夏麵館 (始創中心)

星期六有親戚到訪，一行四人之後想食個下午茶，咁啱要去始創心中買啲嘢，經過見到夏麵館，餐牌都幾吸引，就撳張飛等位，大概15分鐘可以安排入座。入舖頭時都需要量體溫同用酒精搓手液。

一坐低先知原來有下午茶餐，價錢比正價平少少同多杯飲品，選擇都算唔少，而且仲可以升級加啲小食。

當日分別叫咗4個餐如下:-

1.青菜煨麵 – 湯頭白雪雪，味道香濃，調味適中。青菜應該係小唐菜粒，食落爽口清甜，一啲油都冇，感覺清新健康。麵質都屬少少煙韌彈牙，浸耐咗湯都唔會太發脹同變糊。

青菜煨麵

2.嫩雞煨麵 – 基本同以上個青菜煨麵係一模一樣，只不過多咗啲冇醃過味嘅雞丁肉粒，雞粒唔嚡口，不過又未算嫩。

嫩雞煨麵

3.香辣牛肉麵 – 湯頭顏色清澈味唔濃，一啲都冇辣嘅感覺。牛肉味淡，肉質唔韌，食落都冇黐牙，不過牛味欠奉。反而牛筋入味軟滑。

2

香辣牛肉麵

4.排骨擔擔麵 - 排骨(炸豬扒)同擔擔麵分開上，擔擔麵湯濃稠，花生味重，而且食落辣味就慢慢滲出嚟，都幾野味。排骨(炸豬扒)粉漿厚，豬扒肉薄，炸皮味道完全掩蓋豬嘅肉味。

排骨擔擔麵

所有麵底都係同一款。

升級小食追加咗:-

5.豆沙鍋餅 (半份) - 皮厚硬而唔脆，豆沙餡少，而且冇豆沙應有嘅紅豆香，甜度都比較淡。

豆沙鍋餅

6.小籠包 (4件) - 小籠包皮略厚，包內有適量湯汁，湯汁味道淡，肉餡都幾大，調味恰到好處，仲食到豬肉應有嘅味道。

小籠包

小籠包

7.油菜 (一份) – 烚菜芯鮮爽口清甜，不過不失。

烚菜芯

跟餐飲品4杯豆漿，豆香一般，勝在微甜。

食物比較一般以下，份量都好足夠。雖然價錢唔屬於太貴，不過覺得咁嘅價格唔應該係咁嘅食物質素。環境就檯與檯之間距離都唔太密，舒適度都係一般。而服務就呼喚極都冇服務員應你，態度都幾敷衍。