大瀛喜日本料理 (已結業)

最近朋友忙緊搵工，搵到愁眉滿面， 所以就決定同佢食返餐好嘅，慰勞一下佢！今次呢間放題，質素都幾高，食物選擇多，上菜方面都幾快，唔駛等好耐就成枱都係餸！食放題點少得刺身呢，呢度嘅三文魚雖然唔算好厚切，但勝在都夠肥美，唔會有好多筋位；北寄貝同鮑魚冇雪味，仲幾彈牙；而櫻花魷魚同甜蝦光澤透色，尚算新鮮。野飲方面，仲咗必有嘅汽水、紙包飲品之外，仲有乳酪提供！士多啤梨味，仲有少量果肉粒！蒲燒鰻魚，配合微甜燒汁，鰻魚肉入哂味，表皮微微燒至脆身，味道唔錯。和風帆立貝，帆立貝大大粒，肉質都幾結實，用洋蔥爆香，食落仲有淡淡嘅牛油香味。炸物方面，我就最鐘意榴槤球，炸球炸至金黃色，卜卜脆，咬落去又有榴槤味，脆口嘅外表加上軟軟嘅榴槤餡料，口感一流。如果，唔鐘意食榴槤，甜香嘅香芋球都係另一個唔錯嘅選擇。而芝麻雞翼都係另一大推，炸到香脆嘅雞翼配上芝麻香，食落好香口。牛肉鍋，分量超足，除咗有好多塊大大塊肥牛，仲有唔少配菜，白菜同豆腐吸哂牛肉味。貓山王糯米糍，同榴槤球一樣，冇令人失望，白雪雪圓形波波嘅糯米糍好可愛，好治癒，咬落去係軟綿嘅榴槤餡，好有口感。