1
呢間位於太子嘅小菜餐廳，每次經過見到佢大大個招牌，都會好想試下，今次終於同屋企人黎食左個靚飯!餐廳共有兩層，客人主要都會在1樓用餐，有卡位亦有圓枱，當天晚上食飯黎到全場爆滿!
13
2
餐牌上有多款菜式可以選擇，而且亦有一些優惠菜式可以選擇!另外餐廳8點半後入座仲有8折優惠添!
淮杞燉螺頭湯，成家人都中意飲湯，所以叫左個例牌飲下，大概可以分到4碗。材料有淮山、雞件、雞腳、螺頭等。湯非常鮮甜，而且雞腳仲煲得好腍，入口有種即溶嘅感覺，熱辣辣飲非常正!
龍蝦孖寶，呢個優惠分別有上湯龍蝦伊麵及燒味，我地燒味就揀左燒雞半隻!燒雞雞皮燒到脆卜卜，雞肉嫩滑入味，非常正!而龍蝦伊麵用上澳洲龍蝦，大概一斤重，龍蝦肉鮮甜彈牙，配上上湯伊麵，伊麵味道唔會太咸，吸收了龍蝦嘅鮮味，味道唔錯!
西蘭花花姿珊瑚蚌，西蘭花脆口，用上魷魚、珊瑚蚌、紅椒、黃椒、木耳一齊炒，顏色非常靚!珊瑚蚌同魷魚爽口彈牙，非常惹味!
