春田日本料理 (已結業)

3/2 大約7點到同家人(共3人)黎呢度食，之前有人話好多人等位，不過7點去到先得8成滿，8點幾走既時候先有幾個人響出面等。先叫左5客三文魚壽司($12客)，鰻魚壽司，再叫八爪魚壽司同熟蝦壽司($10-12不等)。d壽司普遍較細件，一口就食到。味道ok ，三文魚色澤夠光鮮，鰻魚較多骨，熟蝦就好鮮; 但媽咪話豉油就好好。熱食選擇真係唔夠多，最後叫左雜錦薄餅($42)，海鮮鍋烏冬($48)，雞軟骨餃子($22)。雜錦薄餅係最好食既，其實係日式燒餅，又熱又脆，d醬汁同沙律醬都好味，一人兩件都幾頂肚。兩個烏冬都唔錯，海鮮鍋烏冬d湯甜，料都夠，味道幾好;吉烈雞肉拎走第二日翻煮都仲幾好味，可想而知即食時會點。最後個餃子，d骨幾有咬口，不過我唔鐘意食韌野，所以對我黎講就一般。3個人食，加埋一大概$255，覺得都合理，d野食唔晒仲打包走。服務大致都幾好，因為都幾多服務員走黎走去，唔難搵到人。加水都加得幾密，食完野好快黎收碟，有一兩次真係快左少少，拎最後一件時就有人埋黎收，好似好趕咁。又有兩三次上錯野(冇點到但有野食準備上檯)或者問我地有冇叫過d其實冇叫過既野食，不過態度都好好。