王府 (已搬遷) 新店位置

星期三，太座有兩張「夏菲米克的時代」免費戲飛，於是決定先到擺花街一帶醫肚，再到ifc睇戲。年前已經試過呢度嘅手勢，今次崔護重來，點嘅亦只是輕巧食物，包括酸辣湯(細)、木耳炒津白、一碗担担麵及十隻京蔥羊肉餃。酸辣湯辣味十足，太座話酸味唔夠，所以加了點浙醋，筆者就覺得加了浙醋反而酸了點，唔加就應該剛剛好。木耳津白十分惹味，太座覺得師傅應該响個玻璃茨度加了點雞粉，無怪乎一碟齋菜竟有肉嘅鮮味。木耳爽脆，津白亦炒得比較腍身，正合筆者心意。担担麵與一般食開嘅唔同，做法類似京醬肉絲般同麵撈勻先食，筆者心裡有少少質疑這是否真是担担麵，不過筆者對呢方面冇深究，食咗先算。以撈麵標準評之，麵條太腍，唔夠彈牙，而且整個麵太濕身，影響整體口感，配料亦唔香，是失望之作。羊肉餃亦是一般水準，羊肉味有少少羶但唔明顯，羊羶味遠不及隔兩個舖位嘅「餃子園」了。此餐折合一百二十二蚊，平均每人六十一蚊，雖然消費唔係貴，但係冇乜特別理由吸引番筆者去再幫襯。