gigileung1115的个人专页

去開港島區，梗係要喺附近搵食，本身以為中環區無咩邊爐嘅選擇，但見到呢間火鍋撚個格局好似幾正，所以就去咗食嘢！一入到幾驚喜，有一種懷舊feel，入咗另一個世界咁，幾正～邊爐係湯底先決，因為有唔同樣嘢都想試所以叫咗隻鴛鴦湯湯，一邊係沙嗲一邊係白湯，沙嗲湯比其他店有啲特別係加咗麻辣，朋友唔太食得辣所以叫小辣，另外叫咗個蜂巢豆腐白湯鍋。兩個湯底都有蜂巢豆腐同鴨血，自己鍾意沙嗲湯多啲，因為蜂巢豆腐可以索晒啲湯汁，辣辣哋幾過癮！再提提醬汁，除咗基本嘅豉油、葱、蒜蓉、炸蒜外，特別嘅係有腐乳、香辣醬，好似都幾特別，所以特意一試，腐乳幾好，推介～叫咗唔多嘢食，但叫嘅嘢都幾正，先講講日本A4級特級霜降和牛，細份都要三百幾，但嚟到都覺得值嘅，因為油花係睇得出同平時嘅肥牛有咩分別，好靚！忍唔住影多幾張相先～同埋佢有小tips係呢碟只需要6秒就食得，薄薄一片烚完之後係有足夠牛味，而呢個油花食落係幾滿足。另外一讚係羊肉片，唔會好羶又夠羊味，配埋沙嗲幾好味喎！酒糟五花肉嘅溫馨小tips係只需淥30秒，淥完之後一聞都仲覺得酒味好香，食落好淋，但因為切得有厚度，唔會食落就融化咗咁，我幾鍾意呢一碟。為咗平衡返，所以叫咗個餃子拼盤，雖然都有蝦有肉，但有返啲菜平衡，而且皮薄餡靚，都幾吸引喎～叫咗杯大啤酒share，好大杯，兩個人share都夠飲！埋單時送糖水，以為都係啲普通嘢，但係打咗做沙冰嘅感覺又幾特別，同埋我鍾意佢細細杯，食晒都唔會好膩。…查看更多

前兩日經過深水埗要搵食，見呢間cafe幾靚又好似坐得幾舒服，咪入去試下囉！（我承認我比佢外表呃左）咁打咭黎講話，佢裝修係靚既，好cyber既感覺，都見到有唔少人喺度係咁打咭。然而，一間餐廳最重要都係食物質素！我叫左杯cappuccino($40)同海鮮飯卷($78)先講杯啡，作為一間打咭cafe，拉花拉到咁樣衰真係好唔得！不過拉花樣衰都算！而且仲要超難飲！真心未飲過一杯咁難飲既cappuccino!! 通常奶啡正正常常的話唔會差得去邊，但好明顯個老闆係用啲勁cheap 既咖啡豆，深炒到得苦同燶味！我飲左幾啖頂唔順！再講海鮮卷，$78咁既份量真係好少好頹！入面得蟹柳、酸瓜、蛋個啲，味道買可以既，但收78真係好貴囉！其實我都好少比負評，因為喺香港經營餐廳真係好難，而呢度既員工都好nice有禮貌，所以好希望個老闆睇到，改善返食物質素，做返好餐廳本業，齋打咭係唔會有返頭客！…查看更多

