漁港薈 (已結業)

喺銅鑼灣行完街, 上網搵下附近有咩好嘢食, 見到新開餐廳 漁港薈 海鮮套餐喺openrice訂購有半價優惠, 即刻去幫襯下！套餐都包幾多嘢食, 先嚟個無味精燉湯, 肉味香濃, 健康有益滋潤養生, 飲完成個人暖笠笠！黃金川辣炒蟹 香辣惹味, 鑊氣十足, 蟹殼薄身, 肉質結實鮮甜, 有辣勁不搶口, 回味無窮！紅燒妙齡乳鴿 香口惹味, 肉質充實幼嫩滑溜, 醮點椒鹽嚟食突顯肉味香濃！海鮮拼盤 賣相吸引, 各款海鮮有不同蒸煮時間指引和服務員待候, 十分細心, 保證唔會過火！鮑魚煙韌有嚼口、海蝦鮮甜肉質結實爽口、大蜆鮮活清甜大海水味。安格斯手切肥牛 雪花紋理清晰, 油脂甘香, 嫩滑細緻, 牛味濃郁！粗糧拼盤 用小蒸籠上碟顏色鮮豔, 十分精緻, 飽肚又可當甜品, 為呢一餐畫上完美句號！