女乃花余舍的个人专页

6 Course Dinner Menu ($1228 per person/ original price) • 煙燻鯷魚配布里歐麵包鯷魚食到鹹鮮味道，麵包鬆軟，略帶甜味，連平時唔中意食魚既朋友都覺得唔錯 • 帝王蟹肉魔鬼蛋如果有食物敏感可以一早同待應溝通，大廚會準備另一款菜式取代，蛋入面有蛋黃醬濃厚又滑，拆絲帝王蟹肉食到鮮味，配埋蛋食好夾 • 麵包配牛油酸種麵包鬆軟，但外皮偏硬，難切開不過咬得開。牛油香滑，表面有少少鹽粒提供鹹味• Champagne🥂 Set包埋一杯香檳，糖分含量較低，味道偏酸，氣泡細緻綿密，好清爽，配海鮮食好夾 • 煙三文魚布利尼薄餅薄餅鬆軟，三文魚新鮮，質感有少少煙韌。上面有有魚籽、青瓜，食落有唔同口感層次。煙燻味唔太重，味道唔太鹹，食落有鮮味 • 油封鴨胸配沙律👍🏻皮好薄好脆，肉質未去到十分軟嫩，食落鹹味較出，味道好似燒腩仔！配埋伴菜食好fresh • 海鮮拼盤侍應會席前淋上海鮮湯，紅蝦煮到剛熟，但食落無鮮蝦咁爽彈。鱸魚肉質細緻爽滑，食落魚味較淡。青口飽滿，魷魚爽彈，脆多士可以點湯食。可惜整體偏鹹，蓋過左海鮮鮮味 • 小鱗犬牙南極魚配洋蔥紅椒醬👍🏻魚沾上麵包屑後香煎，表面好脆，魚肉爽滑，口感豐富，但魚味都係偏淡。醬食落帶甜味，唔膩 • 黃雞配北海道粟米👍🏻有雞胸、雞腿卷，淋上雞汁。肉質食落嫩滑，粟米粒爽甜，有柚子胡椒提味同解膩 • 羊架配炸鷹嘴豆條 (+$198)羊架煎得好唔錯，中間呈微粉紅色，肉質好腍，脂肪比較多，但羊膻味偏重。新鮮蔬菜淋上羊肉汁係幾唔錯。炸鷹嘴豆條外皮脆但中間完全無味，食落好散好粉，唔識欣賞🙈 • 開心果芝士蛋糕配紅桑子雪葩👍🏻外層朱古力脆皮，食落好滑但偏甜。Cheesecake軟滑，開心果味香濃。開心果脆糖同糖片提供脆脆口感令整個甜品層次豐富左好多。雪葩酸味突出，平衡返味道，唔會膩！ • 草莓撻配草莓雪葩雪葩食落都係酸酸甜甜，偏清甜，好清新。呢個set份量太多太飽，所以撻就take away，唔係堂食就唔特別評論😉 • 香草奶油泡芙👍🏻泡芙鬆脆得黎好香，奶油好滑仲見到有雲呢拿籽，真材實料，真係飽都覺得好食😆…查看更多

位於灣仔區呢間越南菜主打柴火香烤美食，菜式都融合左唔同國家特色。環境令人覺得好似去左外國渡假咁放鬆～ 餐廳定期都推出套餐優惠，今次就試下啲野係咪真係咁高質先。Lunch Set ($208/ Guest)[ Appetizer ]・雞絲沙律椰菜絲爽脆新鮮配上魚露汁好開胃，但雞肉質感比想像中實淨唔夠嫩滑。沙律放上香脆蝦片上面一齊食仲有唔同口感變化～・南榮府式椒鹽雞翼雞翼炸到表面香脆，入面雞肉都食到香茅味道。最特別係有個辣椒蛋黃醬可以點雞翼，重口味人士至愛🫶🏻[ Main Course ]・西貢333啤酒三黃雞👍🏻三黃雞上枱會即席係客人面前倒啤酒汁🍺雞脾肉食落好嫩滑，個汁除左有濃郁啤酒香味之外仲好似加左雞湯，啖啖精華，同個雞肉好夾。・蕉葉包盲鰽👍🏻盲鰽魚肉質細嫩不柴，烤完後淋上香茅辣椒醬係面，食落好鮮，係成餐入面比較清淡既一個菜式。・自制手工米紙卷有齊菠蘿，青瓜，生菜，醃蘿蔔，濱海做餡料，米紙卷中意包咩餡料都可以😆 小編最中意就係包啤酒三黃雞，再點埋個啤酒汁食，一流👍🏻[ Side Dish ]・香脆茄子👍🏻茄子炸過後加上香草及濃薑汁，食落唔油，而且調味鹹鹹甜甜，令人一口接一口咁食😋・蒜香炒飯有鑊氣既蒜蓉蛋炒飯，正常水準。不過呢碟有啲蒜粒炸到太乾硬，食既時候會突然咬到硬既野，口感比較奇怪。…查看更多

