GGLAI的个人专页

打邊爐最緊要就緊係唔係滔滔話齋，最緊要個爐安全啦⋯⋯家陣出街食飯，最緊要都係環境衞生為上。所以如果太多人，都唔敢去。聞說呢間店，夜晚邊爐可以食點心，咁盞鬼。加上睇埋其他食評，話佢服務差，咁就唔駛驚多人啦。果然，一上到去，只係七成滿。其實今時今日，仲有七成滿，呢間店做得算係唔錯啦。入到去，個店主服務一啲都唔殷勤。又冇90度鞠躬，又冇斟茶遞水。只係問兩位想坐近門口定坐入少少。似乎其他食評話服務唔好，可能係真嘅。如果你想要半島既服務，我估呢到俾唔到。之但係咁我已經收貨，唔好太殷勤，我會起雞皮。都係講返食物啦，就係因為佢👇🏻都實我都有啲疑惑，係唔係將小籠包放入打邊爐煮熟黎食呢？但係又有叉燒包喎⋯⋯。開估，登登登櫈⋯⋯原來可以一邊打邊爐，一邊食蒸好嘅點心。呢籠小籠包，合格之選，皮唔係薄，但餡靚。之後有燒賣：好在只係叫兩粒，超誇張，有冇咁大呀？乒乓波既 size 呀。呢個真係要推介一下啦。的確唔錯，食落彈呀既，肉質唔會梅，好野。呢籠係我放埋一齊既大集錦。叉燒包係正常大細既，但換句話說，即係隻蝦餃唔正常，超大。咁到底打唔打邊爐呢？哈哈，啱啱水滾。其實火鍋既野，來來去去，都係肥牛，同埋精選特選肥牛，如果係極品。我話二百蚊落樓，你都唔會信啦。之但係任飲任食黎講呢，呢到啲牛可以接受架。唔知點解呢到唔做多啲海鮮呢？政府送咗一萬，我又唔介意食豪少少呀。可能驚人流少，銷唔去啦。海鮮一定要新鮮，隔一晚已經唔係海鮮架啦。除咗肥牛，原來仲有其他野，不過係自助。我最鍾意自助，飲料都係。快靚正。但美中不足既係啲 響鈴。放係到任夾係唔得既，因為有水氣，唔脆啦⋯⋯，要改善一下啦。差啲講漏咗隻蝦，唔食真係走寶。真係鮮！…查看更多

很久沒見外出用膳了, 今天同老友慶生，再出省吃個晚飯, 小曼谷之前也曾光顧，印象很好，便提議再次去飽腹一頓！今日我地完全將健康拋諸腦後，第一道上的菜便是滿滿的串燒，有串燒墨魚咀，串燒雞軟骨，川燒雞腎還有鮑魚菇，雞軟骨。雞腎和墨魚咀很爽口，吃得出燒的時候灑上了一點鹽，鮑魚菇口感的確有點像真的鮑魚！作為前菜很開胃！然後有馬拉盞炒通菜，通菜味道剛剛好，馬拉盞很香，跟我在泰國吃的味道差不多！很正宗海鮮青咖喱，青咖喱有椰香味，而且海鮮很豐富，有魷魚有青口也有一點很爽口的蔬菜！一點也不辣！不嗜辛辣者也啱吃！配飯一流。泰式鐵板蠔餅很驚喜的蠔餅，裏面有很多生蠔，生蠔帶有一點海水味，餅底裏面有芽菜，令整道菜沒有肥膩感！也可以防止蠔餅燒焦！泰式燒魷魚，魷魚大大隻啖啖肉是encore之選我們還點了涼粉冰和芒果沙冰來作一個甜甜的結尾！小曼谷！我會再再來…查看更多

