為食豬呢日去大埔玩，去到呢間cafe食個brunch。呢日係周末，過咗正常午餐時間都仲要排隊。deluxe full English all day breakfast:
呢個all day breakfast一上枱，餓咗一陣嘅為食豬對眼就發晒光。包括咗好多種類嘅嘢，啱晒貪心嘅為食豬。其中炒菇嘅份量唔少，加咗少少香草炒，菇味好濃郁。黑松露炒蛋雖然炒得唔算滑，但有香濃松露味搭夠。為食豬最欣賞係兩個好似窩夫，又似蛋糕嘅糕點。切開入面唔會乾爭爭，帶少少濕潤，比較似軟熟版嘅窩夫，帶啲蛋香味。就咁食其實已經好好味，加埋附上嘅cream，就變成一道甜品，好滿足。千島醬蟹棒蟹籽帆立貝薄餅: 本來為食豬都擔心係咪超薄批，好彩最後都係厚批。可以見到用料都唔少，每一塊都有一粒帆立貝，仲有蟹棒同唔少蟹籽，芝士都唔少嘅。 為食豬覺得批底做得唔錯，個底焗得脆卜卜，中間都仲保持鬆軟。

呢兩款食品都跟一杯餐飲，為食豬就揀咗咖啡同檸檬蜂蜜，兩杯都不過不失。見隔離枱嘅甜品好吸引，下次可以試埋。

為食豬去過咁多次長洲都未食過平安包，臨近平安夜緊係要食返個平安包啦！

印象中有紅豆，蓮蓉同麻蓉餡料可以揀，為食豬就揀咗比較特別嘅麻蓉。個包拎上手熱辣辣，都幾重手，㩒落好軟熟。搣開睇下，包身好鬆軟，唔會太甜都唔太痴牙。為食豬覺得個餡好特別，唔似一般食開嘅麻蓉餡，佢用嘅係白芝麻，食落比較似老婆餅入面嘅餡，帶少少煙韌嘅感覺，芝麻嘅味道唔太突出。為食豬覺得呢個傳統嘅包點都唔錯，最好嘅係佢唔太甜。

長洲嘅大魚蛋開到一街都係，其中有一間有好多款醬汁揀嘅就最受歡迎。 不過為食豬對於醬汁冇特別喜好，就揀呢一間比較出名嘅。
為食豬要咗一串大魚蛋同一串墨魚丸。因為多人柯打，啲丸係即刻炸返熱俾客人嘅。
大魚蛋一串兩粒，每粒有大約3粒一般魚蛋咁大。大魚蛋咬落好彈牙，魚肉味偏淡，的確比較適合配咖哩汁吊下味。
為食豬就比較鍾意墨魚丸，一串有4粒，炸過嘅外皮令墨魚丸更香，同大魚蛋比濃味同鮮甜，而且有粒粒墨魚。就咁食唔需要任何醬汁已經好好味。

為食豬行行下突然“貢”咗入一條窄巷，咁窄嘅巷都竟然有幾間小食店。為食豬揀咗呢一間嚟試，點知就好後悔。

小店提供嘅選擇都唔少，為食豬就揀咗薯條配安格斯牛柳粒($30)，可以揀一款醬，為食豬就揀咗芝士醬。由圖可見牛柳粒少到可憐，唔講仲以為係肉碎，薯條份量都唔算多，事關盒底墊咗啲椰菜絲。份量令為食豬失望，點知味道亦一樣。安格斯牛柳粒得嗰幾粒仔，諗住貴精不貴多，應該ok啦，點知入口好油膩，但一啲都唔香，相信唔係牛本身嘅油脂。除咗油，仲好韌，咁細粒都有筋。薯條呢，係熱辣辣炸起，但竟然唔脆，仲好油。

總括呢一間小店好馬虎，用料唔靚都不在話下，煮得仲好冇心，為食豬唔會再幫趁。環境亦唔衛生，店嘅前面放咗一個紙箱俾客人掉食完嘅蠔殼，紙盒等等，個箱滿到瀉晒店員都唔拎走，只係加多一個箱，實在好求其。

