為食貓夫人的个人专页

難得今日放假去富臨飲下午茶, 最鍾意佢既特價鮮蝦餃, 賣$11.8 確實係好味又抵食, 山竹牛肉 & 香麻流沙包 賣$8.8, 超抵食, 但服務就真係唔掂囉, 之前既食客食完走咗, 成張枱都未執就叫人入座, 等一大輪都無人執枱, 見到果堆碗筷已經有d 燥, 問侍應攞點心既價錢牌, 有個阿叔咁樣既侍應, 竟然指住點心紙上面既冧巴就係價錢, 喂, 你訓醒未呀?! 九唔搭八, 劃點心我都要知你賣幾多錢吖,需知富臨點心唔便宜過喎, 仲有最唔好既就係全場都要搭枱, 坐到逼逼挾挾, 周身唔自在, 好似要你食完即刻走咁, 另外好明顯係全場都唔夠人手做嘢, 就算點心味道好, 服務咁差已經打晒折扣啦~…查看更多

本來在今個月初生日, 但好友們話要同我做生日, 當然高興啦,餐廳左選右選都揀唔到,見到花旗咭有皇牌半價餐咁抵,就提早一個禮拜book 呢度,今晚入到餐廳內, 果然充滿德國風情, 8點鐘已經座無虛設,仲有歌手現場唱歌,氣氛熱鬧,feel so good~Order 咗指定款式既四人餐,半價後$799, 哈哈,四人餐真的每樣食物都有四件,唔駛爭,前菜有牛肝醬麵包,"發達芝士" 雞肉凱撒沙律, 辣味牛肉沙律, 呢個好有泰國feel, 仲有蟹肉pancake+煙三文魚, 唔錯呀 !至於主菜就有招牌咸豬手, 呢個又係必食,每檯至少都有一隻, 豬手做到皮脆肉滑,但感覺又唔太肥膩噃,牛扒既肉眼亦稔,味道佳,同黃芥辣係絕配,伴菜的蕃茄乾亦要一讚,小小一粒竟然蕃茄味極濃,比起新鮮蕃茄別有一番風味...還有蒜肉巴馬臣芝士天使麵及魚柳白飯, 呢兩款就普普通通, 無乜特別!今晚竟然有好多客人來慶祝生日, 生日蛋糕及生日歌在餐後陸續出場,將高漲情緒推上最高點,更加開心興奮,嘩! 見到好友們為我準備咁大個生日蛋糕,感覺好幸福呀,希望每年既生日都可一齊慶祝一齊玩~最後推介餐廳自家釀製既啤酒, 味道清純唔澀, 冰涼可口,加埋滿枱美食,又有得點歌, 超正, 一定會再嚟, 下次要再早d book 枱食tea buffet, 哈哈哈~…查看更多

位處厚福街新開飲食大廈9/F 內的 james' kitchen,見到試業期間有9折就上去試吓,到達後發覺餐廳既面積雖然唔係好大, 但陳設得優雅舒適,窗明几淨,感覺良好,服務員態度友善有禮; 午餐牌內大約有8個款式可供選擇,自己就揀咗磨菇忌廉湯及南瓜汁海鮮扁意粉,忌廉湯內竟然有大量磨菇蓉,好驚喜,意料之外,個湯又香濃又好味,誠意之作~到了主菜的扁意粉,熱辣辣的上枱,金黃色的南瓜汁配上多款海鮮材料,賣相精美吸引,窗外柔和的陽光加上餐廳內既環境,邊看書邊進食,好一個悠閒的星期六下午,真令人賞心樂事,食得美味又開懷~餐茶點了熱咖啡,但上咖啡之前, 友善的女服務員送來一件蜜桃撻,原來是包括在午餐內的,味道就沒有甚麼特別,最後的咖啡味道就穩打穩紥,沒有大驚喜, 但盛載咖啡的杯碟就很別緻,不過忘記了影相啊~整體來說,用$78 就可享用到咁美味又飽肚& 環境咁舒服既午餐,一定會再幫襯,希望佢地可以keep 住水準啦,不過晚餐的價錢就比午餐高好多了,大約每人需要$400 啦~…查看更多

