，不如食呢間。首先叫咗啲小食：螢光魷魚仔：入口鮮甜鱈魚乾：上檯之前明顯加熱過，蒸走啲水氣，熱辣辣，脆卜卜！點埋蛋黃醬，好食！入去餐廳見到 Menu 已經覺得呢個角切魚生飯嘅價錢好吸引！$35！真係 AEXN、SXGO 都做唔到呢個價啦！一於叫嚟睇吓乜料！食落，非常好！魚生嘅份量唔少但新鮮，仲要只得少量三文魚，最少仲有吞拿魚！不過點心嚟嘅，之後同女友再 Share 咗份銀鱈西京燒。燒魚嘅火候剛剛好，拎嚟送飯真係一流！因為叫多咗小食同唔係餐嘅銀鱈西京燒，所以呢個 Lunch 嘅人均消費貴咗少少。但係睇返佢個 Lunch Menu，其實真係價錢實惠，值得去食！…查看更多

一直以嚟都好喜歡食川菜，但係平時去開嘅菜館動輒消費都三幾百起跳。聽聞銅鑼灣金鳳附近有間新開嘅川菜館，入面嗰廚師仲係嚟自成都嘅，於是 Call 埋班食開辣嘅同道中人，一行七人去開餐。餐廳以三國演義做主題，菜式名字用咗唔少三國故事名做命名之外，連茶杯都係用仿古高腳杯，幾有特色。冷盤叫咗蒜泥白肉同口水雞，蒜泥白肉個辣響中間嗰團白色嘅蒜泥度，一咬落口有青瓜有肉唔覺辣，但係當蒜泥留響口腔，就感覺到陣陣辣味。口水雞嘅雞係用春雞，相對比較細隻，不過雞肉嫰滑，小小哋當點心。食川菜唔食水煮嘢總會覺得差少少，所以首先叫咗水煮桂魚片同水煮牛。第一轉，兩個辣度都係普通嘅。一般嚟講，香港嘅川菜館都會遷就香港人口味，將辣度下調，普通即係下調後嘅辣度。水煮湯汁內有薯粉、芽菜、青瓜，水煮魚嘅魚食落有少少麻，但係唔太辣。相反水煮牛嘅牛肉就好入味，而牛肉汁又滲到落個水煮汁度，令成道菜更好味。食完第一轉普通辣度嘅，立即同侍應話要追加。全台人一致通過要追加水煮牛，中辣。另外由於水煮牛入面嘅薯粉太好味，所以要求加底（加多 $32）。呢個時候侍應仲講笑話，你要加乜都得，午餐肉都得。不過我哋當然唔會糟蹋呢份咁好食咁有水準嘅水煮牛啦。中辣係辣過普通辣度嘅，朋友們開始食到有啲反應，流嘅汗更加多。不過由於在座眾人都有去成都出差嘅經驗，都仲係覺得同成都嘅辣度差少少，決定下次再去要食大辣。平時響香港食開川菜，埋單每人三幾百起跳，不過今次收到張帳單認真驚喜，七個人食咗咁多嘢，每人圍起只係 $230。性價比咁高，值得推薦，我哋全台人都話一定會再返去挑戰大辣。…查看更多

