Acapella (已結業)

今日去咗呢間餐廳，12點開但我11:50到咗，店員邀請我入去坐低等，都係嘅，喺工業大廈外面呆等，真係會熱到暈咗。入面座位唔算多，但總算有心思，客人係唔會望到廚房係點樣，因為佢已經化身成一架露營車，而枱布都配合返個主題，用紅色格仔布，再加上一幅草牆，的確幾有氣氛！lunch有3款，1款係$40嘅all day breakfast、另一款係佢哋定配料嘅意粉($40)、第3款就係自選配料意粉，$50可以喺肉、海鮮及蔬菜裡面揀3種配料，另加配料每款$5，又叫做「車仔意粉」。而呢3種lunch set都包湯及凍熱飲品，哇真係好抵喎！龍蝦湯唔要求同其他餐廳嗰啲百幾二百蚊一碗嘅龍蝦湯去比較，呢個湯口感濃度啱啱好，唔會太杰唔會太稀，都有啲龍蝦味，但可能鹹咗少少香草汁雞絲蘆筍蘑菇螺絲粉 ($50)配合返露營嘅主題，係用不銹鋼盤承載，幾有風味！以呢個價錢嚟講，份量算大而且足料。落單時要求多蒜，本來都冇乜期望佢哋真係會多蒜，點知真係超多蒜，一上菜時香到不得了，感覺非常新鮮熱辣辣！香草汁味道濃郁，唔會太杰；蘆筍冇渣，味道清甜；雞絲好多，但如果冇雞皮會更加好；螺絲粉偏腍身，落單時唔記得要求al dente啲添。