拾味正宗刀削麵館 (渣甸街)

营业中

休息中

近年市面上充斥著辣味、酸味的湯麵，食到好寡，想搵間清清淡淡又有啲獨特風格麵店愈來愈難。本人孤漏寡聞，認真諗諗，刀削麵，好似真係無食過約次，所以聽到公司附近有間之後，即晚放公就孤家寡佬一支公去試試。麵館一間，門面同裝修都係咁上下，而且點菜揀餸方式都好香港style，自己揀餸逐樣加錢。唔同嘅係麵底，主打刀削麵：湯麵、冷拌、熱拌⋯⋯揀碗湯麵潤潤喉嚨，搭蒜泥燻蹄同上海雲吞。湯底睇落清淡，飲落清甜帶微鹹，潤喉易入口，唔使再食重口味調味料湯麵咁heavy👍🏾刀削麵底口感幾豐富，煙煙韌韌幾有𡁻頭，而且掛到湯。其實麵質軟硬度可以要求，淋啲硬啲自己揀。雲吞係菜肉餡，味道上無咩特別。但係，個蒜泥燻蹄就唔同講法，蒜泥應該混合咗啲醋，酸酸地仲有蒜泥嘅香辛味，香濃刺激味蕾，配合軟嫩彈牙嘅燻蹄肉都幾惹味，一口接一口，同湯麵濃淡交替互相補位認真唔錯。望望身邊其他食客，好多都單丁幫襯，睇落都似附近街坊或打工仔，一個人的晚餐都揀呢間麵店，證明有一定cp值。