玄鮨 (已結業)

今日想食魚生，所以就去咗一間朋友介紹嘅日本料理餐廳。餐廳裝修有高級餐廳嘅感覺。可以選擇坐壽司吧枱、一般餐枱或者係私人房間。前菜係小小蔬菜嘅冷盤，有金菇、三文魚子青椒，配埋酸酸地嘅醬汁幾開胃。主菜我哋嗌左兩個魚生定食，一個係特上魚生盛合（3號），另外一個就係魚生飯定食（1號）。特上魚生盛合有魷魚、凡立貝、甜蝦同好多款魚生，值得特別一提嘅係佢嘅鰹魚同埋吞拿魚。鰹魚魚生特別有一款蒜蓉蔥豉油配合一齊食，鰹魚魚生肉質比較厚實，配合醬汁將佢嘅鮮味帶晒出嚟，另外吞拿魚入口即溶，基本上唔使用任何醬汁都已經超好味，令我回味無窮！另外佢重有一碟高野豆腐跟餐，豆腐吸收左湯汁，有豆香之餘亦都可以享受到鮮甜湯汁。魚生飯定食呢個係有五至六種魚生組合成嘅丼飯，食材亦都非常新鮮，魚生下便嘅飯亦加咗紫菜令到食起嚟冇咁寡。最後跟餐嘅甜品係開心果雪糕夾餅，脆脆地嘅夾餅同軟滑雪糕一齊食，雙重口感，為呢一餐畫上完美嘅句號。整體來講食物嘅質素絕對值得呢個價錢，環境亦都相當好，非常適合情侶或者一班朋友一齊食。