easonchan0110的个人专页

其實都飲過幾次都知道係唔係話太好飲，但係都諗住再俾多次機會佢，今次點咗龍眼檸檬茶見到佢新出咁諗住搏吓應該都唔會有死，點知真係又再中伏，龍眼冇龍眼味檸檬茶冇檸檬茶味，真係淡到乜咁，會繼續back list…查看更多

話說我朋友好鬼鍾意食醉野佢話要專登去元朗呢一間醉權試下，因為佢個朋友之前食過覺得唔錯價錢又夠平民，所以就叫我一齊去。坐低咗間鋪唔係好大得四五張枱左右，變咗個Menu嚟睇都好多款食物可以揀價錢又真係唔貴，我哋揀咗幾款黎食醉蛋，呢個係溜心蛋嚟嘅，食落好有酒味，裏面啲蛋黃好滑，好有口感。醉鮑魚，都幾大隻而且整得好入味好彈牙，值得推介。蛋黃炸雲吞呢個蛋黃炸雲吞果然唔錯，每粒中間都有唔少蛋黃，外層脆卜卜，食落去好香口，加埋啲蛋黃香味，再點埋啲甜酸醬味道好夾。炸花枝丸呢個花枝丸上碟出嚟好新鮮熱辣辣，外皮香口裏面彈牙，食落好滋味。醉雞，隻雞外皮好靚，雞皮同啲雞肉都好滑，而且啲雞好有酒味，好正雖然元朗對於我哋啲九龍友黎講係遠啲，不過以咁嘅價錢又真係抵食幾值得去，下次我朋友都話會再黎過。…查看更多

我朋友上網睇過呢間餐廳嘅食評，見到啲相睇到個地方同環境都唔錯，所以就book咗位去試吓，網上寫佢哋close 凌晨兩點唔知道原來餐廳嘅晚飯時段去到10點,我差唔多九點去到就已經last order ，個Menu其實都只係得大概10款main course,點知四樣都賣晒，我哋無奈都只可以揀到兩款花雕雞風味奶油雞肉燉飯啲雞肉冇花雕酒香，食落冇驚喜，而且燉飯唔好食，呢個飯呢個價錢食完好失望。夜市酥炸海鮮有大蝦，魚柳，墨魚，上菜嘅時候全部都係熱辣辣，食落去都幾脆口，魚柳唔差，墨魚彈口，配蜜糖芥末醬，食落去都開胃。最後去到9點50分左右，侍應話10點close, 連坐喺度休息5分鐘嘅機會都唔可以，我都知道阻人收工好慘，但呢餐飯都真係食得幾慘，唔會再去了。…查看更多

之前有同事介紹過有間上樓嘅cafe 餐廳話呢間餐廳環境同食物質素都唔錯，所以就想上去試吓。入到去間餐廳都幾大下我估都有成千呎，呢間野其實本身應該係室內設計公司佢自己拎埋公司嘅外邊做餐廳Cafe所以裏面有好多傢俬賣，感覺好文青feel。蜜糖栗子烤無骨鴨，燒蓮藕，燒椰菜花，每個餐都會配有沙律同餐湯，餐湯係南瓜湯裡面有好多南瓜蓉，飲落去南瓜味好濃郁好好飲。個無骨鴨烤得唔錯，肉唔會鞋，而且份量都幾大，啖啖肉。另外，配菜揀得一啲都唔馬虎，栗子、蓮藕、椰菜花同個無骨鴨都好配，整體感覺好有特色，味道不錯。慢煮厚切日本四元豚肉，薯蓉，肉桂蘋果，呢個係餐廳推介，豚肉好厚切，成塊豚肉脂肪同肉嘅比例剛剛好，慢煮既豚肉果然口感好腍，肉質好鮮嫩，加埋薯蓉食落去好夾，味道一流。今次嚟到呢間餐廳果然冇介紹錯，不過我個人黎講覺得貴咗少少，但一樣都會介紹俾朋友去食。…查看更多

想甜嚐甜每次嚟到堅尼地城都一定會會黎呢間野食糖水，每次都好多人排隊，證明香港人都真係好識食黑糖芋圓仙草有芋圓、地瓜圓、紫薯圓、小丸子，珍珠黑糖條、仙草、西米用料十足每一啖都食到芋圓同埋配料，黑糖不會太濃，配上芋圓味道好夾。花之水滴呢個水滴果然都係真係得個水滴，但係講到拎嚟打卡就真係性價比好高，賣相靚之餘食落去水滴嘅口感清甜裏邊仲有花香味而且另外會配埋個小雪糕，食完之後再食返個雪糕簡直冇得彈。椰芋有芋圓、地瓜圓、紫薯圓、小丸子、紅豆椰果、海底椰、西米同椰漿用料十足，不過略嫌味道小淡，不過整體芋圓口感煙韌，口感不差。…查看更多

