Day and Nite by Master Kama (已結業)

收工陪朋友去左波鞋街買完鞋，又係食飯既時候，行到山東街見到有間餐廳出面放左餐牌，以日本意大利Fusion菜做主打，食物同飲品都幾特別，睇下覺得都唔錯，就決定食呢間。可能唔係食肆集中地，等左5分鐘左右就有位了。餐廳有兩層，座位唔算多，勝在夠寧靜，行到攰坐下傾偈好舒服！龍蝦玉子燒，上面特別整左有Master Kama字樣，一睇就知係邊間餐廳先食到啦，玉子又香甜又滑，全晚我最喜歡這個。再來海膽忌廉蟹肉意粉，超勁濃海膽味配意粉，多汁好食！Kama石頭濃湯鍋係自由配搭，揀了一輪後決定要(南瓜濃湯飯配流心豚肉卷)，南瓜湯好好味，忍不住一啖接一啖，豚肉炸到脆卜卜好特別，初時睇仲以為係蕃薯添！Peach & Lychee Tea，清新蜜桃加荔枝味，甜甜地又解渴。