太放縱啦⋯⋯放題呢種餐廳太邪惡，咁多刺身，又有炸物，又可以無限添食。先唔好講新唔新鮮，如果我話呢到既野食好新鮮，咁一定係作野，而且新鮮既唯一準則係由條魚係你面前生生猛猛，即劏即食。我只可以話，二百蚊，任食，剌身食落唔會令你覺得係難食，但你又唔會預期自己去咗日本食緊料理。剌身既款式大路，有三紋魚，劍魚腩，油甘魚，希靈魚，吞拿魚，甜蝦，大赤蝦，北寄貝...除左款式大路，最重要係唔會太「小家」，我同老婆2個劃紙仔，寫幾多佢俾足幾多，冇扣減既，我試過有某啲店，會冇啦啦少咗架喎，為乜呢？人客想俾部相機食下野，開心 share 俾朋友睇，大大盤，擺得超豐盛，幫你賣埋廣告添啦...睇下，兩個人都擺到咁滿，正...除咗剌身，我都好在意有冇咩創意食品，要知道，放題任食係基本，間間一樣，要爭得贏，就要花心思，呢到都有唔少創意食品，我老婆就鍾意呢款「忌廉蟹肉棒」，而我就鍾意呢到有爆谷，有綿花糖，同埋任飲白酒同埋梅酒。…查看更多

香港人係乜呢？香港人係...急速有效率急到食餐飯都趕頭趕命，當然，呢種係普遍既態度，唔係個個香港人都係咁。但有啲餐廳就趕住做多幾轉，要迫你埋單，你都唔好意思要阻人發達。講咗咁多，都要入正題啦，呢間餐廳係就係趕頭趕命，但唔係食客，而係伙計。我眼見佢地好忙，忙住送上美食，又要放好位置，又要set 時間去蒸，每道菜都蒸唔同時間，點記既呢？最慘係有人食得快，有人食得慢，但我留意到，服務員(我唔知應該叫佢傳菜好呀，還是廚師好？)係會等我食完先一道菜，佢先至會蒸第二道菜，我估係佢唔想蒸好之後，我未食完令到第二道菜攤凍啦。但我食得慢，變咗佢又要等我。但佢都自動隱形，唔想俾壓力我，所以我覺得呢到超好服務喎。再睇下牆上有好多明星合照，相信呢到既話事人應該幾好人緣。講到蒸氣火鍋，市面上都有唔少，以前我都有食過，多數都係蒸海鮮，因為咁樣最能夠保留食物既鮮味。呢間餐廳每道菜式都好講究，而且食材係極之優質，以及童叟無欺，點解咁講呢，因為有隻蜆蒸完唔開口，我都不以為然，但個服務員好主動話幫我地換過隻。呢D信心既保證，一隻蜆就收買到我啦，哈哈哈。先黎第一道菜，黑松露蒸水蛋好心急呀，等咗6分鐘，終於可以食啦，黑松露唔會好搶，只會有少少松露味，最怕係好大陣味，影響到之後食海鮮既鮮味。鮮鮑 + 沙包蜆洗得好乾淨，一啲泥味都冇，食蜆最怕有沙，食得唔過隱嘛。海蝦 + 日本元貝唔知點解要用竹籤串超隻蝦，應該有好大學問係裡面美國桶蠔啖啖肉，而且係熱既，蠔呢…如果係咁大隻呢，保險啲唔好食生既，但好果邊爐呢，最怕係煮得太耐，蠔邊會韌，但呢到計過度過時間，完全係熟而不韌手剁豬肉丸 + 墨魚丸呢兩粒丸都係眼白白睇住佢由生變熟，在生既時候，你分得出佢係手剁既；熟咗，係會食得架啦！金銀蒜蒸勝瓜 + 薑蔥蒸鮮魷食咗幾道菜，如果仲未飽，就加埋呢兩個餸，相信應該好滿足。…查看更多