朋友book咗間幾特別嘅特色餐廳帶我去食，佢話我鍾意飲手工啤所以專登揀呢間特色酒吧餐廳同我去食。餐廳裝修好fusion 又有霓虹光管嘅招牌，好啱用嚟打卡。餐廳都幾闊落，張枱大大張有大排檔feel坐得都幾舒適。蔥油涼拌泰國黃鱔配醬油漬牛油果萵筍沙律呢個菜非常fusion而且作為前菜嘅佢我覺得好有特色，佢嘅黃鱔好爽口再加上佢個涼拌醬汁酸酸甜甜同萵筍嘅爽口非常之夾，再加上牛油果嘅柔潤感令到整碟菜嘅味道都好夾，非常開胃，味道一流慢煮叉燒配溫泉蛋滷水鴨肝豬油撈飯呢個慢煮叉燒嘅肉好肥美咬落口好軟稔，個鴨肝好滑同啲叉燒竟然出奇地夾，個溫泉蛋再加埋個飯啲醬汁食落整個飯味道好到位，好出色，冇諗過原來一個叉燒飯都可以煮到咁好食。維也納caramel 味重，麥味濃，易入口，味道都幾特別，手工啤黎講口感都夠特別。整體感覺非常不錯，fusion菜整得好出色好期待下次再嚟試吓其他菜…查看更多

近排想食炸雞所以上網睇吓有邊度近屋企附近食個晏晝飯，見到呢間野好似專賣炸雞而且好似都幾多好評，而且黃大仙都好就腳一出地鐵站就係，所以過去試一試入到餐廳座位唔多大概10張枱左右，食物選擇都唔係太多不過款款都好吸引而且價錢仲好抵。我叫咗果香鹽味炸雞丼，呢個定食會配埋一個麵豉湯，白飯上面有幾件炸雞，炸雞好脆， 食落好有咬口感覺唔會好油膩因為配左啲爽口嘅蘿蔔同埋酸酸甜甜嘅醬，再配埋少少嘅椰菜絲，整個飯味道都好夾，而且我分量剛剛好，食到好飽。我朋友叫咗他他醬炸雞定食， 呢個炸雞嘅味道同我剛才食嗰款係一樣既，我諗佢哋嘅炸醬都係用同一款只係配料同埋醬汁唔同，炸雞入口都係香脆而且個他他醬同個雞都好夾有啲似蛋黃醬咁但其實我都唔知呢個係咩味，總之就有啲似沙律醬另外我哋叫左個秘傳醬雞軟骨，呢個雞軟骨果然味道好好，好脆。軟骨嘅部份咬落好有口感，我覺得比平時出邊食到嘅雞軟骨更加好食，呢個可以值得一試。整體來講我覺得都真係幾抵食，作為一個快餐廳，佢係一個唔錯嘅選擇不過佢哋嘅炸物都係一式一樣同一個味道只係唔同款，呢個就失色左一啲。…查看更多

朋友喺金鐘考試， 所以想搵間就腳啲嘅餐廳但又唔想食西餐所以上咗OpenRice睇吓有咩好食，見到呢間台式餐廳都有幾多好評所以就book咗位黎試吓，入到去環境舒適座位寬敞，心情都靚啲。松露雜菌撈腸粉呢個腸粉賣相唔錯，黑松露同埋雜菌加腸粉食落去有雜菌嘅爽口再加上黑松露味加上滑溜嘅腸粉食落去口感非常好，味道唔錯。溫泉蛋肉味噌蔥油太麵撈左溫泉蛋嘅油麵果然係唔同，味道有台式嘅肉燥加少少甜味，而且麵條煙韌，每條都沾滿左醬油同埋溫泉蛋嘅味道，每口食得好滋味。芝士海鹽迷你芋圓烤茶呢個係餐廳嘅推介飲品，芝士同海鹽同埋呢個烤茶味道好夾，再加上芋圓煙韌嘅口感令到呢杯嘢飲味道更加豐富同好飲。呢間台式餐廳位於太古廣場而且價錢都好合理又唔算貴而且食物質素都好高，係一個唔錯嘅選擇。…查看更多

