燒豬的个人专页

自從有次食過西式午餐後，已經放棄翠河既西餐，只係晚飯食魚餐，有時叫蒸魚有時叫薑葱魚腩煲，都係唔錯的。上星期個胃唔舒服又唔想食粥，就去食個late breakfast。以往會去商場另一間茶記的因為佢個沙嗲牛好正，件多士係丹麥酥多士。但唔知幾時開始轉咗用餐包或白麵包，無多士供應了！即時downgrade晒個早餐，怪不得人氣都下滑了。講返翠河，今次個經典早餐竟然有件唔錯既油多。牛油份量ok，烘得有多士金黃色绝不馬虎，比起搬舖前有大進步。係舊舖時件多士乾睜睜的，同白麵包分別不大，我次次都要求加牛油，否則完全無意欲食佢。但而家件油多已經煥然一新，由可有可無的配角變成呢份早餐不可或缺的重要元素。總括嚟講呢份經典A餐既質素對得住捧場客。但通粉個湯底仍有進步空間。…查看更多

呢間又係慕名而來的。星期六附近上班族少咗，人龍都短咗。排咗十零分鐘就可以入座。本來想食撈麵的，有豬油應該好香，但見佢話湯底係胡椒豬雜湯，最後都係點了豬雜湯油麵。果然無失望，湯底重胡椒味，暖胃。豬雜入味，款式多，應該係新鲜貨。下次可以試豬雜淨食加豬油撈麵！呢間絕對係可以再返cheuk的…查看更多

今日適逢星期六去開銅鑼灣，記起翠苑糖水舖係原址重開了，梗係去食返碗腰果露啦。睇餐牌見佢只係賣21蚊咁平？以為係良心店舖姐，點知真係中伏！質量完全唔係以前果種真材實料既全生磨腰果露。而家的粉漿好重，粉未溶得晒，仲見到一粒粒。味道好甜。我估可能係得六成腰果糊，四成水加粉漿再加油等佢滑d。總之好難食。我食糖水咁耐未試過食剩咖。明白食材貴咗，但我寧願佢收三十幾蚊碗比返足d料好過自拆招牌。好失望近年香港好多老舖的食物水準不能保持。唔知係以前老板易咗手定點，如果後繼無人不如光榮結業就算。比人做衰咗，晚節不保，賺咗顶手費都補唔返個商譽臭咗。可惜！呢間以後真係唔洗再去了。…查看更多

想試呢間潮州新店好耐。適逢今日端午節，家姐地约埋我同二佬一家帶老媽子出關飲茶兼做節，於是就揀咗呢間。茶市點心選擇同一般酒樓差不多，味道亦一般。潮州嘢就試咗煎蠔烙，方魚肉碎粥也是乏善足陳。點咗枝竹咸菜豬肚但竟然無。甜品既水晶包，芒果卷等又無。反而中午餐牌上無既反沙芋佢話有，咁一定要試啦。但好失望，個反沙芋好似唔係正宗做法。似係將芋頭炸好後掉落沙糖堆撈勻佢就當係。如果係普通酒樓你比d咁貨式我我算自己唔好彩，但你打正旗號係潮州酒樓我就覺得不可原諒。所以無下次囉。…查看更多

點咗個三寶套餐，250g 大份的牛腩片，橫隔膜同牛舌，加十五蚊upgrade個細飯做海苔温泉蛋飯。材料新鮮又足份量。性價比高，滿意的。服務方面有大改善空間。店面雖然不大但樓面只得两位侍應，接待，出餐，執枱一脚踢，遇上好似我呢d用唔到電子錢包自助落單既，又要幫我係counter做，所以好多時佢地會應接不下。但職員已經好努力了，希望美心集團請多個人幫輕吓。…查看更多

