西沙茶座 (已結業)

星期日雖然天氣麻麻，但係我地一家人照舊都會約埋其他屋企人一齊SUNDAY聚。今次阿姨揀咗去西貢方向近烏溪沙嘅西沙露天茶座，出動一架7人+5人車入去，門口免費代客泊車，非常方便。泰式生蝦，蝦好爽口，醬汁亦調製得非常惹味！串燒，牛肉一定最少要叫半打，豬雞就可以自由配搭，燒得好香，肉汁又冇流失，最緊要係冇過份醃製。冬蔭公湯，大大隻蝦，酸辣比例控制得好好！燒烤牛仔骨，最驚喜嘅一碟，全部人都讚不絕口，燒得好香，都嘅肯定係用炭燒，又淋又入味。北印度咖喱羊肉，非常好食嘅咖喱底，羊肉又夠騷味，點薄餅食就最啱。蒜蓉炒芥蘭，唔掂，淥熟先再炒，差！馬拉盞炒通菜，呢個正常好多，好味！菠蘿焗飯，好鍾意佢加咗一D泰國香腸片，非常好味，平時唔喜歡食菠蘿焗飯嘅我，都食咗兩大碗。食泰菜，當然一定要配啤酒啦！