星期日下午2 點先嚟到, 仲驚佢收咗市, 點知未收之餘仲有點心出, 正呀! 點解要嚟呢到食呢, 就係因為之前老豆帶我嚟食過一次就上咗引囉. 呢到既裝修除咗牆紙同地毯之外; 其他仍停留係80年代左右咁啦, 連侍應都係有返咁上下年幾.
佢地無點心車, 無點心紙比你, 全部都要自己行出去大排檔到攞, 一行行大大細細既點心放係到等你去揀, 我地既鐵膽一定係
山竹牛肉 - 好味又彈牙, 即使什麼大集團酒樓都遠不及佢地, 真係好好食架.
鴨腳扎 - 成碟嘢最出色係件芋頭, 又香又粉既泥普芋正到不得了. 鴨腳又唔會諗 bed bed, 第一次係同人分, 但第二次要獨霸一件(即係食咗半碟).
魚雲 - 我唔食魚都覺得佢好食, 仲第一次食咗一大片, 如果唔係比人食晒, 我仲想食多件添呀.
蟹籽百花釀花膠 - 呢個又係好好食, 一碟有3大件(頂點), D花膠係比上湯喂過既, 但唔會霉 duck duck, 一次過只係放花膠入口, 成口full到講唔到嘢, 再食蟹籽百花爽口夾好味.
之前亦曾經食過....
馬拉糕 - 係舊式馬拉糕, 無而家D咁諗, 彈彈地又唔會好甜, 好食.
珍珠雞 - 呢款係新式做法, 有張白色紙係出面, 味道普通.
雞扎 - 味道普通, 因為大家都係扎, 所以一路食一路掛住D鴨腳扎.
义燒飽 - 呢個都係好食既, 不過好食既嘢太多, 唔係好夠位放佢.
因為碟碟都有番咁上下, 所以兩個人最多只能放得落5-6碟點心, 當中仲要係無飽類同糯米類添.
之前都講過D侍應年幾有番咁上下, 所以全部都好有heart唔似D花靚, 枱面得一只吉碟都會埋嚟執走, 去到大排檔無你想要個款點心, 佢又會問你 "可唔可以等十五分鐘, 即刻蒸一碟出嚟比你", 如果係其他; 唔係剔點心紙既酒樓, 一定同你講買晒, 叫你揀過第二樣. 但環境既感覺, 侍應既行為或衛生始終都係停留係80年代, 要新款裝修, 靚靚厚身制服, 年輕貌美既侍應, 西裝骨骨既部長, 呢到就欠俸喇.
1
