金田家 (已結業)

突然間好想食拉麵，所以同個朋友上網搵吓附近有冇拉麵店，竟然俾我哋發現有間九州第一拉麵嘅鋪頭，即刻嗱嗱聲衝過去食。6點鐘左右入到去都已經有幾個客人係入邊，好彩坐到一個二人位，咁我哋都點嘢食。黑豚拉麵＄98 ,呢個係朋友點嘅，佢再加左糖心蛋＄14，腩肉叉燒＄20，豬骨湯底好濃郁，朋友揀咗嘅面度係硬身，食落彈牙有口感，朋友話個糖心蛋好好食，勁想叫多一隻。黑松露拉麵＄108 ,呢兩款嘅拉麵湯底都好相似，飲落好豬骨味重，唔知道原來入邊已經有木耳，我哋再另外加多個木耳＄7，當然一定要再配多一隻糖心蛋啦，我就選咗軟身嘅面底，麵條給晒湯底精華，掛湯能力一流，黑松露嘅份量都相當多，撈埋入去湯入邊，有濃濃嘅黑松露味道，豚肉半肥瘦。上網見到佢嘅薯餅都唔錯，所以點左一客試吓，男爵薯餅＄38 ,原來係有一塊紫薯薯餅，另一個係牛肉薯餅，朋友鍾意紫薯味道，甜甜地，入邊仲有栗子架，我個人就鍾意牛肉薯餅，薯蓉口感綿滑，炸得好香口。整體來講餐廳裝修格調光猛舒服，侍應嘅服務態度亦都相當好，不過廚房因為係一碗一碗拉麵整出嚟，所以要啲時間用心等待，下次再經過都會再幫襯。