快一年無食譚仔了。舊年五月開始低醣低碳減肥後，幾乎戒晒粥粉麵飯及麵包。近两月中午至食返澱粉質。附近商場竟然開咗間三哥，當然忍唔住要食我至愛既麻辣豬腩片米線同土匪雞翼啦。味道依舊，又唔洗搭車去香港仔，無理由唔速速幫襯吧？…查看更多

期待已久，剛進駐鴨脷洲利東商場的韓風餐廳终於農曆年前開張。雖然無韓燒，但餐牌選擇都不少。午餐點了炸雞豚骨湯粉絲及以優惠價追加芝士焗西蘭花。味道ok。下次試埋石頭鍋飯再評論韓味濃不濃。…查看更多

今年又取消了團年飯。但祖先一定要拜的。約定呀哥一家同姪女年廿七返來還神拜祖先，家姐地就唔來了。咁拜完都要食飯，除咗祭祀既雞同燒肉又唔想再煮了，所以近近地係商場大家樂訂個細盆菜夠我地七，八人食。用DBS有早鳥優惠，伍百幾蚊好大盆。足料，味道好。呢幾年都試過不同食店既盆菜，大家樂出品算穩定，性價比不錯，價錢又豐檢由人，做得唔錯。讚!…查看更多

利東間麥當勞上星期裝修完工。比起商場既裝修進度，佢算好快了。地方比起以前細咗，好似無咁好坐。我估我都無乜意欲堂食了。今日放早，落車後忽然想食個蘋果批，就入去買外賣。職員哥仔好快手咁篤篤篤幫我係點餐機落單。由於利東已算老人邨，相信要上咗年纪既街坊用熟部點餐機要多d時間囉，期間就辛苦d職員了。…查看更多

因為朋友介紹係馬寶道街市附近有間餅店的角仔，蛋散唔錯，就專誠去北角辦吓年貨。到埗後先係附近揾食。經過森森食堂門口見到將近两點了，午餐差不多過又未到下午茶時間但仲好旺場，set lunch(供應至三點)又幾啱口味就入去試試。睇餐牌原來仲多選擇，又可自由配搭，啱晒我呢類三心两意，左右逢迎既人。經過一輪思考，分析，終於拍板叫了一個迷你焗白汁雞皇意粉(其實份量一點也不少)，頭盤要了素春卷，小食就要雞翼(好好味)。全部熱辣辣上枱。加多杯咖啡都係$56埋單，抵食。…查看更多

呢間係西營盤咸魚欄既點心小店，格局雖然係普通茶記裝修但都坐得舒服。三位樓面呀姐服務比好多酒樓更貼心，不時主動幫客加水。食客除街坊外也有不少區外客。佢地既點心相信係自家廚房製造非工場交來，味道不只新鲜好味，而且性價比仲極高。果日因為得自己一個人去所以只食咗三樣嘢:叉燒腸，鸭腳扎同素翅灌湯餃。通常鸭腳扎入面舊芋頭我覺得係下欄從來唔會食的，但佢呢度整果件好靚，食落好粉，完全癲覆我一值以來對鸭脚扎入面舊芋頭的不良感觀。灌湯餃好足料，湯又夠熱。隔離枱位婆婆埋單時猛讚d點心好味，特別係咸魚肉餅飯舊咸魚喎。佢地既點心的確唔錯，但我更欣賞佢既茶竟然好滑，好似用山水沖既咁。收六蚊位茶錢真係超值。以後上環買嘢一定再去幫襯。…查看更多

