racewithme的个人专页

是夜與家人到銅鑼灣吃晚飯，原先是去時代廣場搵食的，但可惜人太多，而且我們又沒有訂位，所以最後唯有轉到此店用膳。一打開個類似folder嘅餐牌，嘩... 入面勁多紙，真係有排睇。有位女店員介紹我地叫餐食，可惜果啲餐所包括嘅食物，都係家人們不吃的，所以最後都係選擇『散叫』。諗好食乜之後，有一男店員經過，叫佢幫我地落單，但我地想食嘅海膽蒸豆腐賣哂。之後果位男店員就介紹其他嘢俾我地。但果位男店員嘅所謂『介紹』只是照餐單讀出菜名同埋強調係得獎菜而已，根本與介紹拉不上關係。例如該男店員介紹我地食此店嘅得獎菜『金絲三味豆腐』，佢淨係話三種唔同整法。之後我忍唔住出聲話佢︰照字面睇，我都知係三種唔同整法，但你係咪都要話我知邊三種整法呀？係熱盤定冷盤呀？乜都唔知你叫我點叫呀？當然最後佢都有答到我。但係我真係覺得果位店員好唔專業囉，佢又唔係新嚟唔知道，但就懶得慢慢介紹！最後我地選擇咗︰ 金絲三味豆腐︰側面兩款豆腐，一是用花生醬整的，而另外的是鹵水整的。兩款整法都幾好食。但中間用蠔油整法的就一啲都唔好食。啲蠔油好咸，而且皮蛋+蠔油，好怪囉！另外兩樣 --- 腐皮都幾好，青瓜都唔錯，可惜隔離果啲黃豆就淡而無味，勁難食！ 臘味炒芥蘭︰分量少，而且啲臘肉就超咸。唔連飯同吃，根本舌唔落。大斑兩味 --- 包括︰ 榨菜肉絲蒸斑頭腩︰榨菜&肉絲都唔多覺眼佢地嘅存在。但呢道菜都okay嘅。斑頭腩都幾多肉。 西蘭花炒海斑球︰唔錯！食得出啲斑球係新鮮。最後係送嘅糖水 --- 紅豆沙︰普普通通。…查看更多

見今日生果日報也有介紹此店，即時提醒了我要快快為此店打食評。白灼油菜︰選了唐生菜。菜是新鮮，沒有苦澀味。可惜蠔油偏淡，如果蠔油咸番少少會好啲。山竹牛肉︰友人不喜吃芫茜，但友人說這牛肉球真的食好吃，就算內有芫茜都照吃。哈哈... 果然，友人沒有介紹錯，此牛肉球用料真的新鮮，未落喼汁前，仍然看到牛肉球是粉粉地紅色的。黃沙豬膶腸粉︰非常好吃，只是略嫌豬膶較細舊，如果大舊番啲，或多落幾舊來底消番的話會更好。雞扎︰由腐皮至餡料都好好食，而且餡料不是出面部分酒樓所用的火腿扒，芋頭。臘味糯米飯︰雖然糯米飯是蒸的，但都幾好味。此店用了半肥瘦的臘腸，真的非常好吃，而且臘腸一啲都唔韌。讚... 此店的價錢與酒樓正價時段差不多，但用料就比酒樓更好，本人一定會再光顧此店的。…查看更多

扒芝士火腿三文治︰ 上回是本人吃，是次是Honey吃。本人不再多加介紹這個了，因不好吃的話也不用再叫吧。芝士漢堡牛扒包︰這個是本人點的。包的高度有點像同區『時新』的漢堡包。第一口吃時，覺得個汁有點像蠔油，怪怪的，差點不想再吃。因不想浪費食物的關係，所以繼續吃。再嚐一口，雖然再食唔出個汁像蠔油，但總括來說這個包都不是十分好吃。下次都係食番扒芝士火腿三文治好了。…查看更多

