白宮咖啡室 (已結業)

三心兩意嘅為食豬都幾鍾意食all day breakfast，但都唔明點解出面用料一般嘅都賣得咁貴。呢間白宮嘅all day breakfast價錢就幾公道喇。All day breakfast ($60): 好豐富，應有嘅都有，有埋炒菇就更正。雖然冇咩特別焦點，但樣樣都唔錯，特別係個炒蛋份量好多而且好滑。食完一份都幾滿足，抵食。拿破崙磨菇大蝦意粉($62): 大蝦好似有3隻，都幾彈牙但冇咩鮮味，磨菇嘅份量都唔少。成碟意粉整體比較淡味，而且蕃茄醬冇咩層次，味道一般。熱咖啡可以自選卡通人物印花，為食豬緊係要揀返豬仔啦。咖啡水準不過不失。伯爵奶綠: 好重茉莉花茶味，冇咩奶香，好似完全冇加糖，一啲都唔甜有啲難入口，冇飲開茶嘅為食豬表示唔識欣賞。