鉄板200 (已結業)

當然在這等地方吃魚生飯，是有點與自己過唔去，亦不會是我做的。同個朋友約埋有點事要傾，佢提議來這裡，見幾好坐又企企理理咁，都無咩所謂。呢度地方幾好，張張檯四四方方咁，廚房亦以open-kitchen形式運作，環境算唔錯。有多個午餐選擇，朋友要了魚生飯，已好言相勸，但他一意孤行，就由得佢，我就穩陣的要了個牛柳粒窩飯。牛柳粒窩飯是連著鐵窩燒的，熱辣辣的，賣相不錯。牛柳粒沒有經過化學品的洗禮，吃落也算鬆化，不韌，算交了功課。飯夠乾身，配上不少的菇，撈上燒汁，不過不失；朋友的魚生飯賣相幾靚，但吃落就唔係太得，佢吃了幾口已經慢了下來，就因為魚生幾腥，吃不下。魚生有三文魚及吞拿魚，我不吃生的三文，唯有試了吞拿魚，又真的是腥腥的又腍腍的，唔係太新鮮。飯亦偏硬，可以這樣說，這個飯都幾一無是處。所以吃魚生飯，要在有信心的食店吃會較好，單是這個倒胃的魚生飯，值得一個「喊面」。餐後的熱咖啡，就幾香濃，這個在行入舖頭時已聞到。埋單一百四十蚊，係唔貴，但味道一般，可能來吃串燒會好一點。