Day and Nite by Master Kama (已結業)

今晚同同事去旺角行街，行完波鞋街就打算搵野食，過馬路時抬頭望就見到呢間餐廳好似未試過！見佢樓下有個餐牌，於是我地就行過去睇下有乜啱食！原來係食海鮮餐嘅，價錢都比較平民化，所以我地諗都無諗就同職員講: 兩位丫唔該！原來都幾多人黎食，突然間覺得自己無揀錯！坐低見到呢個龍蝦公仔幾得意！由於我地都有選擇困難症，打開餐牌望咗好耐都唔知食乜？最後我地比呢個龍蝦匯套餐吸引咗！全龍蝦宴(龍蝦包、烤蒜蓉牛油龍蝦、龍蝦什錦海鮮石鍋湯飯)賣相真係好吸引丫！加上我都幾鐘意食龍蝦，所以第一眼見到都幾興奮又期待！龍蝦包入面都幾多蝦肉，咬落啖啖肉加埋醬汁好fresh！而龍蝦仔肉就相對少，但夠鮮味都值得一食！薯條加南瓜條熱辣辣脆卜卜都好正！濃濃的龍蝦湯飯配什錦海鮮，比想像中好食！濃湯以為會好咸，但食落味道剛剛好！質感都較為杰身，而且配以石鍋上枱，可以保持熱度不錯！每人大概兩碗左右，所以食落都好飽！整體黎講唔錯，因為我平時好少walkin搵野食，但都食到有呢個質素已經覺得好值得！所以我決定下次同朋友再黎試埋其他野先！