burgers888的个人专页

新店開張梗係要幫襯一下，試一試佢係龍定係蟲，坐低聽隔籬枱同老闆娘嘅對話先至知道原來佢哋喺銅鑼灣仲有一間分店。宮廷煎水餃其實就係普通嘅窩貼加隻蛋落去，味道又唔錯喎，煎餃嘅皮煎得好靚，而且入面嘅鮮肉餡料好新鮮，用鐵板熱住上保持住個溫度。冇諗過醉雞上海麵嘅醉雞會咁大碟，而且係會用雞髀肉再加雞髀旁邊一齊上，性價比極高。菜肉雲吞上海幼麵味道唔錯，菜肉雲吞新鮮好食，似係自己包嘅，而且雲吞個數量比想像之中多，好似都有五粒。佢呢度嘅豆漿味道唔錯，跟餐先至係$4杯，抵到爛。…查看更多

終於試得到傳說中用大石斑做嘅魚米之「香」，而食呢個餸，除咗要預早訂定之外，上菜嘅時候仲有指定步驟，就好似上面幅相咁首先係會上個魚片嘅。然後就會喺魚片上面鋪滿炸到卜卜脆嘅米粒，魚米之「香」嘅咪就係講呢啲米粒。跟手就會倒超級香濃嘅鮮魚湯落去，當啲湯遇到啲脆米你就會聽到shot shot聲。大功告成，可以開動，因為條石斑夠大條，所以啖啖肉而且啲肉好厚身，佢蒸到啲魚肉啱啱好，所以好嫩滑，唔夠魚湯，自己仲可以斟，到到最後直頭就咁飲晒啲魚湯，超正。佢個魚米之「香」係兩食，第二食就係炆班頭腩，呢個都好好食，好新鮮又多肉。…查看更多

今日嚟西灣河太安樓搵咗一間可以好好地坐嘅餐廳食lunch而唔係好似平時咁樣掃街。作為一間Cafe當然要飲咖啡啦，一杯ice Americano再加一杯熱latte，杯ice Americano係用咖啡波波冰， 而杯latte竟然有拉花，都幾有誠意。呢個炸魚薯條用嘅魚係懵仔魚，我將啲薯條轉晒做沙律菜健康啲，啲魚好新鮮好好食，特別鍾意佢嗰個秘製醬汁，綠色嗰啲係香蔥汁，真係食得到蔥花嘅味道。漢堡包就揀咗脆脆枝竹羊漢堡，呢個就係傳說中拎得上手嘅羊腩煲，羊肉漢堡好多地方都有得食，不過配埋枝竹真係絕無僅有。…查看更多

呢間Cafe個豬肋骨真係好食，聽講係呢度其中一款招牌菜式。個豬肋骨嘅BBQ sauce係幾出色嘅，同其他地方食到嘅BBQ sauce最大嘅分別就係唔會只有煙燻味同埋一味得個鹹字。另外呢個慢煮三文魚都係好出色，首先熟嘅三文魚真係好蝦人煮架，要做到好似呢度咁樣有脆皮，而且魚肉入面仍然鮮嫩，再加埋D肉唔可以Over Cook搞到肉質鞋晒，大廚要將個火喉控制得好好，而且真係要有心機兼唔可以心急先掂，呢度就做到晒上述幾樣要求，果然高手在民間。…查看更多

正宗德國菜就係肉、肉、肉，啱晒好似我地呢D Meat Lover，今日試了位於元朗，都算近西鐵站嘅德國餐廳，行多幾分鐘一離開D大商場就變得性價比高晒。德國菜點會少得德國香腸呢？呢度嘅德國香腸可以遂條散叫，又或者簡單D叫個德國香腸拼盤，拼盤可以自選3款腸，分別有芝士腸、辣肉腸、香草豬肉腸、慕尼黑牛仔腸同埋豬肉蛇形卷腸，我地就揀咗辣肉腸、慕尼黑牛仔腸同豬肉蛇形卷腸，3款都幾好食，辣肉腸就最普通，豬肉蛇形卷腸就夠晒長，感覺上好似抵D，而當中最有特色嘅就係條慕尼黑牛仔腸，一來係白色香腸，二來D牛肉味又真係幾香。除咗香腸之外，食德國菜又點可以唔叫豬手呢？呢度個豬手都做得幾好食，外皮crunchy，入面D肉又唔會好「鞋」好韌，最正當然係可以揸住支骨去扯淨設嗰少少肉啦。 …查看更多

