堂記腸粉專門店 (已結業)

星期一，天色變清了，太座嘅心情亦變好了。心情好，就特別有雅致去搵食。是晚筆者與太座便到文英樓一帶，拜訪名聞中外嘅「堂記腸粉專門店」。話名聞中外，實一點也不誇張，單看張貼在店舖門外中英文食評便可知一二。店舖其實係半街檔，佈置簡陋，但生意相當不錯。筆者與太座共點了三款腸粉(包括炸兩、豬潤腸粉及燒鴨腸粉)及鴨腎菜乾豬骨粥。豬骨粥雖說是鴨腎，但食完成碗粥都搵唔到一粒鴨腎。話雖如此，豬骨嘅甜味完全被粥吸收，不過粥太稀了，有點影響口感。此店所有腸粉都係即叫即蒸嘅，腸粉蒸出嚟層次分明，呈半透明狀，可謂晶瑩剔透。入口軟滑，水準極高，配任何餡料都合適：油炸鬼炸得十分香脆，不過麵粉唔夠多，咬入口只有香脆嘅份兒，輕飄飄的如一陣風般，食完好似冇食過；豬潤大大件，塞得腸粉滿滿的。豬潤入口甜美爽脆，完全唔老唔鞋口。燒鴨效果最好，香之餘鴨肉酥軟，好像入口就會熔掉般。豬骨粥一碗十四蚊，炸兩十蚊，豬潤腸粉十三蚊，燒鴨腸粉十七蚊，共銀五十四蚊，平均每人廿七蚊。