湯煲私房火鍋 (已結業)

我個火鍋控朋友又出動，今次約我轉戰上環區的火鍋。這裡其實是一間私房火鍋，所以格局跟一般火鍋店很不同，好有home feel。店員極力推介私製XO醬，內裡有好多蝦米，味道有少少辣，好惹味。湯底要了一個什雜豆腐白湯，貪佢清啲而有好多蔬菜。啖湯都幾甜的，豆腐就好滑溜。飲品叫咗 1 Jar 青檸流打，貪佢清涼之餘又醒胃。店員話今晚啲鮮牛肉和墨魚滑都好靚，所以我哋每樣叫一份。另外，再點了鱔片、鳳城水餃。果然無介紹錯，牛肉好鮮，又腍又滑，牛味出眾。將墨魚滑整成一粒粒去淥，然後將佢哋串成墨魚蛋串，咁樣食法，只有我個火鍋控朋友先諗得出。墨魚蛋好鮮味，既爽口又彈牙。鱔片切得厚度剛剛好，如太薄就食落無口感，如太厚就較難熟。食落好爽口，而且有種食脆鯇的感覺。鳳城水餃，皮薄餡靚。內裡除咗有蝦肉、豬肉等慣常材料之外，還有木耳絲、蟹籽等，所以食落口感和味道都更加豐富。喺呢度食火鍋好舒服，唔嘈吵、唔大煙，仲好有家的感覺。