呢間舖頭主打懷舊冰室感覺，午市有一般冰室嘅食物，焗飯炒麵之類，而晚市就有火鍋、小菜。今次我哋一行四人就黎試下佢個火鍋～火鍋湯底有好多選擇，又有雞煲，因為朋友唔食辣，我哋湯底揀左個特別啲既野紅茄牛尾鍋～🔸 野紅茄牛尾鍋 $198嘩！呢個鍋真係不得了！好有驚喜！我本來以為會係普通蕃茄湯底加小小牛尾，但原來超級多料！勁多牛尾同埋蕃茄，要食咁啲牛尾先有位打邊爐，啲牛尾炆到勁林！！好入味！個底好濃蕃茄味！好正！🔸墨魚炸油炸鬼 $58呢個小食好特別，係將油炸鬼切開一半，然後將墨魚滑釀入去，再拎去炸！上面再舖滿蟹籽，真係好好食！外脆內軟！咬落去鬆脆嘅聲音可以拍一段ASMR，好治癒！呢個一定要試！🔸牛三拼(B) $418有三款牛肉，安格斯牛柳粒、雪花肥牛、安格斯頸脊，全部都好有牛味！牛柳粒有口感，雪花肥牛油脂均勻，牛頸脊入口即化！$418 望落好似有啲貴，但其實份量都幾多，同埋啲牛肉都好高質，所以都ok!! 🔸墨魚水上鰾 $78呢個見佢個名咁得意所以叫你試吓，喺魚肚入邊釀咗墨魚滑，口感幾特別，外層嘅魚肚吸晒啲湯，而入邊嘅墨魚滑好彈牙！推介！🔸廣島蠔 $40一碟四粒，我哋四個人啱啱好一人一粒唔使爭～啲蠔好新鮮好甜！勁肥美～ 除左鮮甜，真係無嘢補充。我哋仲叫左其他火鍋料，花膠、魚皮餃、蔬菜、粟米、蘿蔔等等，全部都好新鮮！🔸老闆水果茶 $48呢個老闆水果茶$48勁大杯，四個人share都得，入邊有啲生味粒同百香果，味道好清新，不過個人覺得甜咗啲，記得叫佢少甜呀～Overall 呢餐都好滿意，埋單每人$300左右，4個人食到勁飽！…查看更多

元朗好食既餐廳好多，但要搵間可以飲酒chill 下，食物質素又ok 既餐廳就唔容易，今晚個fd 帶我黎呢間凡直友里，都幾喜出望外～我哋4個人叫左兩個set dinner同兩個小食，份量都幾多～食完好滿足😊先講下個跟餐starter 🔶紐西蘭青口配藍芝士忌廉汁青口都鮮甜，應該都幾新鮮，配芝士忌廉汁好夾，好smooth, 不過得3隻唔係好多喉😂🔶三文魚子、吞拿魚他他脆多士攞盤好靚～唔講以為去左食高級日式料理～個吞拿魚他他醬唔係完全打成蓉，入面有仲有啲吞拿魚粒粒，上面再加左幾片爽口青瓜，配搭脆多士，口感層次豐富🔶餐湯-龍蝦湯(+$40)我哋決定加$40試下個龍蝦湯～味道濃郁，質地好creamy! 仲有隻爽口大蝦～不錯！🔶香烤羊扒($188)一碟有3件羊扒，都幾大件，叫左5成熟，煎得啱啱好，中間好嫩好多汁～而且完全無騷味，好味～唯一美中不足係無薄荷醬。🔶M5和牛牛膝肉手造寬條麵($178)個寛條麵上面舖滿超多芝士，芝士控大愛！牛膝肉煮得好淋好入味！個手造寬條麵幾煙韌，己有好感，個汁都好掛麵～🔶松露油帕馬臣芝士薯條($78)又係超～～～多芝士，堆到成坐山咁，見到都開心，薯條即炸熱辣辣，好正！🔶凡直小食拼盤($278)個拼盤好大哥好豐富！有雞翼、炸墨魚餅、炸魷魚圈、辣香腸、黑毛豬火腿蜜瓜同埋日本甜薯！炸物全部都炸得好鬆脆，我特別鍾意食過炸墨魚餅！🔶White Sangria($80)黎呢度唔可以唔試佢既特式cocktail, 呢杯White Sangria 味道好清新，入面有白酒、冧酒、菠蘿汁、蘋果汁、接骨木花、桃、芒果、梳打等，好易入口，女仔好啱飲又唔太甜！🔶Red Sangria($80)呢杯以紅酒為主，加入Gin, Triple sec, 梨、玫瑰、橙汁、Lemonade等，因為落左3種酒，酒味相對濃，同埋都幾甜～呢度環境都幾relax, 好啱同啲朋友黎飲酒chill下，嘢食都好味！推介！…查看更多