見頭條日報有7 折coupon 咁吸引,咪約埋fd 去試吓囉,因為係walk in,所以只有門口位供應,餐廳內環境及侍應生的服務都只係普普通通,set lunch 有麵包餐湯,主菜可選豬柳,魚或蘑菇莧菜,甜品係開心果芭菲,咖啡或茶, $138+ 10%, 等咗一陣有得食啦,嘩~2 件豬柳乾爭爭咁,3件類似薯仔餅既物體又係咁乾,再加一少撮酸椰菜,點夠飽嫁? 見到已經無晒mood 啦,食落味道認真唔掂,到咗上甜品, 雪糕入面真係有開心果碎,但食咗兩啖, 咦? 點解有條嘢既? 吓! 唔係呀嘛, 廚房切雪糕磚果陣,竟然連包住雪糕既膠片都送埋俾我, 瞓醒未呀?話晒都係酒店餐廳, 咁差都得?離晒譜喎~叫咗個部長過嚟,佢話可以整多份俾我,或者在蛋糕櫃自選蛋糕一件,揀咗士多啤梨cake,味道普通,絕對無法與帝苑或者Park Land Hotel Riva 餐廳既質素相比較, 最後2人埋單$220.80, 咁既價錢同食物, 係尖沙咀區大把嘢揀, 試過一次都唔會再嚟~…查看更多

我fd 約過我去呢間咁渣既所謂餐廳食下午茶餐, 唉, 推得多唔好意思, 今日都要去一次都預咗呢間野好渣, 你行入去無人會發現你,坐低後都係無人發現你, 上手食完果個走咗, 又無人執枱, 都唔知咁多侍應係度做乜既 好嘞, 等到終於有人理吓我地, 仲衰過茶餐廳, 行嚟丟低張餐牌,執咗杯碟又唔見咗人我叫咗個茶餐 A, 黑椒紐西蘭牛仔柳飯+熱奶茶, 雖然話係茶餐, 但價錢就要 $25 + 10%, 一d 都唔平, 零服務底下竟然要收加一服務費, 簡直離晒大譜呀 等咗一陣就有飯食了, 碟飯既份量都算ok, 但杯奶茶就完全唔掂囉, 熱奶茶就真係 奶 + 茶, 製作毫無誠意可言, 求其得很, 喂, 大家樂同大快活既奶茶咖啡, 都會調配過丫, 人地 tea time 都係收 $6/杯咋如果只係自己出去食嘢,一定唔會再嚟囉 !…查看更多

之前係 新翠華 & 新成興試過唔掂既煲仔飯後, 繼續努力周圍尋找美味煲仔飯估唔倒近近地係屯門都有得食, 今晚特登去試, 叫咗個 廚師煲仔飯 $37, 包中湯 & 油菜, 加 $6 配凍檸茶, 等咗大約 15 mins 就有得食, 香噴噴出晒煙, 好似好正咁~打開煲蓋一睇, 嘩, 有臘腸啦, 潤腸, 臘鴨, 滑雞 & 排骨, 好多料喎, 落些少豉油, 試一啖飯, 有淡淡既臘鴨香味, 好好食, 白飯乾爽唔會 "濕立立", 食到尾仲有飯焦, 好耐無食過飯焦啦,暫時係試過當中最理想既煲仔飯, 哈哈, 好開心, 個中湯都幾好飲的, 煲得夠火喉另外仔仔叫咗 鐵板雜扒餐, $40 包西湯 & 冷熱飲品, 嘩, 個扒餐原來有牛扒, 豬扒, 火腿, 腸仔, 牛脷, 煙肉 同 薯角, 件牛扒竟然係脆邊的, 凍咗之後都仍然係脆既下次如果行開呢頭, 要再試吓其他食品同埋奶茶…查看更多