呢間位於K11既露營風燒肉店之前開幕時大排長龍🚶‍♂️🚶‍♀️🚶‍♂️餐廳由裝修、餐具、枱櫈全部都係露營用品，睇得出花左唔少心思。近幾個月Openrice推出左呢個預付午市套餐，就等小編親身試下先😋露營主題日式燒肉二人午餐 ($426 連加一)(套餐外加購會另外寫上價錢)【前菜】・黑醋冰蕃茄沙律沙律入面有一整個蕃茄同埋紫洋蔥絲。蕃茄真係雪到連個芯都結冰，食落冰冰涼涼，加埋酸酸微微既黑醋好開胃。【肉類】・蘋果味噌牛肋肉👍🏻牛肋肉油花好均勻，食落多汁有肉香。咀嚼就會發現有少少清香果味，調味適中，唔洗另外沾醬都好好味。・柚子胡椒伊比利豬肋條👍🏻豬肋條燒完好juicy，肉質食落鬆軟唔會硬，配搭埋柚子胡椒既調味好清爽。・蒜香芫荽阿波酢橘雞腿肉👍🏻阿波酢橘雞就係飼料入面加左酢橘果皮飼養，係日本德島名物。雞肉肉質彈牙，雖然脂肪少，但燒完都仲好嫩滑，好正！・蒜香牛油煙肉蘆筍蘆筍煮到索晒蒜蓉牛油既味，食落好香好淋，加埋咸咸香香煙肉都幾夾。・豬雞特選拼盤 ($348)拼盤入面有豬里脊肉，豚五花，松阪豬頸肉，雞腿肉，雞翼同雞爽肉。一次過試到唔同款既肉好滿足☺ 但調味就比較單一，如果唔同部位既肉用返唔同醃料就更好。・日本骨付腸 ($58)食落有少少似台灣香腸，燒完香口而且多汁。【主食】・玉子海苔飯同牛角飯差唔多，只係加多左個生蛋黃係面😆 食燒肉配飯係一流，但今次既飯煮得略為濕潤，食落無咁粒粒分明。・月見醬燒飯糰 ($38)👍🏻飯糰上枱熱辣辣，上面有隻生蛋黃同芝麻。外層燒到非常脆口，入面既飯粒粒分明而且有醬油香，加上蛋黃既滑同芝麻既香味，好有驚喜，必食～【甜品】・菠蘿雪山冰👍🏻菠蘿冰真係有一球菠蘿果肉係冰上面，而冰食落就似飲係菠蘿汁感覺，唔同平時清冰加糖漿。粒粒菠蘿肉加埋綿密既冰，雙重菠蘿既衝擊好正。・鯛魚燒 ($48)一碟有2個，分別係紅豆味同吉士味。鯛魚燒體型比較細，CP值相對無咁高，但燒完外脆內軟，餡料亦唔會過甜，正常質素。…查看更多

