浜燒太郎 (已結業)

呢日收左工約咗班朋友食飯，見Facebook 有唔少人話將軍澳海邊嗰幾個新樓盤下面嘅商場新開咗唔少餐廳，所以行過去試下。一入到去係好典型嘅居酒屋格局，好有日本風味。在場都有唔少客人，好彩朋友早咗拎位。一齊人就叫咗兩板海膽試下，味道相當鮮甜，夾埋紫菜食一流。粒粒海膽都好creamy好香。再嚟一個酒煮大蜆，有元貝同蜆肉，清酒味道好香，加上鮮甜嘅蜆肉煮成湯，飲落好暖身，冬天好啱飲。跟住就一人一個嘅海鮮丼，有唔少款式，尤其係有我最鐘意嘅金目鯛同三文魚籽，非常新鮮。加上醋飯一齊食，真係大滿足。而呢個北海道海鮮麵沙律亦都好抵讚，上面鋪滿曬刺身粒粒，加上拉麵同沙律，口感好清新好開胃，作為前菜好醒神。我哋亦都試叫咗唔少串燒，份份都即叫即整，尤其燒牛舌，食落香口多汁。呢個煙肉蠔卷都好特別，而且比較少見嘅配合，但煙肉燒得好香脆，煙肉味又加落啲蠔好夾，食落咸香惹味。另外亦唔少得燒雞皮同露筍，味道亦都唔錯，不過有啲位比較燶，鐘意食香口嘢就會啱啲。