只沒有其他選擇之下，友人才選擇吃點心填肚。因為得3個人，所以要等一陣至有位，但等位其間，因本人個袋好重，所以就放一放落地下，跟住就有個男店員即刻衝埋嚟問我地幾多位同埋做咩事？我地答咗佢3位，但仲未答佢後面嘅問題，佢就已經叫我地入去。我地行咗幾步之後，有另外一位女店員同果位男店員講，未有檯住，叫我地等多陣。個人覺得此店又唔係好大，點解連咁少事都可以出錯？最主要係果位男店員，未了解清楚就衝埋嚟好似想鬧我地咁呀？簡直就不知所謂。 白灼油菜︰真係好油，果然名乎其實。羅漢齋腸粉︰一啲都唔好食，入面啲齋真係一啲味道都冇。蝦餃︰好普通。香港大把酒樓都做到同樣水準。鮮竹卷︰都幾油，而且啲餡料都唔係好特別。燒賣︰一樣係好普通。未見有任何特出之處。總括嚟講，差不多大部分點心都係由$28起，如此價錢，響香港都可以食到比此店更好嘅水準。…查看更多

一過到澳門，友人就話肚餓，所以唯有改變一下行程，先到此店吃晚飯。薑蔥鮮魚皮︰超超超好味。雖然有一兩塊魚皮仲有啲魚鱗響度，但程度係可以接受。相比香港果啲得細細碟，真係好唔抵食。XX通菜煲︰呢味餸好香，差不多每檯都係叫呢個。味道方面都幾好，唯獨係莖多過葉。蛋白蒸豆腐︰雖然清清地，不過味道都唔係好淡。估計應該係有加上湯的。開始食時覺得不錯，不過食食吓覺得稀咗啲，如果可以實番啲會更好食。蔥油雞︰友人話好香雞味，一定要食。我都食咗好幾舊，真係好香幾味。唔知澳門係咪仲有新鮮雞供應嘅呢？真係好耐都冇食過咁香咁重雞味嘅雞喇！鴛鴦炸豬扒︰黑椒味果塊就普通。但芝士火腿果塊就好好味。芝士味夠濃。…查看更多

突然好想食大西米，可惜此店沒有，經店員介紹下，為有退而求其次食普通細細粒果種西米。 西瓜涼粉加西米︰ 甜度適中，不過西瓜就未至於甜到『起沙』果種。 芒果涼粉加西米︰ 同上，甜度適中。芒果好好味，雖然有一兩舊係比較酸，但我個人就冇所謂，因為本身都唔介意食酸芒果。但西米就冇乜特別，只係同平時食開果啲唔同顏色而已。都會再去幫襯，因為店員親切有禮，而且我另外見到有幾款甜品都幾吸引。…查看更多

預早與家人食咗冬至飯，所以正日就得自己一個人。得一個人，真係好難諗可以食得啲乜，所以行咗好耐至決定到。其實聽好多朋友講過，此店啲餃子好好味，但就一路都冇試過。橫掂今日得一個人，所以最後就揀過嚟買外賣喇。$10 / 4隻 --- 雖然早已煎好，但仲係熱嘅。如果可以較啱出爐時間嚟，相信會更香口。用料一啲都唔孤寒，餡料滿滿的，我買咗廿蚊，足以墳飽我個肚嘅六成喇！哈哈... …查看更多