同個同事在尖沙咀做咗半個 job， 要放 lunch，但渣車在尖沙咀冇位，又插針都插唔入，結果去了大角咀。點知，大角咀都冇乜位，轉了幾條街，發現有個違泊既空間，望多望，都有幾間食店，結果就停埋一邊啦。同事對食有「要求」，除了味道，首要係「色」！其實都只係得兩條友，佢有佢堅持，唔通分開食咩！算啦，都係唔提政治，講返正題。係大角咀呢啲舊區，交通唔方便，除了區內人同你爭食，就係我地呢啲渣車既區外人，有車位，有得食，哈哈。冇車位，違泊碰運氣。好在呢間餐廳有兩面非常之開揚既落地玻璃牆，望住架違泊車食晏，係安心少少既。高雄蔥香肉排配香菇肉燥飯台灣菜，都係肉燥飯啦，呢到既肉燥飯唔係好多肥皂同豬皮果種，幾好。又唔想食酥炸雞，太熱氣，肉排啖啖肉，最啱我食肉獸既本色。加多杯熱蜂蜜紅茶，消下啲油膩。…查看更多

好耐都冇見過有餐廳可以做晚市需要等位架啦！好在唔係等好耐，五分鐘左右啦！今晚幾平靜，一於出街消費，食返之前食開既兩個餸加多個菜，兩口子，份量啱啱好。黑椒雞中亦想像中，以為佢會係乾身，有好多黑椒，但原來係濕炒，仲配埋青椒，紅黃綠色都有。都吸引到我眼球既。味道係 very good，有黑椒既香辣，夠野味；同時亦有蜜糖既甜味戥返勻。黃金鮮魷個咸蛋漿做得唔錯！啲鮮魷炸完會出水，本應會濕身，咸蛋漿就「痴」唔住。所以好講個廚既功力。意思係，如果做到外脆而唔硬，內裡唔出水但又唔乾到似柴。真係唔容易。呢個廚可以做到外脆，但裡面仲係有少少濕。但係個皮唔係勁厚，所以我都會比個 like 佢既。啫啫通菜煲通菜如果用煲上呢，會怕佢焗到乾晒或者黃金金。呢到就保持到啲通菜係有水份，唔乾身。加上蝦乾夠野味。但重點係佢唔會好咸，同埋唔會好油。食菜都係為健康啫。如果太多油，又或者太咸都唔好。佢好就係好在呢兩樣都唔多。…查看更多

請問邊個可以幫下我呀？如果你老婆又要食海鮮，又要食泰國野。結果都係 Open Rice 搵到你。其實咖哩蟹都有好多泰式餐廳都有，但我老婆又唔係好鍾意食蟹。佢最鍾意食魷魚，呢到真係啱晒佢啦！係九龍城，真係大把泰式野食。但開得名有海鮮既，我估應該唔簡單。先黎一份蟶子(牛油蒜蓉燒蟶子)先：我老婆就讚不絕口，因為隻隻蟶子都大大隻。燒出黎都好野味。但我就先入為主，覺得蒸好食啲。不過…燒既都有另外一番之味，因為佢係用牛油燒既，好重牛油味，成件事係，在不對的地點，遇上對的事物。自己體會啦。泰式燒原隻鮮魷：個經理誠意推介，真係冇介紹錯，超大隻，$150都唔洗，啖啖肉，超大滿足呀。馬拉盞通菜 (鐵板豬頸肉啫通菜)：食泰國菜，我諗唔到有其他選擇，好似泰國就只種通菜一樣，馬拉盞已經好野味架啦，佢仲加埋豬頸肉。真係一試難忘，而且超大碟，鐵板上，食到尾都仲暖既。青咖喱海鮮：用料豐富，有帶子，青口，魷魚，大蝦，豆角，用黎點烤酥餅係一流既。最後都要讚下呢到既服務，我真係好少見會主動添水既服務員架啦⋯⋯，另外，我地唔小心打瀉水，一啲都冇黑面。抵讚。…查看更多

