泰亞萊第2店 (已結業)

日日 lunch 都唔出去食，日做夜做，再留係公司唔休息呀，真係屈住屈住，要出去鬆一鬆 ~ 剛好今日有同事要請埋我一齊出街食，咁我介紹佢地黎泰亞萊啦 ~ 叫四碟，一齊 share 食多幾款，呵呵 ~海南雞飯，必食。去骨雞肉保持水準，又滑又嫰又雞味濃，好正。但係個飯失手，今日比較濕，唔夠乾爽，味道較為淡口，但撈埋個泰式酸汁都仍好好味既，其實個汁係依個飯既靈魂，都佔幾重要既位置，無左佢味道差好遠。肉鬆蝦醬炒飯，甜得得黎好香，本人唔多好蝦醬，但味道都係唔錯，值得一試。炒功算可以， 用濕淋淋既蝦醬黎炒飯，算係好乾爽架啦。豬頸肉炒金邊粉，金邊粉比想像中好食好多好多，可能因為之前係愉景灣試過間泰式餐廳既炒金邊粉，口感腍，味道甜到我食唔落，可能受依個唔開心既經驗影響掛。依次炒得金邊粉少油乾爽彈牙又嚥嚥靭靭，混埋豬頸肉一齊炒，好有咸香，好味道。