喜歡吃雞翼的朋友，應該都會略有所聞這間Wingman. 餐廳以多款不同口味的雞翼為主題，有乾身、濕身及特製三個類別，20款口味。另外餐廳也有提供沙律、小食、wraps等等，不用只吃雞翼那麼單調。和老公下午來到，不是太多人，餐廳闊落開揚，坐得舒服，我們選了面向彌敦道的位置坐下，別有風味～點了兩個lunch set($68@), 另加$40追加Wingman Avo。🔸Wingman Avo 火燒牛油果牛油果火灼過後帶出香味，配以青檸和印度風味乳酪，未試過這個吃法，感覺很新鮮，喜歡那個印度乳酪的味道，用來沾薯條也很好吃！午餐本身包一個湯，但是日餐湯售罄，改以沙律代替。🥗菠菜羽衣甘藍沙律配柚子醬菜很新鮮，配柚子醬酸酸甜甜很開胃我們點了三款濕身和一款特製口味：🔸Singapore Zing 新加坡辣蟹味雞翼先炸過，然後沾滿特有醬汁，灑上辣椒、香蔥、乾蒜等～乾蒜有一些脆脆的口感，令口感更豐富，而且非常惹味，像在吃避風塘炒蟹的感覺，個人最喜歡這款～🔸Honey Wasabi 日本蜂蜜芥辣同樣地雞翼先炸過，沾上大量蜂蜜，上面再加一點日式芥辣，甜蜜中帶一點點刺激，喜歡蜜糖雞翼的朋友不要錯過！🔸Spicy Buffalo 水牛城雞翼Wingman 特製水牛城雞翼，比普通的水牛城雞翼辣一點，酸酸辣辣的特製醬汁，上面灑滿了巴馬臣芝士碎，多了一層鹹香味道，好吃～🔸Salted Egg Yolk 自家製鹹蛋黃（特製口味需加$19）用鹹蛋黃煮餸其實真係冇得輸！一定好味！有別於平常吃的鹹蛋黃食物很濕身的做法，這款鹹蛋黃雞翼比較乾身，可以吃到雞翼的香脆，也吃到一粒粒的鹹蛋黃碎。餐廳一點也不吝嗇，上面灑滿了超多鹹蛋黃碎！感覺很滿足～🔸炸甜薯條另外值得一提，這個炸甜薯條，真的很好吃～原來sweet potato 做薯條是這麼好吃！！餐廳裝橫是港式懷舊風，有幾個打卡點，記得去影相啦～…查看更多

上星期日同老公過黎東涌行下，發覺東薈城無乜好食，行過去富東商場，比我地發現有間幾有懷舊氣息既西餐廳，即刻入去試試～侍應好有禮貌，介紹我地今日既海鮮頭盤好新鮮，咁當然要試下～頭盤有生蠔、蝦、翡翠螺、青口生蠔係澳洲出產，雖然瘦咗啲唔係太大隻，但好新鮮好有海水味。青口就不過不失，蝦好清甜爽口，我最鍾意係個翡翠螺，超鮮甜，最貼心嘅係佢哋會預先剪走晒啲內臟，拎出嚟啖啖肉，大愛～煙三文魚沙律菜好新鮮，煙三文魚好香煙熏味，佢仲加咗啲蘑菇增加口感。西洋菜湯呢個湯好特別，中西合璧，我從來未試過用西洋菜煲既西湯，聞落去係中式西洋菜湯嘅香味，飲落去有少少似西蘭花湯嘅感覺，應該仲加咗薯仔，估唔到呢個中西合璧嘅組合咁夾，好香好好飲！黑松露蟹肉意粉 呢個係餐廳嘅signature dish, 又係侍應姐姐推介。嗯～果然無介紹錯，個意粉好香黑松露味，有好多蟹肉，係Carbonara既變調。食落好Rich好creamy, 每一條意粉都掛滿汁同一絲既蟹肉，廚師仲加入左蘆筍，令到口感層次更加豐富～美國安格斯1855肉眼扒 食西餐點少得牛扒，呢塊安格斯1855肉眼扒好濃牛味，肉質彈牙，廚師煎得啱啱好，保留到啲肉汁，中間帶粉紅～濃郁嘅牛味喺口中久久不散～甜品係Homemade Blueberry cheesecake & tiramisu 個cheesecake 甜左小小，不過都好味，但相對我比較喜歡個Tiramisu，咖啡味香濃，質地幼滑，餅底有酒香，但又唔會濕立立，我好怕啲Tiramisu個底整到好濕，呢個做得幾出色！另外值得一讚係呢度嘅Service幾好，每食完一碟侍應姐姐都會幫你換碟，今餐真係食得好滿足好開心！…查看更多