呢間位於大坑既Steak House只做預約，不設Walk-in。每個月只會係FB page講幾時可以開放預約，而且都幾full下，預約真係手快有手慢無～ 今次難得搶到位，可以同大家開箱一下呢間人氣扒房😆Beef Tasting Menu ($620/ person)*可無限任添沙律，湯，薯條同埋甜品【前菜】・櫻花蝦沙律* 👍🏻新鮮爽脆既沙律菜配上自家秘制醬汁，表面灑上好香既櫻花蝦乾同埋炸蒜。個秘制醬汁加左柚子醋同芝麻醬，食落清新得黎好開胃。・麻辣牛肉芝士撻👍🏻好創新既一個小食😆 一入口係麻辣牛肉既辣味沖出黎，之後係Cream Cheese既軟滑同Parmesan Cheese既咸香味。雖然唔係好食到「麻」，但成個配搭好夾好舒服。・大地魚薯仔湯*個湯飲落係雲吞麵湯底既感覺，好鮮甜，加左薯仔令佢濃稠啲先有西湯特色。表面灑上韮黃碎，飲落還原度更高。【主菜】當日準備左三款牛扒 (會因應供貨而轉)：・紐西蘭穀飼牛三款當中較清新較甜。因為唔係和牛，相對油脂感少啲，肉味較淡，但同時亦少啲油膩感。・澳洲和牛 Triceps 👍🏻呢款牛扒食落口感相對比較爽口，有和牛油脂感之餘都有肉味，就咁食或者點少少鹽已經好正。小編最中意呢款😆・澳洲和牛 Rump Cap呢款係三款入面最有個性既牛扒，和牛臀部後腿部位。無論係肉味定脂肪感都最重，而且食落有少少騷味 (Gamey味道)，所以配上芥末醬食更好。牛排煎到外香內嫩，切開無血水，係粉嫩既顏色。如果無特定要求生熟程度就會視乎唔同牛扒煎到三至五成熟。配菜：・薯條* 薯條炸到外面好鬆脆，入面軟，但食多兩條就感覺到有少少乾，要點醬。醬有3款：最經典既茄汁，充滿蒜香同creamy既蒜蓉牛油煉奶醬，辣辣地好有特色既譚仔醬。連薯條醬呢啲細節位都做到一絲不苟，可見餐廳用心🫶🏻・燒粟米粒粟米粒燒到好香但唔會好乾身，可以中和牛扒既油脂感。・牛油野菌野菌蒜香味濃但幾清新，同牛扒好夾。【甜品】・藍莓芝士蛋糕*蛋糕芝士味香濃而且好滑，啖啖都有藍莓味。食到最後雖然已經好飽，但仍然仲食得落個甜品～ 如果有生日或者特別日子可以係碟上寫字，要係預約時向餐廳提出。值得一提既係呢間餐廳，而且可以自行攜帶餐酒，清酒或烈酒。餐廳唔收加一服務費，只限收現金。但佢地Service好親切，每一道菜都解釋得好詳盡，知道佢地構思菜色既時候加入左好多香港特色，成個互動令到用餐體驗提升到另一層次。如果預約到真係值得一試！…查看更多

東涌比人感覺係美食沙漠，但呢間位於酒店隔離商場既地中海菜無論係環境定食物質素都有驚喜。東涌地鐵站A出仲有免費接駁巴士可以直達酒店，住附近或者入東涌郊遊既朋友要留意下啦！【Appetizer】・Chargrilled Octopus ($178)👍🏻章魚腳烤得好香，外面少少脆，內裡軟稔，好易切開同咬開。配埋風乾蕃茄同橄欖油一齊食，酸酸地好開胃，作為前菜一流。・Oyster (Half dozen) ($258)生蠔產地係法國，尚算大隻，肉係飽滿唔係薄到紙咁，即叫即開幾新鮮。食落正常水準，可以自己加檸檬汁/ 茄汁/ 洋蔥醋食。・Mix Hummus Platter ($180)👍🏻呢度總共有4款味道鷹嘴豆泥：原味、番茜醃菜、紅菜頭及松露。原味同紅菜頭味就比較清淡，食到鷹嘴豆本身既幼滑creamy；松露味就好香好出，中意松露既朋友仔會眼前一亮；番茜味道就會比其他相對咸少少，夾埋烤餅一齊食就好夾。烤餅仲係免費Refill，一定夠點晒成盤豆泥。【Main】・Mix Grill ($588)👍🏻呢個Mix Grill好豐富，有烤雞肉串、烤羊肉串、烤雞肉卷及烤羊肉卷，仲有羊肉夾餅，因為全部都係肉所以份量都幾足。串燒係用炭爐烤出黎，燒得好香，肉串已經加左香草同調左味，就咁食已經好惹味。而最驚喜就係個雞肉串，咬開入面又嫩又多肉汁，就算單叫都值得一試👍🏻【Environment】入到去成個環境都有異國風情既感覺，令人好似置身渡假勝地。同三五知己傾下計食下野好Relax。…查看更多