朋友本身好鍾意食醉鮑魚，佢特登介紹咗我去呢一間專食醉野既餐廳，我都覺得好新奇就一於試吓。呢間野都幾多人排隊都等咗差唔多成半個鐘先至有位。醉鮑魚呢個鮑魚好抵，都係$118仲要有六隻，仲要唔係好細，鮑魚好彈牙而且好有酒香同好入味，食完一隻仲想食一隻，食到停唔到口，我朋友果然介紹得冇錯。砂鍋醉藥雞呢個係佢招牌嘅醉藥雞，當然有藥材係裡面，有紅棗、木耳、粉絲同埋佢嘅醉雞，個湯都幾甜， 又唔覺好有酒味，可能落個湯度啲酒精揮發左所以我覺得唔係太有酒味不過食落去都OK， 反而藥材味就重啲。醉鵝肝呢個係推介！我本來以為佢好似平時嘅中式鵝肝咁都係有少少鞋鞋地，點知原來佢哋係用法式嘅鵝肝， 呢個真係驚喜因為食落去非常滑而且同啲酒味好夾好入味，我都係第一次食呢種質感嘅醉鵝肝，味道一流。醉牛舌呢個牛舌幾彈牙而且酒味道濃郁，味道不錯。下次再嚟嘅時候希望搵啲日子冇咁多人如果唔係又要排晒長龍不過食好嘢梗係要等吓先…查看更多

我朋友約咗我去呢間餐廳佢話平時食lunch都有食過覺得幾好味所以話想帶我試吓。入到去座位都幾舒適，因為疫情關係都有做好衛生措施增設左透明嘅隔板喺枱與枱之間。我哋點左3道菜，拔絲咕嚕肉定食呢個定食有兩個小前菜加白飯，咕嚕肉每粒都好大件而且賣相好靚，每粒面頭都淋滿咗咕嚕肉嘅糖漿，用筷子一夾真係名副其名可以拉出絲來，每一口都可以食到咕嚕肉同埋糖漿嘅融合，啖啖肉仲冇骨添，味道非常一流。黑松露薯條每條薯條都好粗大而且每條都好香脆， 薯條上面有少許黑松露同埋一啲芝士粉， 再加埋一個黑松露醬，食落非常滋味。蜜糖芥末雞翼呢個雞翼賣相好靚而且雞翼炸得金黃色的，食落外脆內軟啲肉好滑而且肉汁都鎖住左喺裏面，食落去味道不錯。不過我略嫌蜜糖芥末醬唔夠甜同唔夠有芥末味。朋友介紹得唔錯，估唔到新蒲崗都有一啲咁有水準嘅fusion菜，我下次都一定會再嚟過。…查看更多

今日約咗朋友喺西營盤附近，咁就順便搵吓有咩好食，見到呢間坤記嘅煲仔飯喺openrice 評語幾唔錯，就諗住試吓。坤記小炒王小炒王味道唔錯，有韭菜、好大隻嘅蝦乾、魷魚，腰果炒埋一齊，好有鑊氣，上枱仲熱辣辣，韭菜好爽口同埋其他配菜一齊食口感豐富。豉椒炒蜆啲炒蜆新鮮無沙，同埋青椒洋蔥豉椒炒埋一齊，每一隻蜆都炒得好入味，好香口。:)白鱔煲仔飯啲白鱔幾新鮮、啲肉幾滑，成個煲仔飯熱辣辣再加埋煲仔飯豉油撈埋一齊食好香口再加咗少少辣嘅紅椒撈埋上去，少少辣好開胃，喺呢度嘅推介菜。呢間煲仔飯真係算唔錯，其他小菜好有鑊氣，價錢都好平民感覺都幾抵食，下次可以再去。…查看更多

呢間餐廳係我朋友介紹叫我同佢一齊去嘅，佢介紹得應該都唔差。去到餐廳感覺有點去咗酒吧嘅感覺，感覺幾特別。座位唔多，我哋都係坐咗喺吧枱。芥末雲耳淮山呢個前菜味道好特別，佢係用淮山雲耳整嘅，好爽口而且酸甜辣度都剛剛好，作為前菜非常好食開胃。手作芋泥牛乳冰啲芋泥係螺旋形咁同啲牛乳沙冰混埋一齊，賣相非常好，而且味道出色，甜度剛好，我最後都食到芋泥同沙冰嘅混合，好有口感而且唔會太膩。冬陰公龍蝦牛油果蛋餅呢個係我哋叫咗嘅主食，外面係有蛋餅加冬陰功汁喺面而裏面係一啲新鮮嘅龍蝦肉同埋牛油果整嘅，佢哋嘅味道出奇地夾而且加埋一啲沙律醬好開胃，味道一流。Oreo伯爵茶奶奶麻薯 我朋友就係因為好想試呢一個麻薯所以特登打電話去訂定先，果然不出所料食落口感非常特別，脆脆既Oreo碎餅再加上麻薯既煙韌滑溜，味道超夾而且好有口感，好有台灣風味，用呢個做甜品簡直係最完美嘅句號。…查看更多

