Cafe Zense

营业中

休息中

又落銅鑼灣食lunch。呢間cafe係食肆林立既謝斐道，大廈入面要上四樓。入面播住令人放鬆既韓文音樂，燈光柔和，平日午市人唔多，有室內室外座位之分，適合傾偈。呢度一至五既午市套餐免收加一。今日叫左慢煮三文魚魚柳($138)。午市套餐包餐湯或沙律，跟咖啡或茶。今日沙律係西蘭花加上軟芝士做調味，上面仲灑咗煙肉碎，蓋過晒西蘭花嘅草青味，味道出奇地正。主菜三文魚魚柳，火候控制得非常之好，啱啱好夠熟就上碟，所以每一啖都超級滑，感覺係比魚生熟少少咋，超正。一啖入口，咬一啖就已經食到三文魚獨有嘅鮮味同埋非常健康既魚油。真係好耐未食過咁正嘅三文魚魚柳。相比之下，咖啡就差少少啦。可能本身我飲咖啡係飲都比較濃味既。叫多左個Apple Crumble ($58)做飯後甜品，廚師真係非常之用心整，呢味甜品至少要焗半個鐘，真係用心之作啊！午市都食到，覺得自己好幸福。麵包碎加蘋果，上面加一球柚子雪糕，一啖入面有硬有軟，有冷有熱，全部加埋真係口感豐富，味蕾頂級享受。