呢間係隱藏係工廈入面既咖啡店一入到去就感受到文青氣息，全店採用木系裝修，令人幾Relax。由法國藍帶廚師主理，主打手製甜點及輕食。今次小編就黎試下係咪咁好食先～【主菜】・蘋果烤西班牙黑毛豬腩配香煎意式薯仔糰 ($142)黑毛豬腩煮到軟稔容易咬開，入面都嫩，但因為表面只有輕輕烤過下，香味無咁足，如果表面可以烤耐多少少就更正。薯仔糰比較特別，有薯仔香之餘口感有少少煙韌，表面煎到少少脆幾好食。・西蘭花芝士煎餅配水波蛋，蜜柑，蓮藕脆片，合桃 ($118) 👍🏻見到個樣就知原來係用西蘭花做既大阪燒😆 呢個食落有驚喜！西蘭花淋中帶少少爽脆，配埋流心水波蛋食就好滑，配蓮藕脆片食就脆。一碟入面有唔同口感，幾正👍🏻【飲品】・Earl Grey Latte ($45)👍🏻Latte飲落滲透着陣陣花香，茶味雖然唔係太出，但奶既質地濃厚而且夠滑。其他店鋪好少有呢種配搭，所以小編覺得可以一試。・Hojicha Latte ($45)培茶茶味香濃突出，但依然飲到奶香味。雖然用紙杯但都有靚靚心形拉花，可以見到店鋪既用心。【甜品】・楓糖芝士蛋糕 ($42)蛋糕食落軟滑，芝士味幾香幾足夠。楓糖漿直接淋蛋糕度，食落好甜蜜，而蛋糕體本身就唔太甜，所以配搭起黎食都唔會甜膩。・茶味瑪德蓮蛋糕 (跟餐附送)👍🏻瑪德蓮食落茶味香濃，甜度適中，蛋糕鬆軟口感綿密。有驚喜，幾好食☺【環境】木系裝修風格好有文青feel，入座可以自由揀位。【餐牌】…查看更多

呢間韓國餐廳地點雖然係中環，但佢入口隱身係大館附近一條小巷之中。當你以為咁隱蔽既餐廳唔會有好多人既時候，見到入面爆滿，有人龍排緊隊，仲有唔少韓國人幫襯！今次小編就為大家試下係咪真係咁正宗🤗【Main】・Flank & Shank ($380)👍🏻個鍋份量都算大，上枱有個Gas爐煮住，配料有牛腱，牛筋，豆腐，金菇，冬菇，杏鮑菇，大白菜，冬粉等。牛骨湯好濃郁，調味適中唔會過鹹，見到牛筋都煲到溶溶地，飲落好重骨膠原😍 牛腱肉香醇厚，口感Q彈，而其他配菜煮完吸晒湯既精華，正👍🏻・Slow-Cooked Pork Belly ($240)一碟大概有9塊五花腩。五花腩慢煮過後已經好軟腍，淋上餐廳自家製包飯醬，夾埋新鮮爽脆生菜食，多重口感同味道令人好滿足。但以呢個份量黎講價錢就比較進取，而味道亦係期望之中。【Snack】・Seafood Pancke ($180)👍🏻海鮮煎餅有魷魚，蝦，青口，蔥，韭菜等材料。表面煎到金黃鬆脆，內裡食到材料既鮮味同嚼勁，加上蔥同韭菜既香，令人一啖接一啖咁食。【Environment】店內環境有石拱門，植物同木枱櫈，有放鬆既感覺。隨住人流變多音樂開得愈大聲，小編覺得幾有氣氛。聽講佢地啲調酒都好出色，有機會小編都會試下😉 最後一張相係入口圖，直行左轉再左轉就會見到Obp正門入口，好有探險感覺～…查看更多