係尖沙咀送完貨，同老婆搵到個街邊停車處，就違泊一陣，望上去呢間鋪，又可以望到架車，於是乎就幫襯下啦...上到去，可能係啱啱開檔，個經理話星期日開到第二朝清晨四五點。所以六點半都唔係咁多客。我都冇所謂，我揸車又唔飲酒。最緊要係好味，加上清靜啲仲好，😊。先講下環境啦⋯⋯呢到真係做 bar 既，入到去就見到好多玩具，有桌球，好多膠杯（用來疊既）。如果黎飲酒，應該幾好玩。另外，佢仲有個幾大既房，一班friend 開 p 都啱呀。之後要講下食物啦⋯⋯1. 先試試個 千島海鮮 pizza 先用料十足，熱辣辣又鬆脆。2. 水牛城辣雞翼其實就唔係好辣，但好野味，而且醃得好入味。3. 卡邦尼意粉賣相好唔在講，啲汁香濃，用料一流4. 炸薯條粗薯條，我既至愛。最後，酒吧必有既熱氣之「損」- 蝦片免費蝦片…查看更多

今日各區道路都被堵塞，結果老婆可以早走，咁就去大角咀，避開啲示威人士啦。本身都冇乜胃口，心情唔好，食乜都唔好味啦。但消費下，幫幫經濟啦！又好彩，係大全街有位泊車，泊好就見呢間店超靜，就入去消費啦。太值得加許啦...首先，服務好好！個石板牛柳好味唔在講，但為乜會咁好味呢？係個廚師勁！？可能係，但我相信，最主要都係侍應妹妹既服務。佢可以放低石板然後行開做自己野，但佢就教我，塊石板有400度，上面煎一分鐘，下面煎一分鐘，就一成熟，想食熟啲，就順紋切開，自己煎熟少少。的而且確，今次真係食到自己想要既牛排啦。平時買幾靚既和牛排，點煎都做唔到咁既效果。就係呢塊石板，同埋侍應妹妹呢種技巧。多謝晒你！再配合埋呢到既黑松露汁，又係值得一讚既，佢唔會好濃，少少咸，配合牛柳，係好好味。雖然話 8oz 咋，但兩公婆都食唔晒。因為叫咗個海南雞飯，同埋追加咗個焦糖燉蛋，待應妹妹幫我地跟餐轉，又慳多十幾蚊！謝謝你呀！…查看更多

好一碗咖喱牛肉醬煎雞扒飯其實我又唔係好食得出佢係咖喱牛肉醬喎，隔咗好一段時間，睇返張單，竟然係咖喱醬，我仲以為係台灣滷肉碎添。正如我所講，有圖，佢真係淋滿成碟飯都係肉碎汁，所以食落好濕，唔會好乾，係急速食午飯時，係非常好既做法。因為唔洗食兩啖就飲水。但點解要食得咁急呢？因為又係泊車既問題囉！之前泊係附近，過咗鐘少少，就 $320，真係好氣頂架嘛！但附近真係冇乜食店了，食完仲要得返好遠，仲要係大斜路攞返架車！都係講返個飯啦，個雞扒都唔錯，其實淨係肉碎都好開胃了，個雞扒夠入味，係唔花巧，一般荼餐廳都做得到既基本野。…查看更多

今朝一早要 OT，去到鰂魚涌，咁緊係要食埋早餐先做野啦，HeHe，又要 claim 公數啦。原本諗住去麥當當架，但又唔想食啲垃圾食物，又想支持一下環保，同埋支持一下小店。點知，係公司附近，平時都唔會去食晏既呢間小店，佢既沙嗲牛肉麵，佢既沙嗲汁係咁 good 架喎⋯⋯係我食開早餐既餐廰，果啲沙嗲汁根本唔係沙嗲汁，但沙嗲牛肉麵，就一定係唔洗諗，食親早餐就必叫架啦！食食下，我已經唔記得咗咩叫沙嗲味了！今日可以搵返沙嗲牛肉既沙嗲味。雖則話個汁做得好味，但牛肉就有根，唔林，不過都仲食到牛肉味既。兩個餸，牛肉加煎蛋，加多杯熱奶茶，盛惠$32…查看更多