聽講呢一間石門的雞煲幾好食，所以就去幫襯吓，叫咗椰子雞煲，真係幾好食。落單後等咗一陣就已經上菜，湯底、半隻雞，仲有一個椰青分開上，隻雞望落去都幾靚，好新鮮，感覺上好有光澤，D雞肉位唔會瘀瘀黑黑。個伙記會幫我地倒個椰青落去個湯底度，然後開爐滾，滾起之後就可以落D雞落去，再滾多5分鐘左右就食得。個伙記叫我地要先飲個雞湯，可了椰子水嘅雞湯真係特別清甜，有一種好滋潤嘅感覺。D雞肉唔會太韌，而且都真係有雞味嘅，以半隻嘅份量黎講都幾足料，同埋因為碟雞係分開上，所以唔會成煲都係骨多過肉，食到雞比雞腳嗰D。打邊爐配料就叫咗3樣，分別有韭菜餃、鮮蝦雲吞同鮮腐竹，3樣之中，佢個韭菜餃最好食，最有特色。…查看更多

今日幫襯咗一間有特色而且都幾地道的印度加尼泊爾菜的小餐廳，成間餐廳都係由印巴藉人士主理，所以D食物出品有地道嘅保證。出面好似比較少見尼泊爾餃子Momo，可以蒸或者煎，我地試咗個蒸嘅，食落個餃皮比較厚身，有D似我地東北地區嗰D水餃，個餃子嘅餡係用雞肉做，整體嘅味道同口感都幾好，個醬就係辣嘅，而且我覺得都幾辣。另一個小食係侍應哥哥握介嘅，叫Dahi Puri，佢話係一道非常傳統嘅印度小食，外層脆脆地，入面裝住D酸乳酪，再喺外面再沈一D脆麵，好儂，好啱呢D又焗又熱嘅天氣。…查看更多

呢一間餐廳的炸魚薯條真係好巴閉，竟然用馬友同龍躉黎做炸魚薯條，令到成件事除了高級晒之外，D味道仲正好多添。首先係用沙巴龍躉做嘅炸魚薯條，呢種不規則形狀嘅魚柳可能就係代表住大廚自己開新鮮魚黎做魚柳，而唔係一般嗰D四四方方嘅魚手指，食落明顯魚味出好多，起晒骨啖啖肉真係好正。至於個馬友炸魚薯條仲以一夜干製作，令到馬友嘅香味更出，佢仲有一個香水樽裝住D花雕酒比你唧，一夜干馬友加埋花雕真係又好味又有創意。另外我都幾欣賞佢個醬，尤其是係外邊綠色圍住嗰隻，原來係用蔥做嘅，掂。…查看更多

因為未齊人，所以先叫咗個小食邊等邊食，就係叫咗呢個冷盤，川椒豬手，個豬手都幾入味，雖然叫做川椒，但係其實又唔係好辣。另一個小食就試咗冰火魷魚，都係冷盤，不過呢個魷魚堅辣，叫冰火真係一D都無錯，兩個小食都好食。終於等齊人可以開餐，我地叫咗4個餸，4個都幾好食，呢間小菜館真係勁。先上枱嘅係呢度嘅招牌菜鮮菠蘿拔絲咕嚕肉，呢個真係做得好出色，個咕嚕肉外層係輕輕的脆口，入面粒肉就軟林林，個汁都好食，唔係一味死酸。個集眾招牌雞又係好正，隻雞好有雞味，雞皮薄，又唔肥，連埋雞潤雞腎雞腸，證明真新鮮。呢個鹽水花甲好新鮮，又無沙，而且都幾大粒肉。個菜都好有特色，菜芯加上甜梅菜原來都幾夾幾好食，值得推介。…查看更多

小籠包即叫即蒸，大約15分鐘就有得食，熱辣辣係正嘅，呢度嘅小籠包嘅Size比平常的大少少，不過都算係皮薄餡靚，點薑絲浙醋味道一流。上海粗炒基本上係食上海野必食嘅一項，呢間嘅上海粗炒味道都OK，不過就嫌怇有D濕，如果乾身少少會好味D香D。上海菜肉雲吞Size比平常的細返少少，本來諗住要有酸辣湯做湯底嘅酸辣雲吞，不過因為個Friend話唔係好食辣，所以就放棄咗，叫返普通嘅上海菜肉雲吞，味道都OK，不過好似有少少味精。呢間上海野個豆漿幾香豆味都算係幾好飲。…查看更多