呢間位於觀塘區既台灣菜係小編既口袋名單。餐廳設計古色古香，菜式幾還原到台灣既味道。佢地唔收加一，而且下午茶時段去更加有八折優惠😆 咁高CP值既小店，啲野又好唔好食呢？【主菜】・砂鍋三杯雞 ($98)👍🏻用砂鍋上既三杯雞一上枱仲係滋滋聲出晒煙。一煲入面都有唔同部位既雞件，雞肉好入味，有九層塔同小紅蔥頭既味道，食落好有層次好惹味。肉質唔會柴，一夾啲肉就輕易同骨分開😆・古早味魯肉飯 ($38)👍🏻魯肉飯調味剛剛好，鹹中帶甜有八角香。五花肉既肥膏食落一啲都唔膩，配埋肉粒餸飯食一流。佢一碗份量都唔細，但啲肉足夠餸晒成碗飯，就算無其他餸都可以食清光。・惹味肉燥乾拌麵 ($38)肉燥份量夠拌晒成碗麵，麵質軟滑得黎有彈性，加上肉燥食落好香，仲有爽口芽菜絲增加口感。本身呢嗰麵有青同有蒜，可以比大家落單時揀返加定唔加。【甜品】・桂花酒釀小丸子 ($36)食落桂花味好突出，酒釀清甜而唔酸。小丸子質感軟糯，夾埋個桂花酒釀一齊食甜度剛好，係令人治癒又舒服既甜品。【飲品】・檸檬冬瓜茶 (涷) ($28)冬瓜茶唔太甜，而檸檬味好出！飲落好清爽，夏天行到熱辣辣既時候飲真係好解暑～・桂圓雪梨茶 (涷) ($28)呢個相對清甜，主要飲到雪梨味道，淡淡地透出桂圓味，養生之選😉【環境】餐廳內部環境都好用心設計，好有傳統懷舊既台灣風味～…查看更多

觀塘區其實有好多隱世小店等緊大家發掘，今次就帶大家瓹窿瓹罅黎到一間以乾花為主題既工廈西日fusion餐廳😆 一齊黎下有咩食👉🏼【主菜】・鰹魚熟成封門牛柳配炊飯 ($168)牛柳上碟時已經切好埋，餐廳預設5成熟，今次呢個見到中間仲有少少血水，應該大概得3成，如果想熟啲就要點餐時提出。牛柳既牛肉味比較濃，細心品嚐之後淡淡地有鰹魚香味，好有特色。但牛柳有啲位置會有筋就難少少咬開同切開。唔知係咪晚上黎食既原因，日式炊飯偏乾同硬身。而佢地配菜新薯就做得好好，外面煎到好香，入面軟淋。・北海道帶子松露醬忌廉烏冬 ($138)👍🏻黑松露味好足好香，帶子煎到剛剛好熟，食落軟淋得黎有口感同鮮味。個醬汁好creamy，加埋烏冬一齊食好夾。【甜品】・法式多士 ($58)👍🏻呢個多士睇得出係即煎，夠熱之餘外脆內軟，蛋香好足😆 雪糕就要另加$20，想試冰火既朋友仔就唔可以錯過。如果係生日或慶祝，餐廳仲可以係碟上面寫埋字同加蠟燭，好貼心👍🏻【環境】餐廳設計好用心，坐唔同枱都可以打卡。同朋友黎小聚、慶祝生日或者情侶約會都係唔錯選擇👯‍♀️…查看更多

呢間剛開業一年既泰國菜cafe主打泰西fusion菜式。餐廳環境係休閒渡假風，仲設有2張塌塌米座位，想坐特色位既就要係網上預約時提早講定。雖然見到好多人都推薦咖哩嗰啲好穩陣既經典泰國菜，但今次小編決定試下佢地啲Fusion主菜。【主菜】・香茅燒豬鞍 ($238)👍🏻香矛同豬一直都係絕配😆 豬鞍幾大塊而且厚，但都醃到好香好入味。就算煮得啱啱好全熟，肉質依然鬆軟，容易切開同咬。薯蓉軟滑無顆粒感，幾高質。・生薑蟹肉芫荽青醬意大利飯 ($158)呢個意大利飯食落唔覺有生薑味，亦都唔覺有芫荽味，連平時唔食芫荽既朋友仔都肯食。蟹肉份量唔太多，除左個面有三隻蟹鉗之外個飯都係間唔中先食到蟹肉，但蟹鉗剝埋殼呢點值得一讚。意大利飯係無硬心嗰種，青醬味就正常好食，不過呢個價錢黎講CP值就唔高，有啲失望。【飲品】・泰式奶茶 ($42)👍🏻呢個泰茶好濃郁，紅茶味香濃，飲落係好creamy好重奶味但又唔過甜。一枝大概有一杯半左右，好飲又抵飲😚【甜品】・芒果糯米飯椰子雪糕 ($68)賣相好靚好IGable，但芒果粒份量都唔太多，而且偏濕潤似罐頭芒果，食落果味唔太出，唔酸有甜味。糯米飯比平時食開既稍為結實，椰汁味濃。椰子雪糕就中規中矩，香椰子味但唔太甜，質地就正常但唔creamy。可能一開始太大期待，食完略為失望。・泰茶奶涷 ($68)個泰茶咁出色，所以想試埋佢地既奶涷。佢個奶涷就比普通泰茶淡，奶味為主但帶有淡淡茶香。旁邊配有朱古力塊，水果同脆脆，增加口感層次變化。【餐廳環境】泰式花園渡假風既設計好特別，任何一個位打卡都好靚。見到佢地擺設既裝飾、植物甚至枱凳都見到有花過心思。不過如果下次再黎，小編應該會試返佢地既咖喱、泰式小食同埋Cocktail😂…查看更多

