Cafe Tornado (已結業)

星期天，天氣乍暖還寒，與朋友V及太座一起打網球，當然目的唔係keep fit咁簡單啦。出了少許汗後，一干人等到加路連山道一帶醫肚。朋友V提議到呢間餐廳，貪其可以他他條條進膳，兼且可以响門口泊車。我地不約而同嗌了一份意粉tea set，意粉係螺絲粉、配上蕃茄汁底，材料還有蕃茄仔、煙肉及少量魚肉、蜆肉及一點basil香草。由於有蕃茄汁底嘅關係，味道有一點酸，頗醒胃，加上香草及煙肉嘅催化，令原本已經十分肚餓嘅筆者於不出十分鐘內已經解決掉整份意粉。不過魚肉及蜆肉畢竟唔係新鮮貨，導致筆者出現輕微嘅皮膚敏感。用膳其間，朋友V問筆者會唔會有多餘胃容納去試一試這裡的煙肉粒配薯仔，計筆者話此一問有點多餘，筆者當然歡迎之至啦。此小吃以薯仔粒為主，配以煙肉粒，醬汁方面有忌廉及一點沙律醬。薯仔粒爽口，煙肉粒味道濃郁，是一款香口開胃嘅小吃。呢處嘅咖啡比較失色，氣味不濃，味道也淡如水。本來賴以運動後提一提神嘅飲品，以失望告終。意粉tea set一份四十八蚊，另一款小吃大約五十蚊，共銀二百蚊。價錢屬於此種餐廳嘅平均價格範圍，要hea的話都不失為一個選擇。