鏞記酒家

营业中

休息中

公司有位合作咗好耐嘅同事下個月要移民，一team嘅同事就約埋食餐飯，地點揀咗喺鏞記。揀呢度，大家都覺得佢夠經典，有啲香港情懷，作為farewell飯局，個地點都幾有意思。先嚟個蝦籽紮蹄，豆香同蝦籽嘅鮮味，相當開胃。招牌嘅炭燒燒鵝拼叉燒當然唔少得，燒鵝皮香肉嫩，叉燒都保持到水準，一上枱好快就俾人掃晒。鵝肝醬百花雞亦都好有驚喜，雞肉釀咗蝦膠，口感彈牙，面頭嘅鵝肝醬甘香豐腴，係好考功夫嘅一道菜。另外碟粵式乾煎大蝦皇都好搶眼，啲蝦幾大隻，用茄汁乾煎得好香口，酸酸甜甜幾開胃。再叫多個紅燒豆腐斑腩煲，熱辣辣上枱，斑腩夠滑，豆腐索晒啲汁，送飯一流。最後加多個清炒郊外靚時蔬，清清哋，平衡一下。成晚大家有講有笑，主角係我哋嘅同事，食物變咗配角。不過，都要讚下啲食物質素夠高，喺呢個充滿回憶嘅地方，同舊戰友道別，祝願佢前程錦繡，呢餐飯都算係一個圓滿嘅句號。