NiccoloM的个人专页

番工出差，出完就流落旺角街頭，搵嘢食。我一向鍾意食台灣嘢，但係香港唔算多。所以經過呢間大牌檔時，眼前嘅勁大粒肉丸即刻吸咗我埋去。八蚊一串共四粒嘅四寶丸，有牛丸、墨魚丸、蝦丸同魚蛋。每粒丸都比乒乓波都要大，計起份量同用料嘅話，要比平時五六蚊一串嘅魚蛋更加抵食。跟住見到有一堆細細條嘅所謂台式腸仔，有三種味道，有辣有唔辣，仲有蜜糖味。見到有辣味，結果就豪咗六蚊比佢。需然呢條四寸左右、一蚊銀咁幼嘅腸仔，好似好貴，但係食落多汁又香，令我想起兩年前響台北山邊嘅原居民所賣嘅山豬肉造嘅腸。跟住再要咗八蚊十粒魚蛋。食落同其他地方冇乜大分別，但係就平好多。臨走口乾，要咗個十二蚊嘅冰沙。呢個就唔掂喇。飲到尾係冇哂味。下次都係飲番凍飲而唔係冰沙。…查看更多

睇完上面嘅食評，慕名而去，原來呢間茶餐廳可算係蒼海遺珠！晏晝一點去，坐咗成個鐘都冇滿人，除咗成隊球隊黎食飯時稍為多啲人，但係都仲有位淨。唔想等位嘅話，可以考慮呢度。等朋友到時，見到有架噴泉式果汁機裝住啲豆槳，六蚊杯，就試下。好香，不過稍為甜咗些少。我叫咗個馳名嘅菜膽排骨雲吞麵，排骨就正如上面所講，皮脆肉腍，唔太鹹唔太淡，係每一方面都適中嘅技術。至於雲吞，大粒係幾大粒，不過裡面好似唔係好多肉，但係神奇在連我咁嘅食肉獸都覺得冇問題，味道有響度就得。而個白菜膽都幾新鮮。最大問題係個粗麵。可能煮得太耐，所以嫌佢好似溶溶地咁，唔夠結實。下次會試蛋麵。朋友叫咗紫菜腐皮卷麵，腐皮卷通常淡而無味，靠汁索味。但係卷埋塊紫菜響裡面，香之餘又有味，係唔錯嘅配搭。凍飲連嘢食只需加六蚊（單叫十一蚊），通常卅幾蚊可以埋單，幾抵。最後補充一句，記得叫排骨另上。浸濕哂就唔好啦。而排骨單叫一塊要十三蚊。…查看更多

用貓黎做招睞嘅地方，以為嘢食會既貴又唔好食，點知有驚喜。其實我五年前幫襯過阿貓地攤嘅舊舖位，但係淨係記得玩貓，唔記得嘢食嘅級數。不過隔咗咁多年，都唔會點同以前比較。一入門口就有啲貓嘅紀念品賣，重有啲擺設。一隻大肥貓瞓咗響個櫃枱上面。一睇個餐牌，就發覺大部份食物都係普通餐廳嘅差唔多兩倍。例如一個焗飯餐，連一杯嘢飲，就要八十元。加個湯要五蚊，加甜品要十八蚊，轉特飲要十蚊，好易過百。當然，情調同環境唔可能同一般茶餐廳比。不過算啦，去好多其他地方食其他嘢重可以貴好多。同埋女仔話要玩貓，你唔會話唔去嘅…我叫咗個雞肉磨菇芝士焗飯，轉特飲要朱古力冰沙，跟住見佢個羅宋湯嘅價錢同其他食物不成比例，所以要埋個湯。個湯唔大，但都有兩隻茶杯左右，味道出乎意料地濃，只係略嫌胡椒粉太多。好耐未飲過咁濃嘅湯，好似勁多番茄漿（唔係蕃茄醬），同埋香料，去到近乎辣嘅地步。不過我鍾意辣，所以又別有一番滋味。杯冰沙好杰，恰好係我鍾意，但係味道比起個湯就有點淡，不過出面大部份地方都係差唔多咁味。跟住個飯就犀利喇。芝士係成層冚到密密實實，響個普通大細嘅焗飯用嘅兜度突哂出黎，差啲瀉咁滯。我就「咦」咗一聲，心諗裡面梗係多飯少餸。點知一叉落去，發現成層雞肉，再半層磨菇。雞肉又林又多汁，而啲菇都好滑，香到不得了。而且啲芝士比較保溫，唔會話慢慢食到最尾會凍哂，簡直係色香味俱全！而我朋友就叫咗個叉燒撈麵。我以為係普通嘢，點知佢附有一小杯醬，大概係芥末、沙律醬、蜜糖嘅混合物，味道酸酸甜甜，又同出面嘅撈麵唔同。食完之後好滿意，再次明白「一分錢一分貨」嘅道理。附帶一提：餐廳免費提供濕紙巾同口罩。重有，啲侍應冇制服，所以一去到嘅時候，你會唔知道邊個係侍應邊個係人客。…查看更多

