喜鍋 海鮮‧火鍋‧小廚 (已結業)

同兩個朋友嚟旺角行完街，搵到呢間火鍋店好似唔錯，所以一於試吓。⭐️海鮮鍋十分足料，有蝦、蟹、扇貝、蜆同菇蔬，海鮮都幾新鮮，特別想讚蝦真係好大隻，而且蝦肉彈牙。⭐️蟹籽墨魚油炸鬼必食之選，呢個小食真係有驚喜，估唔到油炸鬼同墨魚滑咁夾，一啖入邊有兩個口感，好得意。⭐️頂級安格斯牛頸脊雪花紋理清晰，油脂分布均勻，厚身有咬口，牛肉味濃郁。⭐️自家脆響鈴幾大份，厚身，夠脆，而且無油膉味，放落湯底5秒即刻吸晒海鮮鍋嘅精華。⭐️手打五寶丸有墨魚丸，蝦丸，鯪魚丸，牛肉丸，豬肉丸。蝦丸質感結實彈牙，牛肉丸好似平時去酒樓飲茶嗰啲牛肉球咁，食到有啲陳皮，豬肉丸幾得意，好似食緊梅菜豬肉咁。⭐️魚皮餃魚皮餃晶瑩剔透，粒粒都脹卜卜，個皮彈牙又煙韌。⭐️蔬菜拼盤有生菜、菜心苗和白菜仔，全部都新鮮翠綠。Overall 來講嘢食質素真係好高質，而且店員好有禮貌，同埋好細心，主動幫我地換碟，嘢飲飲完又會主動問我地要唔要水。重點係佢哋唔係播viutv not tvb!💛