米線樂•麻辣豬骨濃湯 (已結業)

作為一個米線達人，我成日周圍去食米線。路經長沙灣見到呢間舖頭入去就入去試下。估唔到咁有驚喜！呢間舖頭配菜嘅選擇好多，而且亦都好有創意！我點左墨魚豆卜、蝦膠腐皮卷，米線湯底方面，我揀咗麻辣小辣。加凍檸茶少甜少冰。另外仲單點左一個麻辣小食拼盤。頭先所講驚喜嘅位就係佢啲配菜，蝦膠腐皮卷炸好香口，腐竹味好香！墨魚豆卜炸到卜卜脆！當下嗰刻，就會有一種寧願喺度坐得舒舒服服，都好過去排老闆娘，因為佢哋嘅配料嘅質素真係一樣咁高！米線方面都係好滑，湯底有啲似譚仔，我嗌左小辣，大概就好似譚仔嘅三小辣。麻辣拼盤方面，就超級足料，有豬耳雞腎雞翼大腸滷水蛋。佢個份量多到兩個人都食唔晒。我覺得佢嘅滷水味超級出，各樣嘅嘢食都唔會因為滷得太耐而太淋，反而仲好爽口。如果佢嘅麻辣味再出啲就更加好啦！整體而言佢係絕對超出我預期。