趁假期同女朋友去老夫子餐廳食個晚飯。細個去睇醫生、牙醫，診所總會有一疊老夫子畀我慢慢睇，久而久之一啲經典嘅標題，例如《耐人尋味》、《出神入化》、《膽大包天》等均朗朗上口。配合餐廳主題，餐廳放咗老夫子同佢幾個好朋友嘅人像響度畀大家拍照，即使擺咗成年幾個角色依然保養得幾好，望落相當新淨。菜單上所有嘅菜式都用咗老夫子嘅經典標題命名，好彩每種選擇下面加返解釋，否則每碟都變《耐人尋味》。長假期之前想食吓肉，所以決定叫個鐵板牛柳餐，配埋湯同特飲，於是決定叫埋南瓜湯同波羅黑鑽石特飲，另外再叫個焗田螺做小食。特飲波羅黑鑽石，個杯上面嗰舊棉花糖認真過癮，好似以前去嘉年華食嗰啲咁。一倒支雪碧落去棉花糖就溶落菠蘿同涼粉度，甜上加甜。提提大家，呢杯嘢嗰舊棉花糖會搞到張痴笠笠，點咗之後檯面記得唔好再放手機，否則有排清理。焗田螺，有少少估唔到田螺已經剝咗殼，下面嗰舊係蘑菇嚟。個薯蓉牛油味好香濃，好好食。南瓜湯味道濃郁，而且湯水亦相當濃稠，感覺好飽，所以同女友兩個人分咗佢。黑椒牛柳（Medium），牛柳外層煎得香脆，切落去仲有肉汁，咬落又有肉香，相當好吃。在餐廳內食嘢，除咗食物外，當然要欣賞吓呢度啲裝修。好多老夫子嘅經典漫畫都拎嚟曬大咗整玻璃或其他裝修，亦有立體古董跑車模型卡位，值得慢慢欣賞。…查看更多

位於鰂魚涌基利路（實際上近康怡出口）嘅屋台屋係東區老店，響基利路超過 20 年。午市光顧，入座即有日式蒸蛋（好似只限頭唔知幾多位），蒸蛋嫰滑，可以一邊食一邊慢慢睇餐牌。套餐好有特色係一份主食 + 一份小食，主食有拉麵、烏冬等可選擇，小食可以選擇沙律、刺身飯、壽司等多款不同菜式。通常我唔想諗太多，就會食醬油拉麵 + 刺身飯。醬油拉麵湯底明顯飲得出冬菇、鰹魚的味道，醬油不會太濃掩蓋了那種鮮味。湯底的平衡做得很好。至於叉燒，該店曾使用滷豬頸肉做叉燒，但近月重新使用五花腩捲成圓條狀的叉燒，肥肉入口即溶，相當好吃。如果響鰂魚涌、太古，想搵間靜靜地又有質素嘅餐廳，不妨考慮去屋台屋。…查看更多

數碼港位處港島一隅，一向是港島人嘅後花園，泊車去商場然後去戲院睇戲，出外面行陣公園，咁就可以消磨大半日。不過數碼港一向問題就係缺乏比較似樣，價錢又合理嘅餐廳，因此睇戲之外食嘢就要走返出去。今日又係過去睇戲，見酒樓旁邊開咗「金記客棧」，於是睇完戲，食埋飯先走。呢間嘢特別在有燒味供應，於是例牌叫叉燒切雞嚟食。叉燒肥瘦適中又夠滑，仲有小燭台響下面暖碟，吹多陣水都無怕啲叉燒凍咗，幾好。有兩份肉當然要整返份菜，蒜蓉西蘭花呢類簡單得嚟可以好大鑊嘅菜就最好。嚟到見到炒得幾靚，食落又唔覺好多油，唔錯。素食成為潮流，好多餐廳為照顧素食人士都推出咗素食碟頭飯，呢度都唔例外。上面食咁多肉，叫埋呢個碟頭飯，有番茄煮蛋有白飯，拎嚟送飯送菜送肉更開胃。整體而言，金記進駐數碼港係好事嚟，最少去數碼港睇戲後，唔需要走返出去食嘢，亦唔需要局食牡丹樓。…查看更多