同兩個girlfriend約左黎呢間果醬做主題既Let’s Jam! 甜甜的感覺，好啱女生～我哋叫左個晚餐，另外再叫左啲小食。晚餐包沙律、餐湯、飲品同甜品，都幾多野，抵食！🔸慢煮極黑毛豬扒配玉桂蘋果醬(set $229)頭盤：田園沙律配熱情果醋汁，沙律菜新鮮，我幾鑽意個果醋汁，唔會太酸，帶少少果味，好開胃！餐湯：野菌忌廉湯，飲咗兩啖先記得影相，所以影得有少少樣衰，唔好意思！個湯都好好飲，好濃郁嘅蘑菇味！主菜：黑毛豬扒個黑毛豬因為係慢煮，都幾淋，幾juicy，肉味濃，豬扒配玉桂蘋果醬，幾有新鮮感！個果醬仲有啲蘋果粒，有口感！餐茶：桂花雪梨果茶好香桂花味，仲有粒粒雪梨肉，感覺幾潤～甜品：Cheesecake芝士味好濃，不錯🔸玫瑰蘋果醬單骨雞翼($39)雞翼每隻都沾滿甜甜既蘋果醬，聞落仲有淡淡的玫瑰味，我鍾意佢單骨嘅做法，吐骨容易好多，旁邊仲付上沙律菜，好健康！🔸果醬九宮格多士($49)因為呢度出名自製既果醬，所以我見好多台客人都有點呢個，上面會有九款唔同嘅果醬，我冇試晒咁多款，比較喜歡丁香香燈同雜莓。🔸英式鬆餅配士多啤梨醬($18)我好鍾意食scone，但香港唔係好多地方有得食，見到呢度有一定要試吓，果然很不錯！好香嘅牛油味，而且質地厚實得來鬆軟，唔會硬”骨骨”!! 大愛❤️…查看更多

聖誕約會特別多，今次近近地去公司附近的Deer Kitchen同好朋友食餐好嘅迎接聖誕。一出lift就見到好靚的門前裝飾，白鹿、暗黃的燈光，真係好有氣氛。可能因為平日夜晚的關係，都唔算太多人，我哋可以坐耐啲，盡情傾計～和風鰻魚牛油果薄餅食材都幾豐富，2-3人份量，女孩子share黎講都幾適中。鰻魚唔算好多，本來日式鰻魚汁同個沙律醬都有少少漏，幾好就係佢加咗牛油果中和返，呢個配搭唔錯！火焰西班牙黑毛豬肋骨Waiter 預備咗酒&火槍，好貼心問我哋想唔想影低，可以等埋我哋ready先點火～咁緊係好啦！真係好有睇頭，隔離枱都忍唔住八下我哋食咩！不過有D酒落左薯格度，有D苦味。豬肋骨食落juicy，唔乾，燒過之後都好香口，不過整體份量唔係好大份，有少少唔夠食。鹿鹿安格斯牛肉漢堡漢堡味道一般，無乜肉香，比較普通，所以對佢的印象唔多。反而個薯條炸得幾好味，不過只是配菜好味的話，下次都未必encore 呢個lu~薄荷朱古力賣相吸引，亦都有內涵，唔會太甜啱啱好，朱古力香濃，加埋個cream雖然肥仔左啲，但當佢係甜品為呢一餐作結，感覺都幾完滿～…查看更多

今日同朋友經過呢間越南餐廳，舖仔細細，外型幾有特色，朋友住呢度附近，話新開無幾耐，佢都未試過就試試佢！牛肉法包($53)我地叫左個牛肉法包，其實我本身幾怕食法包，因為啲通常都硬過石頭！但呢個法包一啲都唔會，個包烤到外面好脆，入面鬆軟！咬落有小小似脆豬既感覺！！入面有生菜、酸蘿蔔絲、蕃茄、同埋烤牛肉。烤牛肉好香唔乾身，有肉汁，好味！老闆好nice仲問我地好唔好食，話越式法包係佢地招牌，黎到一定要食！半生熟牛肉湯粉($50)食麵其實最緊要個湯底，所以我食麵通常第一件事係飲啖湯先！湯底應該係牛骨湯，好香濃！半生熟牛肉係個湯灼一灼，外面熟入面生，令塊牛肉鬆軟唔會好鞋，牛味都好濃郁！而懞粉軟硬適中！食完碗麵又唔會好頸渴，不錯！…查看更多