之前喺旅遊展得到贈券一張，趁熱潮減退同贈券過期之前嚟用咗佢。為食豬得到嘅係立食區嘅壽司6件set ，睇返menu咁樣6件一set 大約值100蚊，如果質素唔錯嘅話都食得過。立食區環境好開揚，但係冇位坐始終都唔太習慣，而且都幾累。其實立食原意主要係想turnover rate高啲，但即使呢日係周末晚飯時間，現場所見都係得3成客滿，不如加返啲座位俾客人舒舒服服坐低食啦。6件壽司set，由於menu上冇呢一set，亦都冇人向為食豬介紹過，除咗可以肯定有三文魚，吞拿魚，同油甘魚外，其他嘅都唔太肯定。不過每一件都好新鮮，即使係白色嘅魚都完全唔腥唔會霉，只有鮮甜味，亦有嫰滑/爽脆口感之分。三文魚同吞拿魚油脂豐富，好肥美，其中三文魚味道最突出。壽司size中等，啱啱好一啖一件，魚身唔厚但亦唔會太薄。壽司飯相信係用日本米，每粒都彈牙飽滿有黏性，醋嘅比例亦恰到好處。值得一提係同日本嘅壽司一樣，師傅已經將適量wasabi落喺飯面，可以直接品嚐壽司嘅鮮味，唔需要再落醬油調味。不過如果想走wasabi就要記住落單時講定喇!如果想落醬油亦可以用掃輕輕掃上。

總括嚟講有日本當地食到嘅壽司水準，價錢亦可以接受，為食豬會再嚟。樓上嘅夜景好靚，仲要有位坐，外賣上去食都唔錯。

之前為食豬食過呢度嘅芋泥雞蛋仔，印象都幾深刻，因為啲芋泥多到誇張。
呢日去到觀塘，為食豬又心思思想食，最後揀咗紫薯雞蛋仔。
望住店員整嘅時候好用力咁將紫薯蓉搽滿成底雞蛋仔。新鮮整起拎到上手熱辣辣，感覺到底雞蛋仔好墜手，用料十足。
食落紫薯蓉好綿密，雞蛋仔脆身但可惜太薄，為食豬即刻覺得太多紫薯蓉都未必係好事。
食到最尾仲有少少辛苦，因為實在太飽肚喇，紫薯蓉仲有少少過甜，變得好膩。難怪見啲街坊多數都係買原味啦。

去到長洲總係忍唔住去食平價海鮮去到碼頭左邊第一間就俾個阿姐熱情招待睇左見到$188有3餸1菜就入左去避風塘炒蟹估唔到都幾大份，花蟹嘅殼比較軟身，剝殼都幾輕鬆蟹鉗同蟹身都啖啖肉，而且有鮮味成碟總共有4個蟹蓋但係得1個有膏，其他果啲唔知去晒邊
呢度差唔多每枱都會食蟹，所以成日唔夠蟹夾用，侍應見到有客唔用會浸一浸水就俾下一手，衛生程度都係麻麻蒜香銀絲蒸扇貝嘅份量比較少，只係得4隻同埋都幾細粒，不過勝在粉絲、蔥等配料都幾足，配埋豉油都幾有鮮味豉椒炒聖子嘅份量都算多，食落又幾嫩口同鮮甜，不過豉椒味偏淡同啲洋蔥太生
菜揀左蝦醬炒通菜，呢味反而最有驚喜通菜夠嫩口之餘又炒得夠火喉，加埋蝦醬夠晒香口
整體黎計食材算新鮮但略欠火喉(除左通菜)，而衛生情況都有疑點。下次黎長洲會試下其他比較下