同朋友去咗大尾督 Pataya 食泰菜，間舖嘅廚師全部泰國嚟㗎！首先叫咗一道「芭提雅酸芒骨香魚（$188）」，廚師將條魚起骨拆肉，炸完再放返落碟，旁邊再配酸芒沙律。將沙律同魚一齊食，酸酸哋唔會覺得油膩。另外，即使濕濕地嘅沙律同炸魚擺埋一齊，都唔會搞到啲魚濕曬，一 pat pat，廚師有留意到呢啲細節，想當值得讚讚！食嘅另一道菜係「泰式曹池珍寶大頭蝦」（$228 兩隻），開邊後加入紅咖哩醬汁，相當惹味。隻大頭蝦真係成隻碟咁大隻，啖啖肉。（唔係龍蝦嚟，我對龍蝦敏感，一食就會痕，但係都食得呢隻大頭蝦！）食泰菜，冇冬蔭功湯總會好似差少少咁，所以一於叫埋個湯。睇返入面啲料，蝦殼相當大塊，應該係用大頭蝦熬出嚟，另外亦相對足料。…查看更多

推門進入金記冰室，淡綠色的檯面、靠牆的高背卡座、馬賽克紙皮石地磚，還有一句「歡迎入內 冷氣開放」，整個環境已經把我帶回 70、80 年代。既然懷舊，於是從乒乓球拍上的菜單中選擇了保衞爾牛肉汁和咖喱斑塊農夫包。保衛爾牛肉汁（Bovril）是以前茶餐廳供應的一種經典飲品，以含牛肉成份的調味料開水而成。自英國爆發瘋牛症，牛肉產品絕跡香港後已難以一嚐。現在金記提供的牛肉汁是以酵母萃取物製成，大家可以無懼瘋牛症，放心飲用（適合素食人士）。牛肉汁的味道是否好味，實在見仁見智，我覺得有點像喝涼茶的味道，可以一試。主菜嘗試咖喱斑塊農夫包，餐廳非常貼心地把農夫包一分為二，上半可以慢慢切成小塊，點著旁邊的咖喱汁吃，下半則可以用麵包夾著咖喱、斑塊、炒飯一起吃！一道主菜，雙重享受。咖喱汁住得相當濃稠，很香，不辣，相當適合伴麵包吃。今次點的食物沒有令我失望，甚至更有驚喜，以後希望再去試試其他菜色。…查看更多

久仰其名，與女友去鴨寮街買物後，從深水埗步行前往位於荔枝角道的美味餃子店。到達店鋪的時候約八時半，剛巧有客人埋單離座，稍稍等員工收拾檯面後便能坐進去。在店內，看見兩位員工忙著包餃子，貨如輪轉，賣完一盤又一盤，果然名不虛傳。剛想叫馳名的白菜餃，但是已經賣光，只好退而求其次，叫了一客韭菜湯餃及椰菜雲耳煎餃。先到的是湯餃，湯底是野葛菜湯，喝一口湯已經嚐到淡淡的野葛菜味。再吃餃子，餃子的皮煮得剛剛好，一咬就破，咬破之後肉汁徐徐流出，與菜湯湯底混為一體，更覺鮮甜好味。吃完一隻沒加調味的餃子，立即再來一隻。這次薰一點醋，沾一點辣醬，開胃醒神！吃過幾隻湯餃後，剛煎好的椰菜雲耳煎餃便端了上來。金黃色的餃子煎得剛剛好，不像拉麵店的餃子總是燶得黑了一大片。可惜可能煎餃的油用得比較多，餃子的皮煎著煎著變得有點像炸，結果皮有點韌，有點硬，很難才咬得開。豬肉混了椰菜和雲耳，咬下去偶有雲耳的口感，非常特別。在湯餃與煎餃之間，我會選擇湯餃——店鋪用的湯與餃子相當匹配，清清淡淡，簡簡單單的晚餐就可以了。吃太多的油會很容易變胖。…查看更多