一行四人，響望哂成條赤柱大街嘅十幾間餐廳後，結果揀咗呢間，因為佢門面比較光晚，而又咁啱有位。其他食客差唔多清一色係洋人，不過我哋都係響外國番黎，唔會輸蝕！問題係其中一個男待應，睇落似東南亞人，同佢落單，中文唔識聽，英文都聽得好吃力（chocolate 聽錯 strawberry），點睇佢都唔適宜做一間大部份客人都係洋人嘅餐廳嘅待應。首先我叫咗個 Ben & Jerry's 嘅朱古力奶昔，一個朋友叫雲呢拿，另外兩個叫龍蝦湯。佢哋話個湯好香好濃，而我個奶昔就一般。跟住上前菜，係一個亞洲拼盤。有一串雞沙嗲、一隻蝦春卷、一隻印度 samosa、一件三文魚刺身。跟住有一塊生菜載住嘅牛肉絲沙律，好似生菜包同 fajita （需然係墨西哥嘢黎）嘅混種。仲有一個用紫色生菜載住嘅粉絲沙律，辣得好好味，好似係落咗泰式辣椒同魚露嘅中越泰混合菜式。我哋又叫咗一盤青口，睇落有成卅隻咁多，浸響半盤好重蕃茄味，類似意大利菜湯嘅汁裡面。主菜就有三道。最最好食嘅係泰式綠架喱鴨肉。架喱鴨已經唔常有，裡面落嘅香料亦唔似平常綠架喱，又有一種咬落似節瓜，但係係一粒粒嘅瓜類物體。非常之香椰子味，辣得啱啱好。肉又多，但係冇肉淨係撈汁都好正！跟住有個意大利闊條麵。呢個其實一般，我嫌個麵煮得太軟，不過我相信有人會鍾意。料就有落足，不過四個人分就兩三啖食哂。旁邊跟埋一堆田園沙律，我哋冇人識得欣賞樹葉同草，不過好多外國人鍾意，係貴過凱撒沙律嘅嘢黎。最後有個好鹹嘅印尼炒飯。個飯身好深啡色，應該係鼓油太多。料好似好多，但係啲味俾鹹味冚哂。而塊蝦片就係林哂嘅…幾唔掂下。呢間餐廳有一架投影電視同一架細啲嘅電視。嗰晚啱啱有一班大約廿個澳洲人響度睇欖球比賽直播，旁邊就播溫布頓女單決賽，都叫做好好嘅聚會地方。總括黎講，呢間餐廳嘅菜色好獨特，相信唔會太多地方搵得到。雖然個炒飯真係強差人意，但係個架喱就真係頂呱呱。佢個餐牌有好多選擇，唔叫印尼炒飯就一定有其他好食嘅嘢。附近其他所謂餐廳其實好多都係酒吧，係呢間睇落似樣啲，唔會嘈到傾唔到偈。…查看更多

