鴨仔冰室 (已結業)

去觀塘嗰頭買嘢， 買完就係食晏時間， 今次想搵啲唔係大商場或連鎖嘅餐廳， 就畀我search到呢間鴨仔冰室，覺得間餐廳幾得意咁。 入到去，餐廳設計都幾特別，餐枱用嘅係紅白枱布，牆上貼有懷舊嘅海報，同埋周圍都係有鴨仔 裝飾品，懷舊得嚟又幾可愛。 午餐嘅 set lunch 價錢親民， 50蚊到89蚊， 我叫咗個西冷牛扒配炸蝦同薯條，餐湯或沙律我揀咗羅宋湯。等咗陣嘢食就嚟到，每次廚房一整完嘢食，就會撳一撳個鴨仔發出 bu-bi 聲音提醒侍應送餐，非常可愛!嘩， 好彩我早餐食得唔飽，個牛扒勁大塊又厚切，呢個價錢真係好抵，食到咁大塊牛扒。個炸蝦唔會炸過火， 香脆可口，但如果有多隻就更加好啦 。薯條好好食，係我鍾意嘅粗身薯條，就算放涼咗一樣都咁好食，個牛扒啖啖肉唔會韌，煎得唔錯， 不過真係太大塊啦 ，食完之後個肚完全係十成飽! 個羅宋湯味道ok，唔會太酸亦都唔會太辣，啱啱好。 餐飲要咗凍檸茶，味道正常。總括嚟講呢間餐廳cp值好高，價錢唔貴，大件夾抵食。