今晚係旺角學完整蛋糕, 行咗去佐敦廟街既新成興, 試過上次係銅鑼灣 新翠華既煲仔飯咁失敗之後, 再嚟呢度試食煲仔飯, 叫咗個 北菰滑雞飯 $38 + 可樂 $6, 都頗多客人, 係等候期間要我轉咗2 次位嚟遷就其他客第1 次要我轉位都無所謂, 但坐定之後又轉過就令人有點煩燥了講番個飯, d 雞都唔錯, 唔會淡茂茂咩味都無, 但個飯底就唔係好掂囉可能呢幾晚天氣凍, 多咗人食煲仔飯, d 米好似都未索夠水就拎去煲, 攪到d 飯好似得8 成熟咁, 硬既, 都幾難食, 暫時都未搵到一間好掂既煲仔飯 會趁住呢個冬天,繼續努力尋找一鍋 絕世美味煲仔飯 …查看更多

今日下午 4 點鐘要去旺角學整蛋糕, 知道呢間澳門翠苑咁出名, 順便嚟試吓, 叫咗個 常餐A, $28 有螺絲粉 + 鬆脆鮮油豬 + 熱咖啡先上咖啡, 真係並非浪得虛名, 果然夠晒香濃, 落咗兩包黃糖再飲, 好正之後到 螺絲粉, 好熱呀, 如果趕時間的話, 最好叫過第2 樣了, 因為要攤凍一陣至可以食, 味道唔錯嫁, 又大碗, 食咗好耐, 最終都係食唔晒要放棄,有點可惜重點要試既梗係 鮮油豬啦, 嘩, 好鬆脆, 又夠熱喎, d 牛油又在半溶化狀熊, 好正啊, 食完仲想食多個, 下次嚟到旺角要再食過 埋單時同老細傾咗幾句, 原來隔籬既 澳門大豐新翠苑係佢既第 2 分店, 青衣第3 分店係最新開張…查看更多

呢間千葉都開咗一段時間, 今日中午終於都 "的" 起心肝, 同仔仔去試吓, 點知第一次就變成無下次, 我叫咗碗 豬軟骨拉麵 $25, 如要烏冬就 $28, 手打烏冬就 $34, 咁係咪即是意味住 "烏冬" 係唔好食既呢?! 本來碗麵既賣相都唔差, 但一食, 嘩, d 麵稔到好似浸咗一晚 spa 咁, 試吓啖湯, 又油又無味, 輪到試豬軟骨, 仲衰, 又羶又硬, 全碗麵都無樣係掂既, 唯有淨係食晒d 麵啦, ; 至於仔仔, 佢就叫咗個 吉列豬扒定食, 好騎呢, 生菜上面已有沙律醬, 但又有芝麻汁喎, 都唔知用嚟點乜嘢, 塊吉豬咬外, 入面既顏色竟然係 "暗嗎嗎" 的, 好似雪咗成千年咁, 試食一啖, 照舊又係無味的, 好差, 另外又劃咗兩碟 三文魚壽司 $7/碟, 都係果句, 乜味都無, 呢間嘢話係午餐啫, 連飲品都唔包, 埋單之後仲要出去補飛搵嘢食, 總之就係 差差差 …查看更多

今日午餐又去了食櫻花亭, 睇吓佢今個禮拜既午餐有乜嘢食, 見到有湯烏冬, 咁就叫嚟試吓, 呢碗牛肉湯烏冬既配料同牛肉拉麵一樣, 都係有幾舊肥牛, 2 條蟹柳同椰菜,不過味道就差好多了, 牛肉無味, 烏冬好明顯係現貨,一d 都唔彈牙, "淋劈劈" 咁, 湯又淡, 好懷念以前 辛之葵 又彈牙又美味既豬軟骨湯烏冬, 好好味 …查看更多

