諾亞半熟蛋糕專門店 (已結業)

公司大佬last day, 無乜好野益佢，唯有請佢食個cake, 狂賀佢終於甩難，搵到份好工🎉個蛋糕，我係提早一日拎返屋企，再由屋企托返公司 (😔無計…晨早流流鋪頭未開，中午又蛇唔出去買)好彩店員都好細心，問晒我返屋企路程同埋去公司路程…俾足夠嘅乾冰我攞返去，又教路叫我用個冰包傍住返公司，咁先拎到返去。要食新鮮蛋糕，唯有花小小心思喇~講返個蛋糕，鋪內有好幾款都好吸引，但最引起我食慾都係呢個朱古力溶心芝士蛋糕，蛋糕面果層令立立嘅鏡面朱古力，見到都想食😋店員仲話呢個口味係少甜，啱晒大佬個蛋糕入口creamy亦好香朱古力同芝士味，仲要少甜，本身都幾好食，以呢個價錢都算抵食，不過我個人覺得，如果個底層蛋糕可以加厚少少或者係脆脆底更好，多d口感😋