FLIPPER'S (已結業)

近排日本梳乎厘班戟大熱，為食既我當然要去試下！可能早去既關係，等左一陣就入得。點左士多啤梨藍莓香蕉班戟同榛子朱古力焦糖香蕉班戟。士多啤梨藍莓香蕉班戟顏色鮮豔，賣相好靚。梳乎厘班戟好鬆軟好滑，入口即溶，而且有好香既蛋味，超好食！士多啤梨好大粒好甜，啲cream好新鮮好滑，一啲都唔膩。將班戟士多啤梨同cream一齊食，好夾，味道一流！榛子朱古力焦糖香蕉班戟賣相冇士多啤梨藍莓香蕉班戟咁靚，但佢既焦糖香蕉唔錯。焦糖片好脆，加埋軟熟既香蕉，一脆一軟，好有口感。仲有榛子cream同果仁碎，令口感更豐富。個人覺得士多啤梨藍莓香蕉班戟比較好食。唔好以為食梳乎厘班戟好似好左陣風咁，唔覺唔覺食晒成碟，都會好飽肚。價錢方面，覺得貴左啲，但都值得一試。