渝痴漁醉 (已結業)

之前食過水煮魚已經想試下尼間既烤魚。發現最近做緊$99雞煲/烤魚放題，仲要免加一，就馬上去食。餐廳唔大，大約有10張枱，接近6點就坐滿哂，所以book枱最穏陣，同埋唔知優惠做到幾時，最好打去問下。我地揀左雞煲，小辣。雞件肉質嫩滑，煮得夠入味，又麻又辣，非常惹味，重點雞皮唔似炸過好韌個隻。覺得小辣唔係好夠辣，侍應仲俾左一碟麻辣我地自已加，正！火鍋配料有蟹柳、腸仔、芝士腸、墨魚丸、牛丸、薯粉、雞件、肥牛、豬紅、羅白、薯仔、芽菜、芝士豆腐、菇、菜。選擇唔太多，最鐘意食薯粉、雞件、芝士豆腐同芝士腸，其他丸類肥牛係頹頹地既，但都唔係難食，符合價錢。用碟蓋住既火鍋醬油飲品選擇唔多，食雞煲至岩飲汽水。(個人口味S: 3.5/5)(個人口味E: 3.6/5)個人覺得尼間既雞煲係好食過最近旺角食個間，但火鍋配料就真係麻麻。不過雞煲先係主角，我有薯粉、雞件、芝士豆腐配埋惹味又麻又辣既雞煲汁就滿足啦。如果你對火鍋配料都有d要求既話，尼間就唔適合你啦。不過$99/位尼個價錢真係唔可以挑剔d乜。見到差唔多枱枱都係食烤魚，有機會都要試埋烤魚。