友人想吃日本菜，因是日仍然係假期嘅關係，好多地方都俾人訂哂位，友人千揀難揀後，最終揀咗本人年幾冇嚟過嘅水車屋。一行四人，被安排坐於吧檯位。因有部分食物放得太遠嘅關係，未能影得哂。一坐低，我已經急不及待畫我要食嘅刺身。雖然年幾冇嚟，但刺身嘅水準並冇下降，而且仍然切得厚厚。但可惜到第三Round時，個劍魚腩刺身就好唔得。雪到冰哂，我咬咗一啖，凍到我啲牙痺哂。記得上一次嚟，有好多食物都冇試到，所以今次一定要叫嚟試吓至得。友人介紹我食嘅日本蜆粥，味道果然唔錯，而且個粥甜甜地幾好味咖。天婦羅方面我淨係食過多春魚同埋南瓜。我覺得多春魚就麻麻地，但南瓜真係好好食。友人揀嘅蒜香墨魚咀，我記得上次食過係好難食，而且仲水汪汪的；反而今次就好好多，雖然仲係有啲水，但就冇上次咁難食。芝麻八爪魚 ---> 其實呢個好多地方都有得食，不過友人話呢度好食啲。原因係呢度唔好俾好大pat嘅醬去蓋過哂啲八爪魚喎。今次漏單嘅情況比上次嚴重，唔知係咪因為爆場嘅關係？個沙茶鰻魚炒飯，我地叫咗三、四次之後至送嚟。仲有大慕牛肉飯，炸香蕉... 等等，最後都係連個樣都未見過囉！總括︰水準依舊，熱食比上一次有進步。給燒物部嘅哥哥仔︰請你唔好一手拎電話，另一隻手就整嘢俾我地食啦！都唔知你係咪因為咁所以俾阿頭話？不過係唔係都好啦，你都唔應該掉碟發脾氣囉，食食吓嘢無端端聽到『砰』一大聲，真係俾你嚇親咖！請不要再將閣下的情緒連繫到工作上。…查看更多

很久以前都有嚟過此店，經過裝修之後，環境好了不少。以前嚟，多數都係打邊爐，因為貪呢度嘅鮮枝竹夠厚身。晚飯小菜都係第一次咋！脆皮燒腩仔︰本人食過最差嘅燒腩仔。皮雖然係脆，但一啲都唔香。而且啲肉過『林』，『林』到好似『梅』咗咁。薑蔥焗桶蠔煲︰呢道菜好好，而且啲蠔又夠肥美。拍得住金山螻嘅焗蠔咁香。:)翡翠炒大斑球︰可以啦！好多酒樓都有，如果連呢道菜都做得唔好的話，相信間舖都近乎執得。北菰花膠鵝掌煲︰估唔到賣相得次餘，味道都唔錯。雖然冬菇唔算係好香菇味果種，但都可以接受；花膠用的應該係中價貨，都幾好食；鵝掌唔錯，但若果再『林』少少就更好。:)清蒸大斑頭腩︰好食。而且帶有陳皮嘅香味。芝士海生蝦伊麵︰好難食。蝦唔新鮮，而且蝦殼仲『痴』實哂啲肉，蝦肉又『梅梅』地。芝士一啲都唔香，而且個汁勁少，根本冇可以撈得勻所有伊麵。…查看更多

天氣凍，但友人A仍然好想去試呢個椰子雪糕，所以我地唯有陪佢去！雖然一行三人，但我地叫朋友A先買嚟試吓，如果好味的話我地至買！幸好，自己冇揀錯，我食咗兩啖，覺得同平時食開果啲雪糕好唔同。呢個雪糕啲奶味一啲都唔重，可以話近乎冇奶味，反而真係有陣好似飲椰青嘅味道。雖然係清清地，但唔知點解我覺得呢種味我食唔慣！硬係覺得有點兒怪怪！佢嘅味道，未令到我即時去買一杯for自己食，所以都唔會有下次lu...…查看更多

此店之前都嚟過一次，印象都幾好，所以當友人話食韓燒之後便即時想起此店喇。是夜星期五，上到去時都已經八點，原本諗住會有好多人等緊位，但結果又唔係喎！見等嘅人唔多，諗住仲會好快有檯添。點知... 越晏就越多人，有啲人數多嘅，反而仲快過我地有檯。等咗成九個字，終於有檯喇，快步入去放低啲物品之後就即刻去攞嘢食。即食嘅就攞咗三文魚刺身，同埋一啲即食冷盆。(((其實想食熱食，但熱食冇蔬菜類供應。)))燒物方面就攞咗啲牛肉類同埋魷魚墨魚果啲。之後友人就攞咗啲茄子，雞肉，冬菇同埋多春魚。整體嚟講，比起對上一次光顧時感覺差咗。上次嚟果陣食完個身都冇一陣味，但今次就有少少。希望此店響冬天時，可以多出幾款熱食以供選擇，尤其係蔬菜類嘅熱食。…查看更多

