開場係水雲醋、汁煮老天同芋頭，個擺盤靚到唔捨得搞亂。重點嚟啦：軟煮八爪魚真・係・神・級！師傅話蒸足4小時再醃2日，入口腍到似食緊棉花糖，但八爪魚鮮味竟然無走樣？北海道毛蟹搭柚子酸汁啫喱就清爽啲，個感覺似俾隊友Carry完食返粒糖補血。
刺身二點，九州深海池魚油脂甘香得嚟唔膩，象拔蚌爽脆到似食緊海洋版「咔嚓脆」。最癲係燒平貝，師傅用火槍輕輕掃過，貝肉瞬間捲起，食落有焦香又Keep到肉汁。燒鷹鯧魚係隱藏MVP，魚皮燒到脆紙咁薄，魚油多到要用酸汁蘿蔔平衡返。
握壽司八貫係重頭戲，師傅手勢穩到似魔術！左口魚炙燒裙邊，油香逼人；秋刀魚肥美濃郁，落少少河豚蔥提鮮；北海道北寄貝輕燒，甜味爆燈；赤鯥炭燒彈牙，長崎對馬海峽貨，值回票價！ 大拖羅熟成14日，入口即化但有咬口；馬糞海膽creamy到似北海道奶油，配紫菜層次一流；車海老原隻蒸熟剝殼，膏香撲鼻。
玉子燒無麵粉，用蝦肉+魚肉+蛋慢烤，鬆軟如蛋糕，微甜微鹹，完食前嘅小驚喜。椀物赤味噌湯鹹香暖胃，甜品北海道蜜瓜清甜解膩，整個$1780皇套餐，份量啱啱好，唔會撐到返唔到屋企。
總括嚟講，成餐飯最正係睇住師傅處理魚料嘅手勢——切秋刀魚快過我撳IG Story。雖然價錢夠買對波鞋，但計返個體驗同食材質素，好過你飛去日本排隊食名店。吧枱位得12個，環境私隱高，唔使同遊客搶位。 下次再去，諗住試埋午市$780套餐，性價比更高。