麗晶酒店 (前洲際酒店) 翻新重開後梗係要試一試佢地既下午茶😆 呢度環境好開揚，一整排對住維港既落地玻璃窗令成個景色一眼睇晒。同朋友悠閒地望住靚景傾住計嘆返個下午茶，仲可以坐到晚上6點睇埋個黃昏。下午茶 ($888/兩位)【甜點】・青蘋果蛋糕👍🏻上層係清甜微酸既青蘋果果涷，入面有爽口蘋果粒，下層就係慕絲蛋糕。因為酸酸甜甜所以食落清爽開胃，幾唔錯！・草莓蛋糕上面既草莓都係酸酸甜甜，下面蛋糕體鬆軟，外層朱古力就甜。呢個就普通少少，味道正常。・開心果泡芙👍🏻開心果醬好濃稠，食得出係真材實料，用烤焗過純果仁打出黎。慢慢咀嚼既時候開心果味充滿成個口腔，中意開心果既一定要試下。不過泡芙就唔係脆嗰款，如果係脆面就完美。・瑪德蓮蛋糕👍🏻呢個貝殼形小蛋糕色澤金黃，奶香濃郁，口感鬆軟綿密。食落有少少濕潤唔會太乾，甜度恰度好處。・英式鬆餅外面略微酥脆，入面鬆軟，食落唔會撻口。套餐會配埋自家製濃縮鮮奶油同日本日向夏果醬。鮮奶油絲滑帶奶香，食落唔甜；蜜柑果醬就酸酸甜甜，呢個配搭令人食完成個鬆餅都唔覺得膩。【鹹點 - 三文治】上枱後侍應會建議返客人跟返以下次序，由淡味食到濃味。・蟹肉牛油果麵包鬆軟，牛油果軟滑，蟹肉再加上酸忌廉醬，清新得黎又有層次。・黑松露蟹肉蟹肉份量幾足，入口黑松露味香濃，但略為蓋過左蟹既鮮味。・魚子醬玉子👍🏻魚子醬口感唔太明顯，係帶出少少鹹味。個蛋質地非常特別，軟滑到似係結實少少既蒸蛋咁，蛋味好香，入口輕輕用舌頭一頂就化開😆・蟹子煙三文魚煙三文魚既咸香配上蟹子卜卜脆既口感，好味但就係想像到既味道。【飲品】・草本茶 - 蝶豆花蝶豆花茶顏色好靚，打卡一流！飲落就偏清淡，帶有微微草本香，好多人會形容為「無味」。但配茶點食就可以解膩，而且唔會蓋過茶點本身既味道。・白茶 - 茉莉花呢個茶就正常發揮，好穩陣既一個選擇。總括黎講，呢間下午茶所選擇既糕點都係走一個酸甜、偏清爽既路線，食完全部野都唔會覺得好濟好膩，真係幾難得！仲可以另外加配魚子醬同酒架～…查看更多