平時同老公好少行過黎富達廣場呢邊，都唔知開左間咁chill既西餐，經過見到有啲室外座位，啲人帶住狗仔飲下酒，好似去左西貢咁～環境好舒服～即刻試下佢！黑松露牛肝菌濃湯個湯好香濃，好creamy! 聞落好香黑松露，飲落就好濃牛肝菌味。Caesar Salad呢個Caesar Salad比平時食到既豐富，啲菜好新鮮，上面有Crispy Parma Ham，質感介乎煙肉同Parma ham之間，脆脆地有啲厚度又無煙肉咁肥膩。 食肉獸可以加多$38加配雞胸～法式香煎鵝肝伴黑醋汁配焦糖菠蘿及紅酒蘋果蓉我好耐無食鵝肝，但因為老公好想食，所以破戒一次，兩個人share一件無咁有罪惡感。呢個真係不得了！個鵝肝勁肥美，廚師煎香左個鵝肝配上個toast，真係好好食！伴碟菠蘿都好特別，切成1cm左右既立方體，上面有一層薄薄嘅焦糖，好精緻！仲有紅酒蘋果蓉，兩款伴碟 味道酸酸甜甜，解左鵝肝嘅肥膩感！炭燒澳洲肉眼扒配香蒜牛油焗龍蝦尾炭燒肉眼扒燒得啱啱好，兩邊煎香，一切開有肉汁，牛味很濃，肥瘦適中，塊扒好優質！至於龍蝦尾，因為有香蒜牛油汁焗過，食落好香口，味道鮮美，肉質都好彈牙！飲品叫咗凍鴛鴦，同埋玫瑰接骨木花茶。杯凍鴛鴦比較特別，奶茶底，咖啡造成冰磚，令到杯凍鴛鴦唔會因為加冰變淡。杯花茶好清香，唔會太甜！Overall呢餐都好滿意！…查看更多

自從上兩個月去過日本豐洲市場第一次食Omakase, 自此念念不忘！但香港食Omakase實在太貴，一路都無再試，咁啱經過尖咀呢間立濱食Omakase, 價錢一啲都唔貴，即刻拉老公入去試下！舖頭細細，係立食既～我地點左Omakase 壽司同刺身各一Set. 先來刺身，有6款，每款兩片！有鱆紅魚、中Toro、大Toro、帶子、金目鯛同深海池魚。全部都好新鮮，中、大Toro滿滿油花，入口即融，帶子鮮甜，池魚質感有啲似魷魚，鱆紅魚同金目鯛爽口！壽司有10件加甜品魚太（唔知寫得啱唔啱，但發音係咁）師傅話係類似斑類既魚，佢上面灑左柚子鹽，入口清新。黑松露帶子，好香黑松露香味，同鮮甜既帶子又幾夾！阿根廷赤蝦，好爽口彈牙，好有蝦味！深海池魚加左薑䓤，質地有啲似魷魚，滑得黎彈牙！金目鯛 面頭火炙過令到魚肉好香，上面配燒汁啫喱，一冷一熱，好特別！黑鯥魚，真係聽都未聽過，要問師傅先識寫，魚肉鹽燒過，可以唔使點豉油，肉質爽口。燒秋刀魚就食得多，刺身就真係第一次， 魚味好濃 ，質地滑，不過個人覺得有啲腥。北海道海膽，好鮮甜！中Toro，都係好肥美，好多油花！燒過既左口魚, 用左秘製醬汁，好正！滑到好似啫喱咁！入口即溶！忍唔住encho~仲有甜品送，係寒天啫喱、蕨餅。其實食完一set刺身同壽司，我兩個已經飽飽地，但師傅推介試下赤貝，新鮮到貨～師傳果然無介紹左，個赤貝真係好新鮮，仲有小小郁動！而且好爽口鮮甜！另外再叫左件鰻魚壽司，都好肥美，好好食！…查看更多

聽講米芝連推介的拉麵Jo喺元朗Yoho mall開左分店，即刻拉老公去試下！我地7點左右到，唔使等就有位，但過多一陣就已經開始要等位了！🔸特製蒜油豚骨拉麵($98)食拉麵要先飲湯，湯底呈奶白色，上面有一層好香既蒜油，唔好太膩。配料有叉燒、溫泉蛋、紫菜等，叉燒有兩款，不款係一片片的，另外一款係好似魯肉，兩款都係半肥瘦，而且煮到好腍好入味。麵底係直身幼麵，麵質軟硬適中。唯一覺得嗰幾塊椰菜無煮過，生食有點怪。🔸特製沾麵 ($105)沾麵湯底用石鍋呈上，上台時啲湯仲滾緊，保證湯底熱辣辣。啲沾麵係用粗麵，煙韌有咬口，沾上濃郁既沾麵湯底，很不錯👍🏼我比較喜歡呢但沾麵！🔸蔥花牛舌 ($68)牛舌煎到好香，都腌得入味，煎到外脆內軟，唔會有蘇味。好味！…查看更多

