HungryFatCat's Profile

今次嚟海防道熟食街市，決定試下德發牛丸。落單嘅時候，腦中幻想嘅係星爺喺食神入面嘅瀨尿牛丸，點知個牛丸麵嚟到，一食就發覺同凍肉舖嘅牛丸分別不大，可能好食少少啦🤏🏻 食得出有落陳皮，但除此之外就無咩特別。…Read More

今日同老婆行過，見到喺呢個開咩餐廳都做得唔耐同無咩生意嘅位，開左呢間越南餐廳，咁老婆又想食越南嘢，就試一試啦。叫左個香茅燒雞扒飯，諗住雞扒實穩陣啦，點知都出事.....首先，個件擺明係炸出嚟嘅，唔知點解叫燒雞，好乾，無肉汁，其次係味道偏鹹，唔係好食到有香茅嘅味道，食完一舊已經唔想再食了連大家樂早餐雞扒都不如。lunch俾成70蚊，個飯咁嘅質素......唔會再試了！唔通美孚呢個位真係開咩餐廳都......…Read More

天氣轉涼，就想食碗熱辣辣嘅拉麵今日就試左「弟弟推介」，因為我比較鍾意食肥啲嘅叉燒，再加隻糖心多，加埋98蚊，價錢都ok啦。先講湯底，一飲就飲到好香嘅煎魚味道，但一啲都唔腥，唔鍾意食魚嘅朋友都可以試下。魚香味過後就飲到香濃嘅豬骨湯味，湯底嘅質感亦都好濃厚，可以話係魚同豬完美嘅結合叉燒味道就反而偏淡，因為係用豬腩肉做，肥嘅部份會入口即溶。叉燒上面有一pat仔醬，好彩點左少少試左先，原來係辣醬嚟嘅，加少少同叉燒一齊食會野味啲。隻糖心蛋都建議大家加10蚊試下，醬油味濃，裡面流心拉啲麵呢就不過不失啦。總括嚟講都推介俾大家嘅！…Read More

喺朗豪坊行到攰攰哋，就求其入左敏華食飯。見到黯然銷魂飯，就諗起食神同星爺，所以同老婆一人叫左一碗試下。碗飯嚟到，賣相其實都可以，但係食落就麻麻。啲叉燒太甜，完全食唔到叉燒嘅香味...用嘅部位偏瘦，雖然唔會好似豬肉乾咁，都夠林嘅，但係鍾意食叉燒嘅朋友，又點會揀瘦叉...反而隻煎蛋就有啲驚喜，邊位香脆，中間流心，正！由於個飯有啲失望，食完只有黯然而無銷魂，所以叫多個蛋撻，點知又係另一次嘅失望⋯⋯個蛋撻老婆形容係一個健康蛋撻，酥皮唔酥，無咩牛油香味，唔太甜，健康囉…Read More

今日跟老婆去海防道熟食檔食tea，雖然係星期六，但入到去都即刻搵到位。今次食嘅係合香園，叫左碗沙爹牛麵、花生醬西多士同茶走。碗麵先上，沙爹牛正牛肉有咬口，唔係一般「乸」到「林」晒嗰種，食到牛肉嘅質感，沙爹味道唔錯。不過個麵就「林」左啲，可能係預先淥好，大家可以加3蚊轉出前一丁，可能會好啲。茶走十分好飲，叫左少甜，甜度啱啱好，飲到好香嘅茶味，但又唔會濃到有苦澀味，值得一試。個花生醬西多士因為係即炸嘅關係，食完碗麵先到，時間啱啱好。個多士一入口就食到好香嘅蛋味同花生醬味，質地好鬆軟，熱辣辣，超正！甜度亦剛剛好，食得甜嘅朋友可以落埋糖漿。兩個人埋單都係76蚊，呢個質素，超抵！…Read More

第一次食船麵，就寫下感受。叫左碗船皇湯麵同牛柳粒串燒。碗麵嘅賣相普通，咁當然食船麵都唔係食賣相啦！好，講下味道，個湯底味道算濃郁，但係就食唔到太多香料嘅味道，反而有少少🤏藥材味，都可以接受嘅。個蛋麵唔錯，幾爽口。至於啲餸呢.....無咩特別，唯一印象深刻嘅係隻鹵水雞翼，啲肉好「鞋」，入味嘅，但唔太好食。個牛柳粒串燒呢，就真係唔建議大家叫喇。調味普通，無串燒應有嘅香味，最差係好韌，咬到牙鉸都軟埋....杯泰仔奶茶就無特別，偏甜啦。…Read More

上堂前要食個快飯，行過見到呢間啲燒味個樣好似唔錯，就入去試下。雖然咁講唔係太好，但疫情嘅好處係堂食真係少咗好多人，直入唔使等位。晚餐啲碟頭飯都係五六十蚊，仲有嘢飲，都算抵食。今次叫左碟招牌燒鵝飯，燒鵝係翼髀個位，都唔錯啦！燒鵝嘅賣相唔錯，皮都算鬆化，鵝肉嘅調味適中，肉唔會太肥，食落仲有少少煙薰嘅香味！如果再熱啲，咁就完美喇。平時最怕啲燒鵝啲肉食落好似無落調味咁，完全送唔到飯。所以呢間嘅燒鵝真係唔錯，六十幾蚊，仲有杯奶茶，算抵食啦…Read More

之前見過有人介紹，一直都想試吓，今日趁weekday放假，就入西貢試試。蘋果批份量剛好，食完飯可以當甜品。因為係新鮮出爐，熱辣辣，正。不過酥皮就普通，唔算鬆化，入面個餡好足料，食到粒粒蘋果，吉士漿好味，整體算唔錯啦。入開西貢經過可以試下，專登去食就無必要。p.s. 個餡真係好熱，食嘅時候要小心！…Read More

今日放假入西貢hea吓，順便專程去試試呢間炸魚薯條。因為係weekday ，加上依家無咩遊客嘅關係，無咩人，唔使等位。叫左份細嘅炸魚薯條同炸雞。先講炸魚，外層粉漿鬆脆，而且薄身，入面嘅魚肉好嫩，點埋他他漿，好正。不過魚肉鮮味差少少啦，但整體都好滿意！薯條呢，就係普通薯條囉。到炸雞，無咩好講。炸得過左火，比較乾身，偏鹹，唔太建議大家試喇。另外試左發燒友嘅手工啤酒，第一次試，有驚喜。果香味重，好易入口，女仔飲應該好啱。…Read More