呢間工廈內既壽喜燒小店只有4張枱，晚市套餐每枱都會有專人係旁邊即席料理。餐廳選用日本熊本縣和牛，主打唔同和牛稀有部位，一上枱就見到碟牛肉油花好均勻好靚🤤【前菜】・和牛餃子大大隻和牛餃子，餡料係滿滿牛肉，好實在，但就有少少筋・泡菜汁醃蘿蔔蘿蔔爽脆，泡菜汁辣辣地令人好醒胃・三文魚籽蟹柳茶碗蒸滑溜既茶碗蒸加上新鮮三文魚籽好有鮮味，而蟹柳就令口感更豐富，呢個配搭都唔錯【主菜】A. 日本赤身和牛 ($468)B. 日本霜降和牛 ($498)C. 和牛盛宴 (A+B) ($558)今次小編試晒三種Set，包括各種和牛稀有部位。次序就係由霜降和牛食到赤身和牛，由油花重食到肉味濃。和牛配上甜甜地既關西風壽喜燒醬汁，再點埋個蘭王蛋食令肉質更嫩滑。・霜降和牛：油花分怖好均勻，食落油脂豐富甘甜，肉質軟腍入口即化，好多肉汁。當中小編最愛沙巴當，肉質嫩滑得黎牛肉味都好濃，油香同肉味兩者並存。1. 肉眼2. 肩胛肉眼3. 上肩里脊肉 (沙巴當)👍🏻4. 牛板腱 (三筋肉)・赤身和牛：油花相對上無咁多，但牛肉味十分濃郁。因為係和牛所以都好腍，只係食到最後一塊和尚頭先覺得較為結實帶有嚼勁。5. 牛前肩 (辣椒仔肉)6. 上肩胛肉7. 牛後腿內側肉 (和尚頭)・野菜拼盤：大蔥、紅蘿蔔、鮮冬菇、豆腐、金菇、芋絲、洋蔥、黃芽白、春菊每片牛肉都伴隨唔同汁煮野菜，種類好豐富。食完和牛之後可以解膩，再迎接下一片肉。【特色飯點】・和牛炊飯加入甜甜地既壽喜燒醬汁煮出黎既炊飯，有牛肉碎同菇粒。質地好似Risotto咁，食落好有飽足感。【甜品】・豆腐雪糕雪糕好綿滑，帶有豆腐香味，唔會太甜…查看更多

呢間餐廳主打當然係用A5和牛特制壽喜燒，有專人會在場即席料理，客人仲可以自行選擇牛肉生熟程度～【前菜】(侍應推介跟數字順序食)1. 梅酒啫喱車厘茄一入口係淡淡梅酒香味，啫喱層係啫喱糖既口感。咬落去車厘茄爆汁，酸酸甜甜真係好開胃，好特別！2. 素筑前煮呢個就無太大驚喜，係日式家庭小菜，汁煮切左粒粒既蓮藕，紅蘿蔔同蒟蒻。3. 櫻花蝦茶碗蒸櫻花蝦食落唔會拮嘴，茶碗蒸表面有層薄薄茨汁係面，同埋蛋一齊食成件事好順滑、有鮮味而且鹹度適中。【主菜】(配日本米飯、漬物、麵豉湯)・壽喜燒A5和牛嚴選部位及野菜盛 ($498)今次套餐選用兵庫縣A5和牛西冷，而餐廳就推介七成熟。係座位附近就有專人即席料理壽喜燒，關東風既煮法就用醬汁直接煎煮，之後直接放入蛋液(侍應話係用左鹿兒島縣雞蛋)。和牛西冷油花分怖好平均，食落軟稔而且油香十足，輕輕一咬就已經可以分開。牛肉味好濃，浸過蛋液之後好嫩滑。伴上大蔥，露荀，鮮冬菇，豆腐同埋蒟蒻絲一齊食，值得一讚係個醬汁唔會蓋過食材既原味。最後用充滿和牛油脂既蛋液撈飯食真係一流。・海鱸魚西京燒 ($308)呢個西京燒選用左海鱸魚，份量都比想像中大。表面燒到有少少金黃焦脆，皮脆肉嫩而且啖啖肉。調味用左帶甜味白味噌，加埋好香既魚油真係好下飯，幾唔錯！旁邊仲伴左清新既沙律菜，平衡返魚油既膩感。【甜品】・柚子雪葩雪葩係濃郁柚子味，淡淡清甜帶有粒粒柚子皮，好清新好解膩，為呢個套餐劃上完美句號。店內環境好舒服，坐位都隔得好開唔會迫，望住維港海景食飯真係好chill，幾適合情侶約會/閨蜜打卡/朋友閑聚。…查看更多