整日市區氣溫低於十度，相信大部份人都會選擇打邊爐。是夜到達時雖然已經九時多，但此店仍然爆場，幸好我們等了大約五分鐘便有檯了。入座前，我們已經向侍應表明是吃火鍋的，但卻被安排坐於一張非火鍋的檯；這都不要緊，加爐就可以了。但我們入座後，另外再跟侍應說了三次，他們才把火鍋爐及火鍋紙放下。一打開火鍋紙，選擇不多，蔬菜也只有三、四款選擇，海蝦售罄，我最愛的脆骨腩也沒有，所以很快我們便選好湯底及配料。等... 等... 等... 等了數十分鐘，湯底配料都未上；我們周圍眼望望，有一著黑色西裝的男子(((應該是部長)))見狀，瞄一瞄我們的檯，之後使去按一按電腦，過了兩分鐘後，湯底終於上檯了。之後我們又再等... 等... 等... 等了數十分鐘，配料仍然未上，坐於我們右邊的鄰座客人見我們及自己的配料都未上，便開始鼓譟，經他們投訴後，我們及他們的配料也開始陸陸續續送上了。醬料方面是自取的，較大路的椒絲生蒜，很快便被客人一窩蜂地掃光。 湯底︰芫茜皮蛋湯 配料︰鱔片、唐生菜、鴕鳥肉、豬夏青、肥牛、豬肝、雞子、鮮枝竹及魚腐配料不差，而且每款配料都用了白菜及菠菜墊底，不如外間多數用的椰菜絲。唯一要彈的是唐生菜，因為好幾瓣都爛爛的... (((忘記影相)))服務方面︰聽到左邊檯的客人埋單時，向侍應說︰『今晚好旺場喎，都未見過你地咁爆。等位等了半小時，等配料也等了半小時。』雖然我也覺得是夜的情況真的有點混亂，而且等上菜的時間也頗耐。可能此店新開不久關係，希望侍應之間的協調上會改進一下。但想借此特別一提，有位四眼男侍應，他的服務及效率真的要一讚。做事快手之餘，見我們把空碟疊在一起也不會視而不見。另外，一位著灰色西裝的男子(((應該是經理)))，他真的很好，事事親力親為，就算上菜，收檯等等的工作，都不會只叫侍應們去做而自己不做的。本人最最最欣賞這類人... :) …查看更多