約左朋友黎旺角食放題，佢話兆萬呢間神户屋不錯，所以揀左呢間。星期日我地book左6:30唔算多人，（好彩早啲黎，7:30已經full哂）可以食兩個鐘。未叫野食先送上生蠔和海膽，啲生蠔都幾肥美。海膽一小篤，不過都幾鮮味。另外亦會送鍋物，有日式和牛壽喜燒和韓式芝士部隊鍋兩項選擇性。我地驚部隊鍋太「濟」，所以揀左壽喜燒。好大鍋，好足料！味道比我平時食既壽喜燒無咁甜，清清地。食物選項紙足足有10張咁多，令人眼花繚亂，有刺身、沙律、日式前菜、炸物、和食料理、鑄板燒、壽司、手卷、拉麵和火鍋等。我們主攻刺身和熟食類！刺身方面，一般放題餐廳會有的三文魚、甜蝦、帶子、希靈魚、北寄貝、角螺、象拔蚌等等都有，比較特別是有松葉蟹鉗和泰式生蝦刺身。帶子和甜蝦也鮮甜，其他也不錯。熟食方面，除了日式料理，這裡還有韓式料理，人蔘雞湯、韓式炒粉絲、辣醬豬頸肉等等，人蔘雞湯幾重蔘味，我比較喜歡辣醬豬頸肉，用韓式辣醬，辣辣地好惹味！另外即燒牛舌同鐵板一口和牛都係推介之選！炸物試左芝麻雞翼，芝士年糕同香芋丸，芝麻雞翼就普通，芝士年糕好多芝士，年糕煙韌，好味。香芋丸炸得外脆內軟，很不錯！飲品都幾多選擇，酒精飲品就少啲，得hite啤酒品荔枝cider.甜品有維記雪糕同小杯既布甸、moose啫喱等，點餐紙入面只有一個甜品，就係心太軟，呢個心太軟朱古力味好香濃，bite size一人一舊啱啱好！最後離開餐廳仲可以任選一款韓式雪條！真係飽到一個點！…查看更多

曾經⋯⋯夏捌月係我幾喜歡既一間餐廳...曾經⋯⋯佢啲扒好好食，個慢煮豬鞍係我favourite. 不過，自從佢越來越多人識，又開左分店之後，質素每況越下，越做越差😟差到我唔想再去！餐湯，紅湯還可以，個白湯好多粉，啲粉未攪勻一pat pat係個湯入面！粟米少得可憐！個牛扒分量來講係大嘅，但係舊肉冇牛味，而且好多筋！咬擦子膠一樣！以前嘅樽仔奶茶/咖啡冇咗，變咗做咁既樣，冇晒特色！個焗豬扒長通粉，豬扒都係好大塊既，味道一般，最難受係上面嘅豬扒同下面嘅長通粉，兩件事係完全分開嘅！得豬扒表面有焗過嘅痕跡，但下面啲長通粉白灼咁！一啲汁都無㗎！又無味！叫人點食？我真係完全接受唔到，好失望！！佢而家除咗份量大之外，一無是處！我本來好鍾意呢間餐廳，希望老闆見到我呢個食評可以改善下！😣😣…查看更多

呢間賀苗記剛開業不久，已開始出現人龍，我當然要去試試佢係咪真係咁好食先！舖頭其實成間都係廚房，無得堂食，只可外賣，或者可以坐喺門外既枱仔食。隔住玻璃窗可以見到師傅好努力地包鍋貼、菜肉飽等，日日新鮮包製！全部野都係新鮮即做！佢只係賣4樣野，生煎包、蔥花卷、鍋貼同菜肉包。價錢非常親民！除左價錢，當然味道都係非常重要！因為係即蒸/煎，所以預唔啱出爐時間的話，可能要等三、四個字，我試左鍋貼同生煎包🔸手工鍋貼 ($12/3隻)啱啱出爐既鍋貼熱辣辣，真係好好食！煎得個皮脆，入面又有肉汁，雖然未至於多到啲汁爆哂出黎，但都好濕潤，好好食！🔸手工生煎包 ($22/4隻，$6/1隻)生煎包都幾大隻，煎到個底脆脆地，肉汁無鍋貼咁多，但都好食！Overall 黎講，呢個價錢有呢個質素，真係性價比好高！推薦！…查看更多