Set Dinner $398p.p. (Starter, Main course, Drink)【Starter】・西班牙鬆脆包，香蒜希臘芝士醬，油浸蕃茄，初榨橄欖油包比較硬身但表面係脆，芝士醬選用菲達芝士，軟滑得黎有蒜香，加埋車厘茄食都好match。・翠綠青沙律配香草芥未籽酒醋汁Salad賣相好靚，用左紅黃車厘茄，紅菜頭同軟芝士，呢個配搭食起黎酸甜鹹都有齊，好開胃。・泡沫烤南瓜湯🌟個湯size好似Espresso，飲落似濃縮左既南瓜精華，濃稠得黎又好香，同出面啲餐湯好唔同好特別，有心思！【Main】・美國1855 安格斯肉眼牛扒 (10oz)(切片)五成熟肉眼上枱有鐵架同小蠟燭，好有儀式感。肉眼切面粉紅色，食落表面有煎香，肉質不過不失但有啲位係一大舊脂肪，味道正常好食但未去到驚豔。・牛油香草烤黃油大雞 (全隻)(切片)🌟雞皮好薄，烤完好似薯片咁香脆，肉質嫩滑而且好多肉汁，一啖咬落去外脆內嫩真係好有驚喜😍 全雞(1200g)咁大隻但都烤得好均勻，調味都控制得恰度好處，值得一試。・薯條 (任食)香辣薯條食落其實只係少少辣，連小編唔食得辣都食到，調味適中唔會過鹹，仲跟埋茄汁同沙律醬。【Drink】・免費暢飲紅白酒🍷 (100分鐘)紅酒：2021 Rèmole Toscana白酒：2021 Barone Montalto - Pinot Grigio BIO兩款餐酒都係果香味為主，苦澀味無咁明顯，易入口，無飲開酒既朋友都會容易啲接受，配主菜食一流。【A La Carte - Dessert】・火焰雪山 (含朗姆酒)($118)🌟軟綿綿既蛋白加埋濃郁酒味，好香既椰子雪糕同香蕉蛋糕中間夾左層朱古力脆脆，食落唔太甜但口感同味道都好有層次～ 加埋上枱既時候既火焰show，難怪好多枱都有點🔥留意返，入座每人最低消費一個Set/Main Course。Main份量都幾大，啱晒大胃王朋友仔😆 餐廳好闊落，坐得好舒服又無限時，啱晒一班朋友/家人/情侶慢慢坐低傾計聚舊談心。…查看更多

Set Lunch $398p.p. (Include dessert)【Starter】・Green Salad with Walnuts🥗碟有機沙律菜堆到好高，份量好足。菜食落新鮮爽脆，唔苦澀，醬汁薄薄一層包裹住每片菜，配埋合桃碎食好香。・Bread ＆ Butter🥖🧈 麵包係法包，外皮比較硬同煙靱嗰種口感。值得一讚就係佢配呢款無鹽牛油好creamy，香奶味之餘亦好滑順，幫個麵包加唔少分。【Main】・Trimmed 10oz USDA Prime entrecôte steak "La Vache!" with special house sauce儀式感滿滿既牛扒，上枱前會有個架同點着兩個小蠟燭，但Gimmick作用大過保暖作用🤭 entrecôte steak其實就係肉眼扒，今次揀左5成熟同7成熟兩款對比一下。5成熟切開係粉紅色，唔會見到有血水，表面燒到焦香，入口肉質軟腍多肉汁，食落唔覺得有筋；7成熟切開明顯好少粉紅色，肉質食落無咁鬆軟，不過肉味就更濃更出。醬汁有芥末同松露牛油既味道，同塊扒幾夾。・French fries (Free-flow)呢個薯條炸得好好 -- 金黃色既外表，咬落外脆內軟令人忍唔住一條接一條咁食。雖然佢個賣相好似同某M字頭快餐店一樣，但食落更加香脆，食得出個分別。不過薯條最大問題就係調味略咸，開頭食一兩條唔係好覺，食多幾條就覺得要飲水🙈 因為牛排調味較為簡單，如果大家配薯條食就會平衡返啲。【Dessert】・Mille-Feuille三層法式千層酥睇落好吸引，食落酥脆，奶油香甜幼滑，而且見到雲呢拿籽，真材實料。上面灑上莓乾，食落酸酸地就唔會覺得膩。但其實數到佢塊酥皮得8層左右，如果可以再增加多幾層，口感就會更鬆化更驚豔。・Lemon Meringue檸檬蛋白批真係成餐最有驚喜！首先外面燒得好靚，上面個蛋白層堆到好高。其次一入口個蛋白霜好似棉花糖咁有空氣感，香甜鬆軟，配上酸爽軟滑既檸檬餡同脆身批底，味道同口感上都好有層次，推薦👍🏻如果想黎慶祝生日可以係訂枱時講埋，當日餐廳上甜品時候就會播法國生日歌同埋侍應們圍住祝福你🥳🎂 幾有氣氛🎉🎊…查看更多