今日去黃金之前，慕名而黎食晏晝。我叫咗個雲吞牛腩麵，果然好似其他食評所講，啲雲吞勁好食。裡面有成隻蝦，重唔係細隻，係好似蝦餃咁大隻。牛腩好林，都幾入味。個麵據講係自己整嘅，好似煮得耐咗，所以太林。湯麵加一樣料就 $18 ，兩樣 $22，三樣都先係 $26，不過個價錢同牆上面啲廣告貴幾蚊。我加咗碟 $10 嘅油菜同埋 $6 嘅支裝忌廉，$38 埋單。…查看更多

單拖是但搵嘢食，叫咗個燒肉油雞雙拼飯。燒肉唔錯，夠瘦，多肉，唔太鹹，但係佢就切咗啲雞肋骨俾我。如果真係有肉嘅話，味道應該唔錯。唔通咁叫做拉上補下？加咗杯唂咕，好耐冇飲過，味道幾濃。原來叫飯加凍飲有得平五蚊，即係杯唂咕收咗我八蚊，抵！…查看更多

兩個人慕名而去，試咗海南雞飯同埋香茅豬扒飯。個例湯算幾好味，唔係好鹹。個雞跟黃飯就唔夠香，分量算一分錢一分貨。個豬扒就好鹹，加埋豉油撈飯就真係勁鹹。佢個餐牌上有其他嘢睇落都算吸引，我肯俾多次機會佢。可能係因為希望越大，失望越大啦。…查看更多

兩個人去食，係我朋友細個去嘅地方。叫咗$40招牌海南雞飯，同埋賣哂廣告話老闆專程去泰國學番黎嘅$40滷水鴨飯，一碟$68嘅豉椒蒸帶子，再加一碟$35蒜蓉A菜。海南雞飯好少雞肉，骨多，個油飯OK香。同白切雞唔係太大分別。滷水鴨飯就相對黎講好多餸，冇骨，不過唔係油飯。個汁算唔錯。碟帶子蒸到過哂龍，一啲都唔好味。碟A菜求其OK啦。環境：普通勁迫嘅搭檯茶餐廳。服務：啲侍仔都唔知邊碟俾邊檯，行過黎嗌，靠人客自己認頭。呢間嘢出面排大長龍，人頭湧湧，但係真係唔明點解咁受歡迎。好普通啫。…查看更多

自己一個人鍾咗入去，咁既然叫「華姐清湯腩」，咁第一次梗係試清湯腩啦。跟住見到佢成間舖頭都響度賣豆漿廣告，咁咪要杯試下。碗$25嘅清湯腩 OK啦，不過唔覺似係天后區最多好票嘅舖頭。啲牛腩一啲都唔林，不過個湯同個麵都唔錯。杯豆漿就好正，好香又唔過甜。$6杯，好底！…查看更多

三個人，上樓上坐，原來佢哋個地舖樓上重有個好似私房菜咁嘅單位。坐都算好坐，不過啲牆反彈啲聲音，所以需然唔係好大地方，都好似好嘈。不過後面兩檯夾埋有八個阿嬸，我諗都有啲關係。蔗蝦 - 好新鮮拎出黎，熱辣辣，但係冇乜特別。牛油雞翼 - 又係新鮮炸出黎，同埋勁大隻雞翼，淋咗牛油好香。雞肉沙爹 - 好大串，又係好新鮮熱辣。但係個所謂招牌牛肉河粉就麻麻喇。啲牛丸最衰，因為有好多筋。裡面重有牛柏葉、牛筋、生牛肉。料算多，但係又係冇乜特別。啲河粉同個湯都OK，但係個湯就偏甜。…查看更多

