Fastcasa (已結業)

成日黎上水都留意唔到唔呢間fastcasa，原來佢係日頭做cafe，夜晚係bar嘅經營模式，難怪有時會錯過咗。見佢環境都闊落，一於試試佢。可能因為啲人都以為呢度係bar，所以晏晝四點左右冇咩人。嘢食嘅選擇唔多，主要分為熱狗同意粉類，我同朋友就揀咗沙嗲牛肉意粉同肉醬意粉，加咗炸薯條同雞翼。嘢飲就只提供汽水。因為晏晝人流唔多，只有一位員工，要逐樣製作，首先上枱嘅就係肉醬意粉，肉粒比較少，調味適中，味道唔錯。沙嗲牛肉意粉，平生第一次食呢個配搭，又幾特別，味道上有啲驚喜，比肉醬意粉更好食，如果沙嗲牛肉嘅份量可以多啲就更好了。炸薯條同秘製雞翼，兩樣食得出熱辣辣新鮮炸起，所以味道都幾好味，雞翼嘅調味好豐富，食得出有香草。