GAIJIN

营业中

休息中

銅鑼灣食飯時間周圍都咁多人，又要排隊又要同人迫，今日難得平日放假同家姐慢慢坐低傾吓計食個飯，先接小朋友放學，又比佢搵到呢個好地方，上網見到呢間餐廳如果食晚飯，價錢屬於中上，但而家食lunch差唔多平一半。一坐低先來新鮮麵包，牛角包新鮮焗起最好味，前菜我揀咗沙律，家姐揀咗南瓜湯，沙律新鮮醬汁酸酸甜甜，南瓜湯好香甜，濃濃嘅南瓜味，我忍唔住叫多兩個包用來送碗湯。加左碟牛肉他他，勁香脆嘅多士，配埋生牛肉，超級美味。主菜牛柳剛剛五成，牛味濃郁，唔韌但有口感，仲有好耐未見過嘅脆薯波，兒時回憶返晒嚟。另一款主菜係和牛面頰，因為慢煮嘅關係，加上和牛食入口真係超級淋滑，直頭每啖食到骨膠原，味道非常濃郁，真係恨不得想叫個白飯用嚟送晒啲汁，真心非常好味！估唔到連最後甜品都有驚喜，我同家姐都係朱古力控，見到朱古力撻只係加少少錢都決定一試，果然冇後悔，超級濃郁嘅朱古力味，蛋糕夠香滑，淨係呢舊蛋糕喺銅鑼灣食可能已經要幾十蚊，今餐飯真係由前菜至甜品都好滿意，非常滿足。