嚟到長洲玩，又點可以放過長洲名物之一-芒果糯米糍呢(雖然唔明點解會出名)。
為食豬本來想食另一間嘅，點知賣晒，咁就揀咗呢一間同樣出名嘅。除咗芒果糯米糍都仲有好多其他甜品可以選擇，為食豬就要咗芒果糯米糍，花生糯米糍，芝麻糊豆花同糖不甩。上枱時見芒果糯米糍個皮黑黑哋色仲以為俾錯咗，原來係紫米皮，都幾特別咁，但其實食落冇咩分別。芒果糯米糍皮薄餡靚，雖然唔係勁大粒但芒果都幾厚肉，而且冬天都食到咁甜咁多汁嘅芒果，抵讚。糯米皮煙煙韌韌，鍾意食mochi嘅為食豬反而想佢厚返少少。
另一粒花生糯米糍都係皮薄餡靚，花生餡唔會太碎仲食到一粒粒，好有咬口。糖不甩好抵食，13蚊就有一大碟，不過為食豬揀錯配搭，因為糖不甩根本係解咗體嘅花生糯米糍，但係都好食嘅。芝麻糊豆腐花為食豬就唔推薦喇，芝麻糊好淡，好稀，基本上冇芝麻味。豆腐花唔滑不過都算有豆味嘅。

為食豬研究緊長洲其他芒果糯米糍嘅時候，老闆搭嘴同為食豬澄清佢哋嘅芒果糯米糍係始祖，而且只此一家。係唔係真為食豬就不得而知，但下次再嚟都會考慮佢嘅芒果糯米糍，其他就可以不試嚕。

去到新城市廣場成日唔知食咩好，最近呢度有得食壽喜燒，今次就試下啦入到去坐低攞左位先，然後要出去收銀度點菜，感覺好似食緊food court咁點左牛肉壽喜燒套餐 (單點$71, 套餐加$18有小食同飲品)
套餐揀左沙律，坐底無耐已經送到黎沙律杯有沙律菜、芝麻醬同麵包粒，將麵包粒同芝麻醬加落菜度就可以閉蓋shake勻感覺都幾新鮮同幾好味
撈緊沙律途中壽喜燒都黎到上枱果陣已經渣渣聲，加左壽喜燒醬汁落去即刻彈到件衫由於無火爐加熱，所以要迅速整熟啲牛。牛嘅質素唔高，無咩牛味之餘都唔夠滑，不過加左壽喜燒醬汁都還可以。配菜有菇、豆同豆腐，份量都算多，其中豆腐幾有荳味另外啲牛可以點蛋黃汁，另有一番風味

為食豬嚟到長洲玩，趁機試下呢間想試好耐嘅小店。小店個名夠晒破格，入面好raw嘅裝修一樣有特色，符合幾位年青人店主嘅風格。睇返menu，小店賣嘅係泰國菜，雖然選擇唔多，但由小食主菜飲品到甜品都一應俱全。為食豬為咗留肚食其他小食只係少少哋咁嗌咗炒金邊粉，芒果煎糯米飯，一杯青流特飲同一杯龍情蜜意。泰式炒金邊粉: 一上枱就聞到好香嘅魚露味，而且好細心咁喺碟邊放咗啲砂糖同辣椒粉，方便客人自己調整辣度。為食豬就冇加糖/辣椒粉，食原味。其實就咁咩都唔加都有少少辣，但可以接受。魚露味好香，酸酸辣辣好開胃。份量唔多，配料都好豐富，有三隻大蝦仲有好多蔬菜。芒果煎糯米飯: 呢道係為食豬最期待嘅，都冇令為食豬失望。煎糯米飯有3塊配半邊芒果，加上大量嘅椰汁。煎糯米飯食落外面好脆，入面保留住糯米飯嘅煙韌口感，加上椰汁食竟然有啲似煎椰汁年糕。芒果幾甜，如果可以再多啲就更好。青流特飲: 個底應該係啤酒，加上檸檬後好清爽，雖然有酒精但好易入口。為食豬好鍾意佢充滿異國風情嘅presentation。龍情蜜意: 其實係熱嘅杞子龍眼蜜，用料都幾足，起碼有5粒龍眼，唔算太甜，感覺好養生。