Mark One (已結業)

平時去 Mark One 多數都係食晚餐，午餐都真係第一次。今次一行五人嚟到，每個人都咁啱叫咗唔同主菜。未上主菜之前，當然係先食蒜蓉包。呢度既蒜蓉包無論係晚餐定午餐，都係即叫即焗即上，又香又脆口。真係怕熱氣都要食多一兩舊！我點既主菜係炭燒紐西蘭肉眼扒伴黑椒汁。出面食扒最怕生熟程度控制得差，特別係午餐時間。呢度就完全冇呢個問題。叫咗三成熟，一切開就見到生熟程度啱啱好，食得出成塊扒既溫度都好平均。陣陣既炭燒味令到個肉眼扒增添一份新鮮感。食完牛扒，當然要食番啲甜品中和下。甜品拼盤有紅豆芝麻､芒果粟子同桃卷。個人就最鍾意紅豆芝麻。芝麻既香伴著紅豆既甜，呢個配搭非常之好，極力推介。整個午餐可謂令人非常滿意。美中不足就係午餐食得有啲趕，唔可以慢慢細味。唯有等下次再試！