15/10 下午鬼死咁肚餓, 打電話去辛之葵,諗住嗌外賣上門, 點知打極都無人聽, 後來見到佢地連招牌都無埋啦, 到22/10 就變身做咗 櫻花亭, 27/10 終於去試食, 叫咗 日式牛肉拉麵 + 蜂蜜綠茶 $25, 等咗無耐就有得食, 都幾大碗, 賣相都唔差, 除咗牛肉外, 仲有粟米粒同椰菜, 味道就不過不失啦, 但係夠食的, 之前辛之葵既堂食午餐份量好少, 每次都食唔飽的, 今次試食覺得都唔錯, 所以 28/10 再去試佢地既 燒汁吉列雞扒飯 + 蜂蜜綠茶 $28, 都好食, 如果多d 燒汁用嚟撈飯就更好, 侍應姐姐話午餐會每星期轉款,不過飲品方面就差d 啦, 跟餐的只有凍蜂蜜綠茶, 無熱飲供應,轉罐裝汽水仲要加 $3 添, 唔抵囉, 同埋間舖頭實在太細啊, 坐到 "迫迫劫劫咁", 連揹袋都無地方擠,如住在附近, 買外賣返屋企食會舒服好多 …查看更多

過咗咁耐, 而家先至有空寫食評, 話說果日突然間心血來潮, 想去元朗試吓呢間日式料理, 所以 join 埋仔仔係去試,呢度既午餐 $35, 包括前菜 刺身 及 拉麵 或 日式飯, 前菜既蟹子沙律, 如果 d 青瓜再切得幼身d , 會加更好食,午市時段十分多人, 雖然坐得比較迫夾, 但環境都企理乾淨,服務員既服務亦勤快, 食物份量又大,食到好飽,味道唔差,咖喱海鮮飯既 蝦好大隻 …查看更多

今日遇然間見到 小甜谷, 知佢地出名食 3.6 北海道牛奶, 揀咗一陣, 叫咗 麻蓉湯丸 $16, 等咗 15 mins 至上枱,有6 粒,但係乜咁細粒既?! 呷一啖薑茶, 哎呀, 好辣呀, 再試啖湯丸, 無乜特別, 真係普通過普通,到差唔多食完果陣, 見到廚房入面既哥哥, 係雪櫃度攞咗一底用膠托 托住既湯丸出嚟, 吓? 乜唔係舖頭自己搓既咩? 點解好似係現貨咁既? 另外見到同枱既客人, 叫了個 咖啡三重奏, 其實是 咖啡布甸+ 咖啡啫喱 + 薄脆, 細細杯賣 $27, 似乎貴咗 d, 如果遇然間經過的話, 一試無妨, 特登嚟試就無咁既需要啦 …查看更多

早輪見到有炭燒煲仔飯既報導, 好想食, 今日係 cwb 搵咗一輪先至搵到呢間完全唔起眼既茶餐廳,入到去第一個感覺, 乜咁污糟嫁, 成地都係垃圾紙張,地面又黐立立, 叫咗個 滑雞臘腸飯同凍檸茶, 冷熱飲都係加 $5, 等咗大約 15 mins 有得食啦, 嘩, 熱到出晒煙, 姐姐立即掀開蓋淋豉油再蓋番蓋嚟焗, 等咗一陣終於有得食啦, 試咗一啖, 個外貌咁吸引, 點知原來係唔好食的, 除咗陣陣炭燒味外, 滑雞係冰鮮雞, 完全無味的, 臘腸就一般啦, 個飯底就無煲仔飯應有既飯香味, 同埋其實煲飯的份量好少,就連杯凍檸茶都唔好飲的, 加上環境咁差, 唔值得再去…查看更多

今日去到元朗, 諗住去試吓 "泛後甜品" , 點知遇正裝修, 無計啦, 行到去綿綿冰, 又好似未開門, 見到對面有間 "小樽甜品屋", 有人食緊麵喎, 咪去試吓囉, 餐牌上有款 六色湯丸, 又幾得意喎, 一次過可以試齊六款唔同既湯丸, 賣 $18, 等咗一輪, 個賣相就唔差既, 哎..., 但咬咗一啖就知今次衰咗了, 從未食過d 湯丸係一咬即斷既, 一d 煙韌度都無, 味道怪怪的, 好似都唔係用糯米粉搓出嚟, 又似未煲熟就攞出嚟咁,又唔夠熱,d 饀又唔知係乜,芝麻饀又無芝麻香, 完全唔掂, 我試過咁多間食湯丸, 個人認為 杏花樓的西米芝麻湯丸最好味…查看更多