知魚知樂 (已結業)

今日同家姐經過紅磡，咁啱又想食碗米線，就諗住試試呢間知魚知樂！首先身為羊肉串愛好者，點可以唔叫返兩串羊肉串呢？串燒送上嚟嘅時候，仲熱辣辣，羊肉串嘅口感鮮嫩多汁，搭配孜然粉簡直係絕配！我同家姐都叫咗兩碗唔同配料嘅酸菜魚麵，一碗係手工面，另一碗係米線。我哋叫咗小辣，但係都算幾辣🥵但整體嚟講幾滿意，因為佢嘅料好足，酸菜魚亦唔會話好腥，口感偏爽口，手工面亦好有嚼勁。然後飲品方面，我哋叫咗兩杯飲品，分別係珍珠鮮奶茶同埋茉莉奶綠。珍珠鮮奶茶，口感細膩，珍珠Q彈，可能因為叫咗少甜，我認為甜度啱啱好，配上辣辣地嘅米線食落去真係好似佢店入邊周圍裝飾所講，食完之後好開心！茉莉奶綠嘅茉莉味亦好香濃😋我哋亦都叫咗烤娃娃菜同烤土豆片，同樣地係加咗孜然粉。雖然整體我都好滿意，但如果要挑剔的話，我認為烤娃娃菜有少少偏鹹～最後講埋店員嘅服務態度好有禮貌，下次經過會再嚟！