呢到既招牌係手打牛丸，但我對牛丸冇乜大興趣，亦沒有太大既要求，所以你俾普通牛丸或者手打牛丸，我都食唔出有咩分別。附近都有幾間麵店，唔叫「正宗手打牛丸大王」，生意都唔容易做呢所以我都係揀咗個 賣相唔錯既牛腩河 ，結果係普通，腩汁係香濃既，但牛腩有少少「諧」，但肥皂又好肥。但後尾睇返，佢仲有一款叫崩沙牛腩，貴成 12 蚊，唔知分別大唔大呢？下次試下先。三尖八角既味道好重，啲粉碎濕濕既，或者係咁啱啫，我唔會怪佢既。呢到既環境有少少似香港仔啲魚旦河麵檔，不境都係賣麵啫。另外一提，呢到都有一種街坊情懷既，因為我見個姐姐同啲食客都有傾下計，都有不同的熟客支持既，哈哈。…查看更多

我個標題唔係講粗口呀，係呢間餐廳同老夫子連乘，整咗個餐，其實都唔關老夫子事啫。間餐廳冇任何佈置係關老夫子事，只係個餐牌印有老夫子，個餐既指定杯係老夫子，冇其他野係老夫子啦。個餐係茄汁原塊厚切豬扒芝士焗飯、配凍忌廉朱古力。係唔係一啲都唔關老夫子事呢...？都係講下個焗飯啦，份量超足夠，未食到一半，就已經飽了。我一向好有衣食既，所以都係食晒，但結果，....我係有兩次嘔返出黎又吞返既。好核突，但係係事實。哈哈。個飯好多汁，唔會因為係焗而變得乾。塊豬扒好大塊，但豬骨就好細。真係抵食夾大件。至於杯朱古力呢...如果係熱既就好啲，因為凍既唔夠香，有冰又唔夠濃。…查看更多

剛剛掃了一掃食評，個題就話「服務有待改善」唔知係唔係見到個食評，然後又真係改善咗呢...我又唔覺服務唔好喎。或者我唔係繁忙時段去啦。我抱住個瞓著咗既仔，同老婆共三個人，唔洗等位，有位坐。坐低慢慢點餐，都冇人催呀，我初頭揀豬肉濕炒河，以為係豬頸肉，個侍應讀一次我指著既菜，我先知自己搞錯，結果改豬頸肉金邊粉，但望兩望，好似辣架喎，問待應辣唔辣，佢好有禮貌話係辣既，我又轉返豬肉濕炒河，咁玩野佢都冇嬲。但食物就一般啦...先黎個湯好重口味，胡椒味太重海南雞飯，似白切雞多啲，冇味道可言炒通菜，通菜好有渣，雖則話所有蔬菜都係纖維，但真係食落好有渣，或者啲菜本身嫩啦。…查看更多

今晚又要係將軍澳 OT 啦，但又趕時間，只好快快手，叫個外賣食啦，好在有得 Claim 公司，咁就食好少少啦，但唔知食乜好，睇極餐牌，由頭睇到尾，又由尾睇返到頭。結果揀了個蝦仁炒蛋飯，飯同餸係分開裝既。先講下個飯先，係軟飯黎既，係唔需要話咩飯有飯香之類既廢話。總之就係好啦。個蝦仁炒蛋呢...係濕咗少少，而我又唔覺得滑咗去邊。啲蝦係大隻而且又唔會話無味既。食得出蝦仁係有醃既，係有味既。有陣時某啲廳餐係唔知點解啲蝦係無味既，好似食大菜糕咁。呢到做到既蝦仁炒蛋係整體黎講 Good 既。…查看更多