達濠仔地道潮汕美食同朋友經過見到呢間達濠仔有幾個人排隊買外賣，所以都幾好奇點解呢間野特別旺，一心本住通常好野都會多人排隊既信念就走入去試下。見到呢間買潮汕嘢食嘅餐廳裏面嘅食物都幾特別。我哋試咗幾樣野，-特色潮汕腸粉呢個潮汕腸粉外皮真係好滑而且裏面嘅餡好豐富，有蛋、生菜、蠔仔同菜脯等，夾埋佢嘅腸粉醬油，每口味道都非常豐富而且好爽口，所有嘅配料味道都好夾，都係第一次食到咁好味嘅腸粉。潮汕豬雜麵呢個認真要一讚，佢哋所有嘅豬雜內臓都非常新鮮，有豬粉腸、豬膶、豬心、豬脷豬肚等每樣材料都好彈牙，入口好有口感，同埋啲湯底夾埋味道一流，簡直係豬雜最強。見到舖裏面貼咗喺牆上面嘅雜誌都有報道過呢度呢間嘅丸類食物都好出名所以我地都叫左一碗黎試下，我哋叫咗胡椒豬肚丸、潮汕牛筋丸、達濠肉卷麵，果然名不虛傳， 粒肉丸都好彈牙爽口而且肉質是每粒都好有肉味同多汁，我同朋友都爭住食完一粒又一粒，差啲仲想買埋佢地既外包裝肉丸返去煮嚟食添。呢間潮汕餐廳嘅老闆我非常欣賞因為所有嘅食材做法都係非常認真而且非常新鮮，好快我諗我同朋友都會再去幫襯。…查看更多

疫情剛剛好轉，約咗朋友去睇戲順便食個晏晝，朋友好鍾意食船麵而且我又好鍾意泰國嘢就上網搵咗一間專食船麵嘅餐廳「泰濃麵」。入到去座位不多，大概可以容納10張枱左右，始終係疫情關係都係冇乜人，一入到去就已經有位坐，我地點左一人一碗麵同埋一個小食。頂級安格斯牛肉船麵呢個安格斯牛肉睇落鮮紅色好鮮嫩，食落去好香牛肉味，果然係頂級牛肉，裏面仲有炸豬皮、魚蛋、芽菜等做配菜每個餸好新鮮豬皮仲好脆卜卜而且個湯底係用豬骨淆成嘅，味道好濃郁，同個金邊粉麵底好夾。卜卜蜆冬陰公麵碗麵送到枱即刻眼前一亮，因為全碗麵嘅面都鋪滿晒蜆，大概有六至七隻左右，每隻蜆都非常大隻，食落好彈牙而且無沙，好新鮮，仲有蟹柳做配菜，個湯底係冬陰功湯底味道好濃味但可能配合香港人嘅口味略嫌甜咗少少。炸芝士雲吞炸芝士雲吞外皮好薄而且炸得好脆，內裡既芝士好有口感好煙韌，而且芝士好香，而且配埋個泰式辣醬，味道一流。喺香港都唔係好多地方可以食到船麵，呢間既味道又幾唔錯，所以其實真係值得再食。…查看更多

慶祝朋友考試完畢諗住幫佢慶祝一下，特登book咗一間比較高級嘅中餐廳就係位於跑馬地嘅呢間壹玖捌叄。入到去餐廳空間寬躺，同隔離枱都有一啲距離，有多啲私人嘅空間。我哋點左幾個菜同埋一份甜品。咖啡溏心燻蛋呢隻溏心蛋外面蛋白好香咖啡味而且加上煙熏味，食落去蛋黃口感非常潤滑柔軟質地剛剛好，咁有特色嘅溏心蛋都係第一次食。樟茶鴨方呢個菜式比較特別，係有燒鴨上面加咗蝦膠同埋芝麻，食落去外皮好脆而且滿滿芝麻味而且蝦膠好彈牙同埋鴨肉味道好夾好香口。京果陳醋咕嚕肉呢碟菜食上碟嘅時候賣相非常好，廚師係碟上面畫咗一棵花，感覺好誇張。每粒咕嚕肉都炸得好香口而且嘅醬汁都剛剛食得好滋味。紫薯金沙球我自己本人好鍾意食紫薯同埋流沙嘅嘢所以叫咗呢一個甜品， 果然冇失望每粒金沙球面都佈滿芝麻食落去好香口而且咬落去好有紫薯味，裏面嘅流沙非常香整個味道一流。雖然價錢係貴咗少少但係作為一間高級中餐館佢嘅特色食物已經值回票價， 會介紹朋友再去。…查看更多