幾個月前已經去過博多一幸舍吃原味豬骨拉麵，昨日看完電影 10:00 左右四處找吃，餐廳關門的關門，某快餐店也沒有火鍋供應，附近某名牌拉麵店亦大排長龍，於是再度光臨博多一幸舍。既然上次吃過原味豬骨拉麵，這次決定品嘗他們的特別款式——黑拉麵和赤拉麵。赤拉麵是在拉麵店的湯底上，淋上明太子油。豬骨湯加上魚香，還有一點點辣味，更開胃更醒神。以前直接食明太子，可能明太子的品質不好，總會有一點淡淡的腥味；本來點這個赤拉麵的時候也有此擔憂，但當拉麵來到面前，飲了一口湯，擔憂便一掃而空。建議進食時可加上檯面放著的紅薑絲和蒜蓉，消除那種油油的感覺。吃過赤拉麵後，意猶未盡，於是幫女友完成她點的黑拉麵（吃完辣東西後有徹底喝水消除辣辣的感覺，以示公允）。黑拉麵是在原有的湯底上加上黑芝麻醬，跟平常用來拌沙律的不同，這是黑芝麻醬。實際上感覺有點像把芝麻糊加到湯底上（不過是鹹的）。未吃拉麵先喝湯，湯一進口腔已經嚐到濃郁的芝麻香味，可惜回甘卻帶有一點炒燶了的味道（這個味道同煮芝麻糊黏底後一樣），這點令芝麻豬骨湯大大扣分。由於黑拉麵最重要的湯底不好，只是隨便把麵和叉燒吃了填飽肚子就算。假如黑拉麵沒問題，味道方面我會給它 5 分；現在因芝麻湯底扣一分。如果從赤、黑兩者中二擇其一，我會選赤拉麵。…查看更多

公司在太古坊，為歡送同事，我選擇了位於船塢里東達中心的「囍點」。去「囍點」可以叫套餐，也可以叫小菜。但為免同事們出現「選擇困難症」，我特別預訂了人頭價 $85 的「神秘餐」。「神秘餐」必須提早預約，訂檯時餐廳會問你有甚麼不能吃（例如我因為敏感，特別聲明不能吃龍蝦和蟹），然後由餐廳方面安排，食客只要到時到候去開飯就可以了。先登場的是「麻婆肉鬆燒豆腐」，不太辣，很香，送白飯一流！用石鍋上相當保溫，即使在檯面放了一段時間還是相當的熱。然後是「蛋黃脆蝦球」，鹹蛋黃包著足料鮮蝦，咬下去兩者融為一體。有些食肆做類似的菜色，或許因為成本所限用的蛋黃相當少，但「囍點」的蛋黃醬很多，各位同事吃完後還有鹹蛋黃醬可以拿來送飯。胡椒脆香骨，有台灣夜市的風味。豬軟骨好咬口，夠牙力可以吃點豬軟骨。野菌雲耳扒菜苗和腰果野菌炒雞球也相當好吃。吃過小菜後，更奉送糖水雪耳木瓜糖水，雪耳膠質豐富，木瓜鮮甜，相當清潤。「囍點」其中一個賣點是食物不用味精，撰寫這篇食評是膳後半小時，未感到口乾、頭暈，我相信他的聲明是真的。要再去，我也會推薦「神秘餐」，直至小菜端上來前也不知道的神秘感相當好；而且價錢合理，例如今天我們 5 人去吃午飯，吃的小菜價錢每人大概 $83，但白飯、例湯、甜品的價錢均沒有算進去。把那些雜項加進去以後，大概每人要 $100，但現在只需 $85，抵食！加插一個笑話，侍應拿了蛋黃脆蝦球來，同事問她：「這是甚麼？」侍應答：「我也不知道⋯⋯」看來「神秘餐」神秘得連侍應也不知道呢 ^^…查看更多

睇過好多人盛讚新桂香嘅叉燒飯，專程過去試吓……一過去就有位坐，茶水任裝，唔錯……叫碟叉燒飯，送例湯面只不過收 $34 價錢合理不過叉燒偏瘦，好韌，好似食香口膠咁。我心目中好的叉燒應該係肥瘦各佔一半，叉燒肉皮脆而入口鬆軟，佢一點都做唔到。聽說叫肥叉飯啲叉燒會好啲，如果我畀機會佢，翻叮佢，應該會試肥叉………查看更多