福岡漢堡扒 (厚福街) (已結業)

今日難得放假，啱啱去完波鞋街買嘢咁我睇吓附近有咩食，見到花園街有好多新餐廳，我係俾門口個電視廣告吸引到想試吓漢堡扒，其實佢係韓式漢堡扒但係個名叫福岡搞到有啲亂😂呢度有五款2人套餐，主要都係跟每人1分漢堡扒再加沙律、拌飯或者丼飯，價錢由$330-405不等….我本身唔係好鍾意食芝士，所以我就想食version2 個餐，芝士蛋蒜和牛漢堡及墨西哥辣椒和牛漢堡配上和牛乒乓韓式拌飯，佢哋可以加$8加大漢堡，加$38配小食，如果加特飲只係加$18。呢個餐首先有一碗麵豉湯及沙律，之後漢堡扒好快就到，有張紙提醒人客點様DIY漢堡嘅生熟程度，員工見到我哋手殘😅就主動示範一次俾我哋睇🤣只需用個剷仔落適當嘅份量再將佢壓扁，同埋每邊上下反幾次就可以食得啦！又有得食又可以DIY幾好玩🤣原來碗牛肉拌飯好鬼大碗，配上蔬菜同雞蛋辣醫撈埋味道唔錯！之後我哋叫咗兩杯特飲：西柚及巨峰提子特飲，佢哋係用方型扁身玻璃樽裝住，加$18咁大杯好抵🤣味道酸酸甜甜冇藥水味，可以去咗煎漢堡扒嘅油膩感。呢一餐原來份量唔細。冇加大漢堡扒但係食埋碗拌飯已經好飽，店員有禮貌主動幫客人及更換石頭，下次可以再試吓其他套餐。