天寒地冬，瞓到黃朝白晏係理所當然嘅事... 是日起床時已經接近下午二時，瞓咗十幾個鐘，個肚已經開始打鼓，梳洗過去就落街搵食。極想飲杯熱嘢，最好嘅選擇就當然係茶記啦！對於此店，本人經過就多，幫襯就真係第一次。一入內，被安排坐響最入最近水吧位的卡位。一路行入去被安排嘅位置時，見有一位人兄踎低響度將啲醬料由個透明儲物箱『畢』落個盆度。 個人覺得果位人兄嘅動作唔係咁好囉，除咗阻住人行之外，每每經過嘅人行過都總會有啲塵埃飛起啩，而且果條係侍應嘅必經之路，真係唔係咁睇囉。我覺得果位人兄應該將個箱放上檯之後再作處理。望咗一陣張餐牌，已經諗好食乜，但等咗好耐侍應至過嚟幫我地落單。全場只見一個侍應響度做緊嘢，應該因人手不足...之後我地點咗下午茶餐︰ 扒芝士火腿三文治配薯餅 + 熱好立克︰好好味，麵包加埋牛油烘過仲香，薯餅就可以啦，脆係脆，不過有陣油味，但就唔係油『益』味囉。Honey話，因為用新嘅油炸所以至會咁喎，唔知呢？另外，Honey話如果用塊有少少咸味嘅芝士應該會仲正。但個人就覺得啱啱好。 吉列魚柳配薯餅 + 熱好立克︰Honey話好味，而且塊魚柳又唔會炸過龍。而好立克就冇出面一啲茶餐廳咁孤寒，真係好夠濃。我地去到時係下午茶時間，咁啱又係員工嘅下午茶時間，眼見有數位員工坐響張大卡位(((我地對面檯)))度食嘢傾計，其實就冇乜所謂嘅，但佢地講嘢實在太大聲，太嘈，同埋太多『XYZ』喇。希望佢地可以顧及下其他客人，將音量降低少少啦！另外，我知道好多茶記都習慣將啲物品放響卡位下面，但唔該... 員工們去攞嘢時通知一聲個客人吖，無端端有個人衝埋嚟真係嚇一嚇咖！…查看更多

下雨天 + 寒冷天氣警告生效之下，與Honey相討過後，一致決定，最好就係去搵啲『暖身』食物食吓。:)原本諗住去新忠記食煲仔飯，但係因為落雨而且附近啲舖仲未閂門，只係開得一張室外檯，所以我地決定轉地點搵食。:(之後不經不覺行經此店，Honey建議食川菜，原本我都唔係好想咖 (((因為之前聯記川王嘅經驗)))，但經過Honey一輪游說之後，諗住入內一試。點知... 因為客人太多，所以我地最後決定買外賣。對住張外賣紙發呆咗一陣，諗極都唔知食乜好，之後有個侍應好有禮貌地介紹一啲食物俾我地；經過侍應熱情嘅推介之後我地最後點咗︰ 口水雞︰呢個口水雞真係好好好食，雖然係辣，但都食得出有雞味，啲雞肉一啲都唔『嚡』口，而且仲啖啖肉。(((好在叫咗三樣嘢咋，如果唔係一定食唔哂囉！))) 唔似得聯記川王果啲口水雞，厚厚嘅辣油浸住啲雞 + 死麻死辣，仲要俾埋啲雞背位，難食到爆。 介香木耳︰平時比較少食木耳，經侍應極力介紹下就『胆粗粗』試吓。嘩... 真係估唔到原來木耳 + Wasabi可以得出如此效果。Wasabi用量適中，絕對冇過分『攻鼻』嘅情況發生。讚... 芫茜皮蛋魚片泡飯︰因為我地叫咗個口水雞，所以Honey話叫番個芫茜湯飯去平衡番喎。 個湯好甜，一啲魚腥味都冇，用料新鮮之餘，分量好足，一啲都唔『孤寒』。而且飲完之後一啲『口乾』嘅感覺都冇，個湯應該係冇落味精咖。(((另外，唔知係咪果位侍應見我地點咗口水雞，所以最後佢拎份外賣俾我地果陣同我地講，話額外俾咗兩盒辣椒油我地，叫我地試吓將啲辣椒油加埋落去個湯飯度食，別有一番風味咖喎。起初我地聽到之後都半信半疑，點知Honey食到一半時，真係突然興起加咗啲辣椒油落去，佢食咗一啖之後話好正，所以最後我都學埋佢咁加埋一份。哈哈... )))…查看更多

下午與友人行經佐敦，突然想起彩龍的晶瑩通透粉果。可惜與友人已吃了午飯，所以只好外賣一打生粉果回家與Honey分享。但... 因物價通漲，所以彩龍也加了價。由從前的$26元一打生粉果再加送一隻，加到現時$30一打，但不再加送一隻了。雖然如此，但粉果依舊好味，水準並沒有因物價通漲而下降，也沒有因此而『偷工減料』。…查看更多