鳥海山鐵板燒 (已搬遷) 新店位置

有時朋友講過的推薦你會點處理？聽過就算，即刻去食，定係自己儲低個list? 我自己有個習慣，就係Google list儲心，世界各地都有，香港就當然最多。放咗喺地圖裏便嘅呢間鳥海山真係一段好長嘅時間，長沙灣食鐵板燒出名我自己都有啲保留，但試過點知係咪真係唔得呢？同區嘅一間荔枝角繼當然精彩，不過價錢貴少少，而且佢港島分店Nobi我反而去多好多。朋友話要必點大蝦餐，$648晚餐，同區嘅繼晚餐一位要成千，講真，未食已經贏，當然座位無咁好，食物好似有啲分別，但平有平食，貴有貴食。沙律係正常野，無得講好唔好啦。佢個車海老係真心幾出色，上枱個樣幾特別，同平時有點不同，好似有啲藝術，但唔識講，總之幾好食啦。由到當晚無銀鱈魚，就轉左比目魚。煎比目魚真係幾好，魚油香爆發，個魚皮係煎到又脆又靚。安格斯牛肉本身係幾大件，不過無影相，上場切粒上，掌握得唔錯，煎得外脆而入面有油香，配炸蒜更一流。炒野菜加左好多牛油，香好多，只不夠蔬菜唔夠多，呢個係缺點。炒飯都算幾好，如果今晚可以坐係bar枱睇到佢煮應該開心好多。老實，咁多野食又唔錯，如果想食鐵板燒一定係好好嘅選擇，如果你唔介意嘅長沙灣。