翠河在新址重開後今日第二次幫襯。上次只匆匆食咗個下午茶，見佢人手係少但剛開張比d時間佢改善啦。事隔两星期今日去食晏。員工多咗幾個但都似係無乜受過訓練既。翠河話哂都係連鎖集團就算請唔到有受過專業訓練既人，公司都應該內部調教吓至比佢地落場做。今日我叫杯咖啡少奶，送嚟果杯有d污漬係杯度梗係叫佢換過杯啦。全場員工裙拉褲甩咁忙住出餐，執枱，出外賣，好不容易叫停個嬸嬸幫我换，但换來一杯d奶仲多過奶茶既。無奈再叫佢換過杯但佢唔多采我，果時一位高级既係附近見到就叫佢即安排，但個嬸嬸好似未瞓醒咁攞住盒奶行埋來。我係要少奶啊!之後高级果位即喝住佢叫佢重新磨過杯咖啡比我。幫我落單果位似中層，但態度都差。我坐落後睇緊餐牌佢就行埋來話落埋我張單先。但我都未決定食乜，又唔係我叫佢來落單，佢竟然好不滿咁勵我一眼就走開。什麼態度？我食完碟意粉但仲有大半杯咖啡未飲，唔知點解忽然有個人坐埋來話搭枱。中午時間明白卡位要搭枱好正常，咁我咪要求d侍應放塊格板，大家三唔識七，我唔知我自己有無新冠病毒咖嘛！個侍應好勞嘈咁話:無呀! 佢地係門口有個牌叫人排隊但好似唔見有人帶位所以d客咪亂坐，見卡位一邊有位就想坐唔理疫情。感覺呢間服務水平真要提高。…查看更多

今次我地四人飯聚集團唔食晚飯，約咗中午係呢間小館飲茶，試吓佢d點心。首先來個羊肚菌花膠灌湯餃。份量已經對得住個價錢，加上個足料無味精燉湯底，CP值爆燈!必食之選。脆卜卜"雪茄"春卷全條釀入滿滿的蝦膠，滋味!其他點心都水準之上。叫咗窩珍珠貝淮山麵，牛奶白的漁湯魚味鲜濃，真係誠意可加。…查看更多

偶然係華強北搵到呢間川菜館．裝修典雅精緻．餐牌上除咗提供川菜必食既水煮魚,酸菜魚,夫妻肺片, 麻辣肥腸等等之外，亦有唔少新派菜．例如扣肉釀糯米,水晶鵝肝,豆花更可咸可辣．菜既份量都唔少．由於我地只得三個人,所以只試咗涼菜八小碟, 貪可以一次過品嚐多款小吃, 例如 : 麻辣脆豬耳, 夫妻肺片, 豆腐乾, 水晶肉等. 最特別有一個好似薯粉條浸係橙汁裡, 甜甜的, 可能係幫助解辣; 酸菜魚（半條）肉厚嫩滑, 微辣. 早知叫一條也未為多. 另外兩個素菜, 無論賣相,味道都屬高水平．主食就點咗一個四川涼粉及一個涼拌麵. 涼粉味道酸酸辣辣, 好開胃; 拌麵就主要有醬油同蔥花, 很惹味. 該店供應豆漿免費任飲,飯後水果任食. 但價錢唔貴. 還會再嚟! 以後唔洗次次都西湖春天了…查看更多

慕名到文華酒店一嘗名聞遐邇既自助餐, 水準果然高於一般五星酒店. 食物選擇種類恰到好處. 冷盤不時不食, 所以現在只供應南半球既紐西蘭生蠔. 翡翠螺, 藍殼青口, 長腳蟹腳, 大頭蝦等都係絕對新鮮. 無論紅肉煙三文魚或日式shashimi三文魚都係上等貨色! 　熱盤有中有西. 即使普通菜式如sweet & sour pork都一絲不苟，肉質肥瘦適中，有彈性，粉漿薄唔會食到成舊粉．到文華用餐當然不能不食甜品．Buffet供應既甜品款式比主菜還多．我飽到竟然錯過了Tiramisu及自家制雪糕！不過卻無意中食到個精彩既cream brulee.　點解話’無意中’呢？因為近年係坊間食到既所謂cream brulee，同港式燉蛋無兩樣，大部份仲好’鞋’，所以放棄好耐了．文華呢個就好creamy,　蛋同忌廉可謂水乳交溶，軟滑無比　香濃既cheese cake再加上一杯精選紅茶為呢餐飯劃上完美句號．…查看更多