一間非常唔顯眼，但出奇地又平又靚嘅餐廳。話佢唔顯眼，係因為我朋友住響樓上都唔知呢間餐廳嘅存在。而我，響樓我經過幾次，根本就冇注意到呢間餐廳有招牌。就算有，憑嗰個響三樓，又霉又黑嘅招牌，相信好少人會入去。簡直係滄海遺珠，宣傳上嘅悲劇！呢間餐廳嘅裝修好好，暗暗哋好似中式西餐廳嗰隻，啲位夠闊，卡位有皮座位，重有好多六至八人嘅枱，應該會好適合大班人去。午餐燒烤，$38一位，鍾意可以自己燒，驚燒得差就可以叫廚房煮，一樣價錢。一人一碟肉，以價錢黎講，算好大碟，起碼去food court都唔會俾咁多你。重有幾碟配菜，湯、飯、飲嘢同甜品，真係好鬼正。配菜除咗平時嗰啲泡菜之類之外，居然會有韓式炒年糕！呢啲係平時要俾錢嘅特式小菜，呢度就當配菜請你食。而碗湯，其他餐廳俾嘅係清湯，頂多有片白蘿蔔同蔥，但係呢度嘅湯係有湯渣嘅（最正嗰忽），重居然有隻蜆響裡面，簡直係驚喜！飲嘢有菊花茶同酸梅湯揀。好細杯，但係起碼個菊花茶唔係過甜。而甜品係青檸啫哩。唯一唔好係，隻甜品匙羹洗唔乾淨，有啲上手嘅嘢癡咗響度。咁多嘢先至$38加一，去邊度搵？夜晚任燒都只係$128，搵日一定會去。…查看更多

我已經係第二次去。上次同啲唔係好熟嘅朋友去付近嘅殯儀館，個煲重要放響我對面，所以冇得話大食特食，要顧住儀態同禮貌。今次就唔同喇。我特登逼我啲熟朋友，山長水遠入大圍，就係為咗呢個雞煲。四個人分一個雞煲，食完之後加水當火鍋湯底，再加幾碟火鍋料，咁就一餐。有人唔食得辣，所以叫「微辣」，結果都夾咗十二隻辣椒出黎。個伙記肯另外俾碟醬我自己調味，所以大家都能盡興。老實講，隻雞細咗啲，唔知同我大食有冇關，抑或啲肉俾我啲朋友夾哂。但係其實只係為個汁撈飯，正到不得了。最正係啲洋蔥，勁香囉。後來想話加碟唐生菜，但係黎到發現啲菜邊爛爛哋，結果都肯換過啲菠菜俾我哋。啲娃娃菜就冇問題。再加咗碟駝鳥肉。我唔知應該係乜味，但係入口好林，一啲都唔韌，又幾香口。四個人食到飽先至三百蚊唔到，真係又平又正！…查看更多

兩個人去食甜品，身為朱古力精嘅我，赫然發覺有「朱古力燉奶」呢回事，係一般傳統甜品舖冇嘅嘢。朋友要咗上面有人貼過嘅椰香芋頭涼粉冰。我個燉奶，一啲都唔係過甜，而似一杯調味剛剛好嘅朱古力奶。但係又撈得渾，唔會局部濃啲，一忽淡啲咁。本來我嘅期望幾低下，係姑且試下，但係結果算係有驚喜。朋友個椰香芋頭涼粉冰勁大份，一個人食唔哂。用嘅芋頭係粉開嘅，唔係真芋頭，所以佢有啲失望，不過應該唔係大問題。椰汁好似唔多夠。…查看更多

如上面嗰位所講，我係響有六五折優惠時去嘅。挪威三文魚魚生好新鮮。朱古力梳乎里只係一次焗十個，所以要排隊，但係唔過甜，幾好食。燒牛肉軟硬適中，最重要係冇渣冇筋，算係中上。啲皇帝蟹同珍珠龍蝦勁鹹。俾得咁多錢，但係佢哋嘅雪榚唔係名牌，有啲嫌佢縮骨。最大問題係，雖然嗰度佈置得好靚，但係大部份嘢食，食完都冇乜即象。不過個餐廳真係好好坐。一行五個人坐到十一點先走。不過正價$348真係太貴。…查看更多

兩個人去，我食凍椰汁西米露，佢食凍合桃糊。我個椰汁西米露好香，有椰汁味，甜度剛剛好，啲西米重好大粒添！佢碗合桃糊聽佢講好似唔錯。佢話唔好嘅應該會出水，但係呢碗冇。我睇到佢碗嘢好杰，唔係好似出面嗰啲水汪汪咁。…查看更多